لحد هاي اللحظة المباركة ما وصلت إلى الجواب عن سبب زيارة السيد رئيس الوزراء إلى اليابان ،حلوة مال (السيد) ولو هو ما يلبس عمامة سودة بس ميخالف يمكن إعتباره سيد بالواسطة والدستور والمحاصصة والمخاصصة والمجاعصة. ما فهمت سبب الزيارة لأن ما محتاجين اليابان ولا نريد شي من اليابان، أشو عقود محطات الكهرباء(غير الوهمية) كلها وي شركات إيرانية، والتاكسيات كلها سيارات إيرانية إللي صارت محتكرة سباقات فورمولا وان خلال عشر سنوات الآخيرة بالسيارة الإيرانية ماركة (رهبري) بقيادة السائق (نيكونام)..يرجى قراءة الإسم باللفظ الفارسي…مقطعين …المقطع الأول يخلص في الحرف (ك) ثم وقف خفيف لزوماً…وبعدين حرف عطف وچلمة (نام).
ما محتاجين اليابان…أشو البلاستك بكافة أنواعه وخاصة النعلان والإبريج للتواليتات دا تجينا من إيران لأن سمعة البتروكيمياويات الإيرانية أفضل من اليابانية…وما نريد كمبيوترات توشيبا ولا سوني…ما نحتاج كمبيوتر بوجود الستياني ، عبالك شاد عشرين سوبر بروسيسور وماذر بورد، أي سؤال يجي ببالك، بس كلك واحد على باب السرداب وراح يجيك الجواب بأقل من واحد من مليار جزء من الثانية، لعد ليش يستاهل واحد يصيحه حجة الله في عباده الغشمة ؟ أو آية من آيات العزيز الجليل …بين عباده المطفين بسبب ماكو كهرباء…والمولدة خربانة…بس الآية تشتغل على الطاقة الشمسية والمريخية.
ما نريد اليابان…ليش هاي الزيارة!! جمهوريت إسلامي إيران ما مقصرة بأي شي…وهاي يمنا شمرة تفلة…لا نحتاج نسافر طوكيو ولا شي. يجوز اليابان هي محتاجتنا وطلبت هاي الزيارة بس إستحت تعلنها، يجوز اليابان تريد تلتقي رؤساء الجامعات العراقية حتى ينقلون تجربة التعليم العالي الحوزوي إلى طوكيو ، وتريد اليابان زيارة مدراء المستشفيات العراقية لطوكيو حتى يعلمون اليابانيين أسرار تنظيم المستشفيات، وتريد بلدية طوكيو عقد إجتماعات وي رؤساء بلديات المحافظات العراقية الجنوبية (الله يخليكم عدا أبو الشفايف صابر الحساوي) حتى يتعلمون المعايشة طويلة الأمد وي الصراصر إللي مالية كل بيت باليابان والدليل إن كل وحوش فيگا في گريندايزر هي صراصر وحشرات تتحول إلى وحوش بإشعاعات ميگاترون…وحتى يتعلمون فن ترتيب الحدائق إنطلاقا من جمالية حديقة الامة في بغداد!
بشرفكم شنو هاي الزيارة ؟
ومنو راح بهاي الزيارة؟؟
راح لطوكيو زعيم مليشيا مسلحة قتلت وذبحت العراقيين أيام الحرب العراقية الإيرانية وفي فترة الحصار من چانت تجي عصابات مليشياته من المستنقعات في العمارة وتبوگ وتذبح…زعيم مليشيا ذبحت ألاف العراقيين في الحرب الطائفية في السباق على المركز الاول بينه وبين چلب الدشبول عدنان المجرم ، والضاري على الشعب ,إللي ذبح من العراقيين أكثر من (العدو) الامريكي وتاليته گاعد بعمان…بأكبر قاعدة للــ(عدو) الامريكي في المنطقة…هذا المليشاوي شنو علاقته بالعلم والتكنولوجيا حتى لو صار وزير..لو يجوز رئيس الوزراء أخذه وياه ترضية حتى لا يزعل ويعلن إنفصاله الأبدي عن تحالف الدعوچية…حزب الدعوة إلى الفساد…إينما كان وبأي طريقة.
هذا الوزير (نقل) كل شي بالعراق إلى إيران…ضباط…طيارين…أسلحة…برامج الصناعة النووية..المكتبات الشيعية الثمينة…هذا نقل كل تاريخ العراق إلى إيران ومن هذا صار وزير نقل…يستاهل وحگ القمچي إللي چان بيده ويعذب الأسرى العراقيين ويسمط ظهرهم بالقمچي.
أو يجوز هذا المليشاوي راح حتى يوقع عقد وي (عدنان وعبسي) حتى يجون يدربون مليشياته حتى يروحون يفجرون ميناء (المبارك) الكويتي…إذا هيچ ميخالف…عدو عدوي حبيبي…بس خايف يجينا (عدنان وعبسي) ويشوف العز إللي عدنا ويطالب بالحصة اليابانية في الحكومة العراقية ويرفض التوجه إلى محافظة الكويت بحسب العقد….وخاصة بعد أن طالبت طوكيو بحقها في أن تصير أقليم فيدرالي وي أقليم تكريت العراقي للإستفادة من خبرات هز الشوارب الأزلامية للرفاق في تكريت…لأن اليابانيين لحد هاسة ومع كل كمبيوتراتهم وتكنولوجياتهم حايرين وفشلوا في معرفة أسرار هز الشوارب.
مو گالها تاجر النعلان….مو هيچ الحچي يابه !
