يستمر العراق بكل ثقة في تحطيم الأرقام القياسية وبدون منافسة غير منافسة كلش شريفة ونزيهة وي الصومال وأفغانستان ، هذولة هم إللي مدوخينا وهم سبب صداع العراق، شلون نگدر نتجاوزهم، ماكو غير ندعو رب العالمين يصلح حال الصومال وأفغانستان حتى يطلعون من المنافسة وتظل الساحة بس إلنا، ونضمن البطولة في كل شي، ونضمن الخماسية التاريخية: بطولة الفساد والقتل والخطف والتزوير والرشوة..تماما حالنا مثل حال نادي برشلونة وي الخماسية التأريخية على عناد مشجعي نادي ريال مدريد وأني منهم !
وهسة عدنا رقم ماحد راح يگدر يتقرب منه، رقم صعب ويعض، وهو بقاء الدولة بلا رئيس لمدة سنة تقويمية كاملة، بليلها ونهارها ، بزلازلها وهزاتها وفيضاناتها وغبارها، كل هذا وإحنا بلا رئيس يطبطب علينا، وهو صاحب الطبطوب الكبير والوجه الضاحك المستنير، سنة ما نعرف ندگ يا باب: يمعودين ما حد شايف رئيسنا…راح عيد وإجى عيدين وما حد نطانا عيدية ولا مكرمة، آخر أخباره گالوا راح يشدوله محرك آلماني تيربو، بس ما نعرف رهم عالشاصي مالته لو لا !
هذا الرقم راح يظل صامد مثل البعث بالأهزوجة الأزلامية هلهولة للبعث الصامد والحقيقة طلع البعث الصامت حاله حال أفلام شاربي شاپلن، بس بشرط هم ضحكوا علينا مو إحنا المشاهدين ضحكنا على الممثلين. سنة ما عدنا رئيس والدولة مشت أمورها بالشين لو بالزين مشت، وأعتقد هاي إشارة إلى ضرورة تعديل الدستور وإلغاء منصب رئيس الدولة، أشو الأمور ماشية وهايشة وخرفان وطليان، بعد شنو لزمة رئيس لو بس تريدون إرهاق الدولة بالصرفيات الزايدة وبالأوزان الزايدة !
وأعتقد كل عراقي من حقه هسة يشجع المنتخب الألماني في مونديال البرازيل 2014، لأن إحنا رئيسنا يحكم من ألمانيا، يعني إحنا ألمان بتطبيق الأمر الإلهي إللي يگول ” وأطيعوا الله والرسول وأولي الأمر منكم” وأولي الأمر بحسب الكليشة الدينية هم الرؤساء، وإحنا متدينين ولازم نتبع هالشي، ولازم الخارجية العراقية تطالب ألمانيا بأن تحترم نفسها وتلغي شرط الفيزا من العراقيين إللي يريدون يروحون شوپّينگ لألمانيا، إي شوپينگ لأن الكشخة تليق بينا والدليل عدنا ريس بمحرك پورش…بشرفي كشخة، تگعد وتكشخ بالريس: ريسنا پورش موديل سنته واللون بكيفنا !
جماعة جلعود (جلال + مسعود) كل واحد بيهم يصير بالع له راديو على إذاعة صوت الجماهير ولسانه مترين من يحچي على فقرات الدستور والحقوق والواجبات إللي لازم الحكومة المركزية تلتزم بيها للأقليم، مثل الميزانية ودفع عقود شركات النفط، بس هم نفسهم الجلعودية يكونون صنطة وسكوت والدستور معطل من شغلة تمسهم، مثل فقرة غياب الرئيس أو مرضه أو موته، وأعتقد هاي الأمور الثلاثة موجودة بحالتنا، ليش هاي الفقرة مولسة وطلع بيها دسك وما تتحرك لا بالعملية السياسية ولا بكرين شيلني وأشيلك ؟
خلونا نفترض إن الريس حي يرزق…فرضية ما بيها شي لا تخافون…شلون من يرجع راح نعرفه !!! أكيد حالته راح تصير مثل حالة المطربة أنغام إللي كل يوم توگف گدام المرايا وتفز وتگول هاي منو!! ويجوز حتى من تنام وي رجلها تزعل منه وتتهمه بالخيانة الزوجية وتگول له : هاي منو بحضنك !! أكيد الريس راح يرجع شاب بعيون زرگ ألمانية وشعر أصفر ويشبه كارل هانز رومنيگه و يركض أسرع منه، وشلون راح يلقي خطاب بعيد الپيشمرگة؟ باللغة الألمانية ؟؟ نريد ألمانيا تهيئنا لمثل هذه الحالة، خلي تدز إلنا أساليب التعامل وي ريس بعد سنة من الغياب، شلون نلزمه، شلون نشوفه، وحتى شلون ننزله من الطيارة أخاف ينكسر وتعال من جديد دزه لألمانيا وأنتظر رحمة منطقة يورو من يگطعون المساعدات عن المسشتفيات عود ذاك الوكت يرمون فضلات المستشفيات !
والفرضية الثانية أن الريس عد الرفيق الأعلى في إجتماع مطول إلى قيام الساعة، وآويلي شلون راح يستلمه الرفيق الأعلى، خاصة هو متأخر عن دفع الإشتراك، بهاي الحالة نطالب دولة ألمانيا الصديقة بأن تنطينا اللشة مالتنا ونحملها المسؤولية عن سلامة اللشة ، خاصة أن صاحبنا خوش لشة ! ووگع في أرض ألمانية نتيجة خلل فني في الدماغ والقلب والكلية والكبد والبروستات…آويلي على الست الخاتون، دمرت بروستات الريّس !
بعد چم يوم راس السنة، ومثل ما وگفت العام مثل اليتيم بين الدول وما عندي رئيس، راح أوگف همين هيچ، جيوبي مليانة دم، عيوني بيها آمنيات مغلفة، وگلبي بيه حسرات صارت كوليسترول يرهق القلب، راح أوگف وأخلي گدامي علم ألمانيا، وأغني…موطني….موطني !
[email protected]
