كلما أريد أوصل لوصف ينطبق على ديمقراطيتنا المخربطة الي ما ينعرف راسها من رجليها , ما جاي الكه أحسن من هذا الوصف , ديمقراطية كلمن راكب راسه , فهاي الديمقراطية جابتلنه ناس كل واحد يشوف نفسه هو الراس , يعني على كولة علي الشرقي ألله يرحمه ويرحم موتاكم (( قومي رؤوس كلهم .. أرأيت مزرعة البصل )) , فكل واحد يشوف نفسه هو أبو الأمة , تكلهم يا جماعة تره انتوا افتهمتوا الديمقراطية بالمكلوب , وافتهمتوا الفيدرالية همينه بالمكلوب , فلا الديمقراطية بهالشكل ولا الفيدرالية هم بهالشكل , والحقيقة احنا ضيّعنه الخيط والعصفور .
وكلما أريد أفتهم شنو الربط بين إقرار قانون الموازنة العامة للبلد الي يعتمد عليها البلد بكلشي وبين مناقشة الوضع الأمني بالرمادي , ما جاي أوصل لنتيجة , زين عمي رئيس مجلس النوّاب هي الموازنة للمالكي وحزب الدعوة لو لكل الشعب العراقي ؟ زين بروح ابوك هاي الموازنة الي ما ترضه تحضر وتناقشها , ما راح تنعكس أثارها على أهل الرمادي والموصل وصلاح الدين الي أنت ناصب نفسك محامي عن حقوقهم وتكول أحنا السنّة مهمشين , لو لا ؟ وباجر من تتوقف الرواتب والإعانات والخدمات عنهم ما راح تهيّع وتصرّخ وتكول تعالوا الحكونه المالكي قطع عنه الرواتب مثل ما مسعود هسه يهيّع جدام العالم ؟ لو تفك جيسك وتنطي للوادم رواتب من عائدات الحصن مالتك ومالت أخوك ؟ عيني حجي اسامة هاي الكلاوات مال السختجية الي تسويها أنت ومسعود ما راح تعبر على الشعب العراقي , والشعب زين يعرف كلاواتكم انت والسختجي مسعود .
زين وإذا ربعك شاردين وما يرضون يجون للبرلمان ويشّرعون قانون الموازنة العامة الي هي قوت الشعب , هاي رواتبكم ومخصصاتكم وامتيازاتكم الي تاخذوها من أموال الشعب حلال ؟ من عساها انشالله زقنبوت ببطونكم , أي ولكم انتوا ما تستحون على شرفكم وغيرتكم تجوعون أبناء شعبكم , من سليمه الكفرفتكم واحد واحد وخلصتنا من شكولاتكم الزفرة , صارلكم أربع سنين تبلعون بهاي الرواتب والمخصصات والامتيازات وعايشين بهاي الفخفخه , شنو هي القوانين المهمة الي شرّعتوها بله ؟ شنو شرّعتوا قانون النفط لو قانون الأحزاب السياسية لو قانون المحكمة الاتحادية لو قانون مجلس الاتحاد لو باقي القوانين المهمة المعطّلة ؟ أشو الحمد لله لا هدّه ولا سدّه , فبعد على شنو شايخين على الشعب وما ترضون تحضرون و تشرّعون للوادم قوتهم وأكل عيشهم .
والله الي ما تلتم أطرافه هذا الكلام الي جاي اكوله مو دفاع عن المالكي ولا دفاع عن سياساته , لكن جلمة الحك لازم الواحد يحجيها حتى لو على كص ركبته , والي كاله المالكي بمشروع قانون الموازنة لهاي السنة , أنه شخصيا يامه شتّمته لأن ما جان يسويه , وكان لازم يسويه من زمان ويوكف بوجه الحرامي السختجي مسعود الي جاي ينهب نفط العراقيين , وكل واحد يكول أنه شريف وأبن هذا البلد لازم يوكف وي الحك ويكول حجاية الله , فمن يوكف المالكي بوجه الإرهاب وعصابات القتل والإجرام , المفروض كلنه نوكف وياه , لأن الإرهاب جاي يفتك بكل العراقيين وبدون تمييز , ومن يوكف بوجه مسعود وحرمنته ويكوله كافي بوك , هم لازم نوكف وياه وندعمه لأن هاي أموال كل العراقيين ومو أموال المالكي ولا أموال حزب الدعوة , وكافي بعد ضحك على الشعب , تره الشعب مو غشيم و الله وكيلكم مفتش بالتيزاب , خاف عبالكم اكو جم مخربط ما يعرف اشلون يشّطف روحه عباله هو مقشمر الشعب , عيب عليكم واستحوا على ارواحكم وكافي و روحوا شرّعوا قانون الموازنة العامة , وكافي بعد إهانه واستهانه بشعبكم .
