رصدت كاميرات الحجي گوگول ألاف من البشر في الدول التعبانة مثل النمسا وألمانيا وطايحة الحظ السويد والنرويج وهم دا يتوجهون إلى السفارات العراقية بهاي الدول إللي الله يكون بعون سفراء العراق شلون عايشين بالضيم بهيچ دول وما يطلبون نقلهم إلى ظروف احسن .
هذولة الناس شافوا الضيم من پارلماناتهم إللي بعيدة تماما عن أمنيات المواطن بهاي الدول، وبعد ما سمعوا إن الپرلمان العراقي قريب جداً من الناس إلى درجة ماكو مواطن عراقي ما عنده بالبيت صورة لنائب پرلماني أو نائبة پرلمانية حتى تكون هاي الصورة سبب لبركة وزيادة التفلة بالحلگ لزوم هضم الأكل بصورة صحيحة مو لغير شي أدري بيكم نياتكم غير شكل، وإنما الأعمال بالنيات وإنما لكل إمرىء ما نوى من تفلته.
الپرلمان العراقي جاب الذيب من ذيله وعرف سر الرفاهية وسر التقدم، بعيداً عن نظريات الإقتصاد ومنطقة اليورو والانكماش الإقتصادي وإنهيار البورصات وسعر الفائدة والإستثمارات، كل هاي الامور طلعت ما إلها أي فائدة ، أصل الرفاهية والتطور هو العطلة، as higher holidays rate as higher prosperity and development rate كلما زادت أيام العطل في التقويم السنوي للدولة كلما كان معدل التطور ومعدل الرفاهية بالدولة عالية أعلى من ضربة الجزاء إللي لعبها راموس والطوبة راحت وضاعت إلى درجة إن من أهم أسباب قفزة فليكس الجبارة كان إمساك ذيچ الطوبة إللي طلعت برة الغلاف الجوي بحسب أبحاث مركز تطوير ضربات الجزاء في نادي برشلونة.
وخلال اليومين الماضيين، دخلت كل سفراء العراق بالدول الأوروبية واستراليا وكندا وأميركا في حالة من الإرباك بسبب الطلبات إللي دا تجيهم من المواطنين من هاي الدول للجوء إلى العراق للتمتع بالاداء العالي للپرلمان العراقي وحتى يصيرون مواطنين عراقيين حتى لو من الدرجة العاشرة، عييييييييييع عراقي من أبوين أوروبيين بالولادة أو من أم أسترالية وأب كندي…اوووووووووووووي شي يجرع هيچ عراقي مضروب.
وتلقى معالي هوشيار رسالة فيسبوكية من السيد بان كي مون يترجى فيها بتقليل أداء الپرلمان العراقي لأن إذا أستمر بهذا الاداء العالي راح تصير هجرات بمعدلات عالية جدا إلى العراق وراح يصير خلل في مركز ثقل الأرض وإحتمال تطيح الكرة الأرضية في غياهب الفضاء…إي أستخدم بان كي مون كلمة (غياهب) بس المشكلة أن معالي هوشيار صار له يومين دا يدور بالقاموس على أصل هاي الكلمة ومدى توافقها وي السياقات الدبلوماسية ودا يدور على كلمة مناسبة للرد بالمثل بمستوى كلمة (غياهب).
الپرلمان العراقي اداؤه على مستوىً عالي (تنقري بالتنوين هكذا: على مستوى نعالي) والكل يشهد على هذا المستوى النعالي. ترك الناس إللي عقلهم على گدهم عبالهم المشاكل هي الراتب وخط الفقر وشبكة المجاري والهواء النظيف والماي إللي ينشرب، الپرلمان العراقي هالگد راقي إلى درجة عاف الناس بحالها، الناس دايخة، بس الپرلمان العراقي يحب العمل بهدوء إلى درجة أكو جلسات يتطلب هدوء بحيث ما يحضرها غير عشرين نائب أو نائبة بيهم بركة، إشتغل هذا الپرلمان لمصلحة المواطن العراقي خاصة ولمصلحة البشرية عموما لأن إحنا يربطنا المصير المشترك وي السويد والنمسا والنرويج والدنمارك.
