كاكة مسعود يريد يسوي ويانه مثل ما سوّه افنيخ وي اخوته , يعني يتجاسم ويانه الحلال على طريقة افنيخ ( واحد بمطي وعشرة برحل ) , هذه هي جسمة افنيخ الي يطالب بيها كاكه مسعود , فكاكه مسعود يريد 17% من واردات نفط البصرة والعمارة , ويريد الحكومة تدفعله رواتب البيشمركة ونفقات تسليحها , ويريد الحكومة تسكت وما تفك حلكها على النفط الي يسرقه من حقول كردستان ويبيعه بالسوق السودة , ويريد الحكومة ما تطالبه بواردات المنافذ الحدودية , ويريد حصته من المناصب السيادية في الحكومة والبرلمان , ويريد رواتب وتقاعد وامتيازات لربعه الي في بغداد , وهو ما ينطي ( قزلقرط ) للحكومة في بغداد , وكل هذا ويطلعلك واحد سرسري مثل مثال الآلوسي على قناة البغدادية يكلك المالكي ما عنده أخلاق ويحارب الأكراد بلقمة عيشهم , بله بشرفكم هاي شنحطلها وطيب ؟ , والاتعس من كل هذا يطلع نيجرفان البارزاني يهدد الحكومة العراقية بالسيطرة على نفط كركوك والأنبوب المار إلى تركيا , بشرفكم اشلون وكت هذا الي يخلي نيجرفان يهدد الدولة العراقية ؟ , وجمالة يهدد بالانسحاب من العملية السياسية وتقرير المصير ويصدّر نفطه على راحته إلى تركيا ( عود هو هسه ما جاي يصدّر نفط ويبيعه بالسوق السودة ) .
بويه كاكه مسعود إذا محد يحجي وياك ويردّك من الحكومة , أنا أحجي وياك وبالحسجّة الفراتية , ونت تدري كلش زين أحنا أهل حسجّة وما نقبل بالعايلة , فإذا تكول أنا عراقي والعراق هو بلدي وأنا مستعد أعيش وي اخوتي العراقيين وحالي من حالهم وعلى الحلوّة والمرّة , والله يعمي نخليك على روسنا , وإذا تريد تسوي ويانه مثل ما سوّه فنيخ وي اخوته , لا والله راح نوكف عظم بزردومك , وإذا أنت كاكه حالم بدولة , فإحنا نكلك روح عمي موّدع بالله ومحمد وعلي , وما راح نكلك مثل ما كال عبد السلام محمد عارف لبوك الملّة مصطفى الله يرحمه , وإذا تريد تنفصل وتسوي دولة كردستان العظمى الي تحلم بيها , فخلي نتفاهم بهدوء وبدون شوشرة ولغوة وكلمن ياخذ حقه وبدون أن توكع قطرة دم وحدة بالكاع , وإذا تكول الظروف هسه متسمحلي أسوي دولة , فهذا مو معناه تلعب بكيفك شاطي باطي وتضرب القوانين بكالتك , وخاف عبالك أكو جم سرسري ولوكي مستفادين منك وكاعدين عندك ويطلعون بالفضائيات ويكولون المالكي ما عنده أخلاق , فصدكني هذولة محد يشتريهم بكالة عتيكة من العراقيين , وإذا انت جاد بحل كل المشاكل تعال لبغداد وكول لخوتك العراقيين بويه أنا جاي وحالي من حالكم والنفط الي بكردستان هو نفط كل العراقيين , والحكومة هي الي تتصرف بيه وتبيعه مثل ما يكول الدستور .
وعوفك من هاي تهديدات المزعطة , وإذا عاجبك تركب راسك وتسوي نفسك ابو جاسم ذر , روح سوي الي تكدر عليه , والله لا يرضه عنك إذا ما تسويها , كافي بعد كاكه مسعود ملينه ولعبت أنفسنا , كل ما نريد نجيبها وياك الراس عد الراس ما جاي تلكح , إذا ما تسلم كل النفط للحكومة وتبطل البوك والحرمنة , والله ما راح تقبض درنوح من الموازنة , وعيب هذا الي تسويه وي العراقيين , وتذكر ولا ياخذك الزهو والغرور , هذا العراق كاكه مسعود , والعراقيين ميقبلون ينامون على ضيم , فلا تغتر ويركبك الشيطان , تره ما تلوم إلا نفسك .
