بس سؤال واحد، والجواب إجباري…خلي بهاي النقطة أصير دكتاتور وما أنطيكم فرصة عدم الجواب. والسؤال هو :
إحنا وين تأثيرنا في الصورة الجمعية الشاملة Collected Comprehensive Image للإنسانية !
ولا تگولوا سؤال جعفري أو تعقيد الكلام حتى القارىء أو المستمع يگول والله خوش سؤال مال واحد مثقف وفاهم ، مثل ما طلع قبل يومين واحد (مستشار) بوزارة الثقافة بتصريح، وأول كلمة گالها هي (الأيديولوجيات) مع العلم كان الكلام عن مهرجان الأكلات الشعبية، لا أيديولوجية ولا ميتافيزيقية ولا إنثيالات التماهي في التقوقع الإستنفاري، بس لأن هو (مستشار) في وزارة الثقافة فلازم الحچي يصير أيديولوجي ! وهو يعتقد أن بدء التصريح بكلمة (أيديولجيات) راح تنطي ثقل بإذن المستمع، ومن سمعت التصريح عرفت أن هذا (مستثار) وليس مستشار !
ونرجع للسؤال، وراح أحاول أنطيكم هنتات Hints للإجابة، بلكن ننجح حتى لو بقرار أو العبور إلى الجهة المقابلة من الجهل والدجل والشعوذة .
كل الدول والمجتمعات صارت تفكر شلون تترك أثر أو ضربة فرچة في الصورة الكبيرة للإنسانية، ومن أگول دول أقصد إللي فيها حقوق وواجبات وخطة عمل وإستراتيجيات، مو دول عشائر وگعدات فصل وصحوات ودول بعد بيها شيخ العشيرة أقوى من القانون أو دول عصابات المرتزقة في أفريقيا أو دول (جمهوريات العوائل) الأسيوية والأفريقية وقريباً حتى الأمريكية بعد ما قرر الأخ الثاني لجورج بوش الدخول في سباق الإنتخابات وأعتقد هيلاري همين تفكر بنفس الشي وميشيل أوباما تريد تخلي راسها براس هيلاري حتى يصير أمريكا تحت ثلاث عوائل رئاسية لمدة خمسين سنة من تاريخها الرئاسي أو أكثر !
الدول إللي بيها عقول تفكر وتهمها تترك أثرها وضربتها في اللوحة الجميلة للإنسانية، نشوف ونقرا شلون تحاول وبمنافسة شرسة تسوي شي لإسمها ولسمعة شعبها، حتى أي واحد من منتمي لأي دولة من هذه الدول من يطلع برة ويگول آني من الدولة الفلانية صاحبة ضربة الفرچة الفلانية في صورة الإنسانية الكل يحترمونه مو يعفطون ويتفلون بگصته إللي بيها طمبغة البيتنجان، مثل حالتنا من نروح ونوصل عد أي نقطة تفتيش بأي مطار بس يشوفون الپاسپورت مالتنا أول شي يسوي ضابط الجوازات  يسد خشمه حتى لا يشم ريحة الفساد من الپاسپورت المضروب، لأن إحنا صاحب أقذر ضربة فرچة في صورة الإنسانية، ضربة خربطت الصورة وطلعونا برة وبعد ما أحد يريدنا نشارك في رسم الصورة، ضربتنا چانت باسوأ أنواع الفرشاة وبأبشع لون وبأيادي بعمرها ما عرفت شنو معنى الجمال الإنساني وشلون يرسمون الجمال الإنساني.