الپرلمان العراقي إللي أول بارحة طلع إلنا عباس البياتي وبشر الشعب إن الحضور تجاوز 180 نائب ونائبة ولأول مرة، يعني نرگص بچفية إذا نسبة الحضور لجسلة پرلمانية 55% من أعضاء الپرلمان، بس ترى الكل يأخذون الراتب والمخصصات وحتى بدل ماي الشرب والپيپسي ولفة فلافل من كافتيريا الپرلمان حتى لو ما يحضر لأن الحق حق ، الپرلمان بدورته الحالية يمكن صار له ثلاث سنوات، وأول مرة تتجاوز نسبة حضور المتفرجين 55% من الطاقة الإستيعابية لمدرجات ملعب الشعب، إي هم ممثلي الشعب؟؟؟ ومو السياسة هي لعبة مثل ما يگولون؟؟؟ أي لعد خليها نسمي قاعة الپرلمان بملعب الشعب ونفضها.
الدول التعبانة إللي كاتلتها ساعات العمل والأوفر تايم واحيانا حتى العمل من غرفة النوم، هذولة دا يريدون يتحررون، وقدموا طلبات للسفراء العراقيين يا إما تحچون وي حكوماتنا ونتعلم منكم ويا إما تقبلونا لاجئين عدكم مثل ما قبلناكم لاجئين عدنا أيام الخير وهسة أكو مشاورات بإرسال أعضاء من الپرلمان العراقي إلى هاي الدول التعبانة لتعليمهم شلون يهتمون بمشاكل مواطنيهم وإعطائهم دورات ويگولون راح تتوجه مجموعات نسوية كلش كشخة لهاي البلدان لان هن الوجه الباسم للپرلمان العراقي، مجموعة مها الدوري، ومجموعة بقيادة حنان الفتلاوي، ومجموعة بقيادة وحيدة الجميلي ومجموعة بقيادة عالية نصيف (بشرط تروح حافية) ومجموعة بقيادة ناهدة الدايني أم الشفايف البطة. وهاي المجاميع المختارة بدقة وبمواصفاتٍ عالية (همين تنقري بالتنوين مواصفات نعالية) مهمتها تعديل مسار الپرلمانات بهاي الدول التعبانة وتعديل محور الأرض بحسب طلب السيد بان كي مون.
تحية للپرلمان العراقي …إللي يهتم بالعائلة، يعني إذا أبو البيت موظف بالدوام وأم البيت موظفة بالدوام منو راح يظل يم الجهال وهذولة الجهال شلون راح يتربون، وإحنا نعرف من درس الوطنية للصف الخامس في مدرسة القديس يوسف أن الأسرة نواة المجتمع، والمجتمع أساس الوطن، فأحسن حل، الأب والأم يظلون بالبيت، عن طريق إعطاء عطل وزيادة أيام تعطيل الدوائر والمدارس حتى الجهال همين يظلون بالبيت وي ماما وبابا، والكل يقضون أوقات حيل جميلة وهم يستمتعون بصوت المولدة والكل يتشاركون في مسابقة معرفة نوع الإنفجار من يسمعون الصوت، بابا يگول هذا هاون، ماما تگول لا هذا الصوت مال عبوة لازگة لأن هي لزگة وتعرف، والولد يگول لا هذا أر بي جي 7 لأن هو من مشجعي نادي ريال ومعجب بـ (رونالدو) أو آر سي 7، والبنت تگول لا هذا الصوت مال هجوم بالرمانات لأن هي خبيرة بالرمانات وكلش تعرف أسرار (الرمانات).
والله الدنيا دوارة، ودارت على ألمانيا والنمسا والسويد والنرويج، وراح تشوفون، همين راح يجيهم يوم وتصير عدهم إنتفاضة شعبانية، وهمين راح يحتفلون بسقوط الطاغية، بس صبروا أشوية حتى الپرلمان العراقي يقود العالم إلى الخلاص.
[email protected]
