عدنا وزير دفاع يقلد جون واين ، حركة راسه، وإستعراضاته، وقمصلته، ويجوز بمسدسه همين بس إحنا ما نعرف ولا شايفين هذي اللقطات الجون واينية العبيدية من يستخدم المسدس، وزير دفاعنا وزير مال مناسبات عائلية، يعني فوگ ما ينطوه أبنية يسووه وزير، شلون بخت، يابة منو ترشحون يصير وزير الدفاع ؟؟؟ والله عندي رجل أختي گاعد بلا شغل، ويشبه جون واين ويحب التلفزيون والمسلسلات المدبلجة…شنو ريأكم ؟؟؟
وهيج صار وزير دفاع…وما مصدگ بالهدية التوافقية إللي جت له في غفلة أو تفلة من الزمن عالگصة. وشلون ربك جابها وي الدعشنة والفلتنة مال الجيش، صاحبنا كل ساعتين يشرب كوكتيل هوسات ويلطع يهوس ، أي طبعاً لأن ماخذ دعم من أسامة الهوساوي، أي لعد شعبالكم إحنا همين عدنا أسامة الهوساوي مو بس المنتخب السعودي، وهوسة على هوسة، بعدين أنطيكم بوسة. وتدرون..شاف ما شاف شاف داعش، وتهستر.
بابا…هسة الجيش ما محتاج عنتريات ولا إستعراضات تلفزيونية، هسة محتاجين شغل، مو شيلني وأشيلك وي أبو النسب، ترى الشغلة صارت ما تنلبس عليها لا جواريب ولا قندرة ..بكيفك تريد أگول حاشاك لو لا، أنت براحتك. ولك بدال ما مچثر طلعاتك التلفزيونية ، چثر طلعاتك القتالية، الأوطان ما تنبنى بالهيوات ولا بالعنتريات ولا بالنجيفات، الأوطان تنبنى بالشغل والحرص، مو كل يومين أوزع إكراميات لچم مراسل نص ردن أو مراسلة نص أتك وتعالوا عندي قبض أريد اصرح و أريد أطلع بالتلفزيون. أصلاً نص الشاشة مخصص لچهرتك …أدري ربي ما أعرف شرايد من عدنا ! يعني لو عتاب الدوري تصير وزير الدفاع
(المناصب ما بيها مذكر ومؤنث) لو هذا عريس الغفلة إللي هو ووزير الداخلية جوي للدنيا…أقصد الدنيا الوزارية بسلة بيض وحدة، أي مو نفس الدجاجة جابتهم ، رغم ما نعرف منو الديچ العتوي الأب الشرعي لهاتين البيضتين. خو ذاك اللاخ…هم طائرة هم سلة، الناس صارت أشلاء بالشوارع والأفندي يروح عنده إجتماع حزبي، أخاف ما دافع إشتراك الماي والكهربا ! وشلون عيون ناعسة، عبالك إلهام شاهين في لحظة خاصة – راجع فلم الهلفوت لمزيد من الإيضاح وإتحدى أي واحد يباوع عليه لمدة عشر دقاق وسبع ثواني وما ينام، وأكيد هي هاي الموهبة إللي خلته ياخذ منصب وزير الداخلية لأن منوم مغناطيسي رباني .
يا دفاع يا بطيخ يا حامض حلو يا شربت يا داخلية، أشو محد يحارب غير المليشيات بمختلف تسمياتها، بيشمركة مليشيات حزبية، لا تگول لي قوات ضمن منظومة الدفاع، سلم لي عالدفاع وگول عدنان درجال بالطريق ولا يخافون، و الجيش الشعبي بالنسخة الجديدة أسمه الحشد الشعبي وطه ياسين رمضان بالنسخة الجديدة هادي، بس صدگ هم دوا دواعش وأبطال في السياق العام (شلون كلمة خطيرة)، وإللي نسمع هيچ وهيچ ترى بكل حرب أكو إنتهاكات وإحنا ما نختلف لا عن ألمانيا النازية (شفايد إلنا) ولا عن إيطاليا الفاشية ولا عن قبائل الهوتو والتوتسي المتحضرين جدأ إللي نحلم….إي نحلم نصير مثلهم لو بعد خمسين سنة، ولكم الهوتو والتوتسي إللي ذبحوا بعضهم وخلال شهور فوگ ملايين ملايين الناس إنذبحوا، تالي گعدوا وصاروا رومانسيين وأوادم ويگولون حتى بفالناتين يتعايدون وبوزعون بيناتهم تيدي بير شايل گلب آي لاف يو، ولكم أنتو ما تحلمون تصيرون مثلهم.
لا وشوفوا من يطلع هذا وزير أبو النسب، وزير الدفاع، ياخذ راحته عبالك گاعد بچيخانة، والمصيبة هو نفسه من إستلم الوزارة گال ما أحب الإعلام ولا التلفزيون ولا التصريحات، يا حظي …الظاهر الأخ ما يعرف شنو معنى الإعلام ولا بحياته شايف تلفزيون لو مفتهم غلط، لأن هارينا مقابلات تلفزيونية وتصريحات إعلامية لو أكو تغيير في وقائع الكلام، ومو بعيدة أكو فساد إعلامي، لأن الفساد علامة مسجلة لأثير (هو أسمه أثير بس ما يگدر يگول حرف الراء صار أثيل) وأسامة الهوساوي العراقي مو السعودي لا تسوونا مشكلة دبلوماسية وي سلمان بن عبد الطفيس…بابا كافي…أو أنطيكم أوقتوراح… شنو رايكم تنطونا أوقات إللي تطلعون بالتلفزيون حتى نحترم التلفزيون وما نتفل عالشاشة، ونسده قبل ما تطلع ونروح نلعب دومينو لحين إنتهاء العذاب الإعلامي…هل أنتم موافقون بابا ؟
يمعودين…يمعودين رجاءاً رجاءاً ماكو عدنا معهد إعداد مسؤولين لو وزراء؟ هسة قبلنا وزراء محاصصة ومخاصصة ( من الخصوة) ، الهم منك وإليك، ما إلنا دخل بالدستور، بس هم نمون عليكم ونطلب بلكي معهد لإعداد المسؤولين والوزراء، كل مسؤول أو زير يروح بالشهر ثلاثة أيام دورة تأديبية يعرف شلون يتصرف ويصرح وشلون ياكل حامض حلو باليمنى…ويقدم في اليد الاخرى التبن للشعب الصامد. والله يوفج الجميع .