اليابان، وعلماء اليابان يفكرون شلون يخدمون الإنسانية…وشوفوا هذا الخبر راح يساعدكم في الجواب على السؤال إللي سألته ببداية المقالة. والخبر نقلاً عن برنامج يقدمه مورغان فريمان على قناة ديسكفري ساينس إسمه (الكون من خلال الثقب الدودي) Universe Through Wormhole والموجودة حلقات كاملة منه على اليوتيوب لمن يريد الإستفادة من اليوتيوب مو بس يروج يدور بزغ ورگص ومواويل وريال مدريد وبرشلونة وقطع رؤوس ونكاح المصافحة والمصالحة  .الخبر هو: إن باحثاُ يابانياً في علم الهندسة البايولوجية (هذا العلم بعده ما واصل يمنا) توصل إلى ان لكل حركة في جسم الإنسان لها شرارة كهربائية معينة، وبدراسة هذه الشرارة صمم هذا الباحث جزمة  كمرحلة أولى من مشروعه، وبهاي الجزمة أكو متحسسات تقرا الإشارة والشرارات الكهربائية وتخزنها. وهنا الفكرة !! إجى واحد يمشي مشية تخبل، طول وإستقامة،  والباحث طلب منه بكل أدب أن يلبس الجزمة . لبس ومشى بيها ! والجزمة قرت وخزنت بذكراتها الجزمة الشرارة الكهربائية مال حركات رجله. وبعدين إجى الباحث وطلب من واحد شلل (وهمين بكل أدب وإحترام خصوصيته وإنسانيته) صار له أكثر من عشر سنوات مشلول، طلب منه يلبس هاي الجزمة، طبعاً ما كو غسل ولا ريحة جواريب لأن اليابانيين شعب نظيف مو مثلنا واحدنا ما يغسل جواريبه إلا من تصير ريحة جواريبه  مثل ريحة بطاطا خايسة ! المهم هذا المشلول لبس الجزمة وبعد بس چم جلسة گدر يمشي بعد ما إستخدم المعلومات المخزونة في المتحسسات الموجودة بالجزمة، يعني تماماً گام يمشي مشية مستقيمة ولا عبالك صار له سنوات شلل ! ويگول الباحث إن هذا التصميم والإبتكار راح يخلي كل البشرية مسقبلاً عدهم نبوغ بالشيء اللي هم يختارون، مثلاُ إذا ندفع چم مليون دولار لميسي أو رونالدو (أو تقدم رونالدو على ميسي بحسب نوع النادي إللي تفضله) ونطلب منهم يلبسون هاي الجزمة في لعبة وحدة راح تنخرن كل مهاراتهم بذيچ اللعبة، ونجيب هاي الجزمة ونلبسه لأكثر لاعب من صفة ثلاثي الدي Triple D  وإللي هو (دچة دثو دبنگ د.د.د) في الدوري العراقي لفرق الدرجة الرابعة  راح يصير بنفس مستوى ميسي ورونالدو بذيچ اللعبة ! ومستقبلاً يحاول هذا الباحث تصميم چفوف حتى أي واحد يريد يصير رسام راح يروح يدفع چم ألف دولار لأي رسام ويطلب منه يلبس الچفوف وبعدين ياخذها ويلبسها راح يرسم بنفس مستوى الرسام المحترف.
هيچ الناس تفكر وهيچ الدول تريد تترك بصمتها على الإنسانية، مو بعلم نتف العانة وتخفيف الشارب وتقصير الدشداشة وأكل الصوصج حرام للنساء لأن يثير غرائز شهوانية معينة بسبب الشكل والملمس والطول ! إحنا بعدنا ضاربين على الدماغ قفل نتوارثه من آبائنا وإللي ورثوه من أجدادهم وتركوا المفتاح عد ناس إنگبروا من مئات السنين وألف وألفين سنة، قفل حتى موديله ماكو منه ! قفل تزنجر وهسة ماكو طريقة لفتح الدماغ إلا بكسر القفل وبهاي الحالة الجمجمة همين تنكسر وكل شي ما سوينا ! بمعنى هذولة المقفولين بعد ما بيهم چارة لازم نشوف ناس ما عدهم إستعداد يورثون القفل عن آبائهم ! والمشكلة إذا تطلع وتگول هالشي ألف واحد يلعنك وخمسة ألاف واحد يكفروك، وعشرة ألاف واحد مستعدين يبولون على قبرك إذا محظوظ وعندك قبر مو تصير لگمة بحلگ چلب متربي على قال فلان عن فلان وعن فلان ..والحقيقة فلان وفلان وفلان…أسماء وهمية في تاريخ مليء بالكذب.
هسة أكيد راح تعرفون تجاوبون عالسؤال، وبعد ما تجاوبون تگدرون تروحون تكملون نقاشكم ومساهمتكم في تاريخ البشرية ودوركم الإنساني، وتكملون نقاشكم المؤثر : يا نوع دومينو هو مال الزلم الخشنة ؟ الأزنيف لو العدلة ؟!
[email protected]