الأسبوع الفات سجل مقياس القشمرة عندي أعلى قراءة منذ إكتشاف إصابتي بفيروس القشمرة قبل سنوات بعيدة، وهذا الفيروس خبيث خباثة مبادرة أربيل لان ما تحس الفيروس  موجود بجسمك إلا وأنت صاير قشمر فوسفورة ونخلة وشوارب – يعني أصلي.
وشنو إللي صار وخلا مؤشر القشمرة هيچ مرتفع؟
إليكم التفاصيل:
إيميلين..كل إيميل من مصدر مستقل ومحايد ومن جماعة عدم الإنحياز في المجتمع العراقي، لا إنحياز سياسي ولا ديني ولا إلهم دور في الصراع التأريخي بين الخيار الطرح والخيار التعروزي لأن كل واحد يگول هو المقصود بالخيار الدستوري. جماعة عدم إنحياز سياسي ما إلهم لا شحاطة ولا نعل في الركضة السياسية الحالية نحو باب المراد الوزاري بحسب يانصيب المحاصصة.
والصدفة المباركة خلت هالإيميلين واحد ورا الثاني في الإنبوكس مالي. ويا فحل أفتح الإيميل الاول، وأشوف لك السيد القايد إللي نشوفه كل مرة متنكر بملابس الفقمة لأسباب أمنية بس هالمرة بالإيميل شفته نازع جلد الفقمة ، ودا يقلد كافي تومينا في برنامج لك يا سيدتي، أو شيف أسامة أو شيف رمزي أو شيف أنطوان أو مطبخ منال العالم أو قناة فتافيت  أخاف الأجيال الجديدة ما لحگوا على الست كافي تومينا وما يعرفوها وعبالهم ممثل إيطالي أو ماركة عطر فرنسي فاخر. السيد القايد داخل المطبخ وجايب باسطرمة وثارمها بيديه الشريفتين شرف ناهد شريف بحضن عزت العلايلي قبل ما يصير سعد بن ابي وقاص في القادسية من ضحك هو وصلاح أبو سيف على تاجر النعلان وباعوه فلم نص استاو بچم مليون دولار. على أساس جابوا أفيالة حتى يذبحهن القعقاع قبل إكتشاف الخدع الكمبيوترية والخدع الإنتخابية والخدع السياسية. المهم خلونا بموضوعنا..إي…السيد القايد ومثل ما تعرفون يصرف طاقة هواية لأن الظاهر محتاج تجفيت وماحد مهتم يجفته فصاير الگازگيت يعبر هوا ويبوگ مصارف ..العفو يبوگ هوا ومن دا يبوگ هوا يصير الإحتراق غير كامل ويصرف طاقة هواية ولازم يعوض بالباسطرمة رغم إن بكل فتاوى الحوزوية والحائرية ماكو ذكر باسطرمة ولا أحد من جنود القايد يتجرأ يسأله مولانا هل الباسطرمة حلال أم حرام، ولو الأحوط ترك أكل الباسطرمة لأن شكلها ثير الشهوات وكذلك لمس الباسطرمة فيه شبهة كثيرة خاصة إذا الخيط مال الباسطرمة طالع وممكن دغدغة المشاعر والمناطق الحساسة مثل مبنى المخابرات أو مدخل أمانة سر القطر، ولهذا السبب نشوف السيد القايد هو إلللي دا يثرم الباسطرمة ويگلليها بالطاوة الحيدرية حتى يبعد الشبهة عن آل بيته الكرام الأطهار طهارة ما صايرة (أرجو أخذ معنى كلمة الطهارة بحسب المفهوم البغدادي وليس المفهوم الفقهي لأن آني ما أفتهم بفقه نتف العانة ولا أفتهم هذا العلم العجيب إللي ينزل بالمقياس والقطارة على العباد المصطفين الاخيار…خيار بصف خيار بنية صافية وبلا تحرش خياري).
السيد القايد ياكل الباسطرمة بلا بيض حتى تسلك المسائل إللي عنده وتتزيت زين بزيت الباسطرمة، وبعد ما اكل المقسوم..نام السيد القايد نومة يا الله عبالك باندا بحضن أمه…شنو هالبراءة والوداعة …ياييييييييييييييي يئبرني شنو  مهضوم..تروح لك فدوة بوس الواوا.
وبعد هذا الإيميل…رحت بحركة رشيقة للإيميل الثاني….دكتور بعلم البيئة يثبت للعالم المتخلف شلون واحد يهتم بالبيئة السياسية والغابات الأمازونية وحتى المحاربات الأمازونيات بحسب مصدر حيل مطلع على غرفة نوم هذا الدكتور البيئي إللي هو رجل صالح للإستعمال الخارجي جدا إلى درجة أن صلاحه مطلق أو المطلگ بالجلفي ، هذا الرجل والدكتور صالح للإستعمال الخارجي ومطلق اللغو في الحرص على البيئة السياسية وبيئة الغابات حتى يثبت للعالم أن هو مو بس كلام وشهادته مو بس ورقة عالحايط مثل عيادات الاطباء إللي واحدهم يحضر إجتماع نص ساعة ويگص الخبر من الجريدة ويخليه بچرچوبة على حايط عيادته…هذا الرجل مو مثل الأطباء…هذا قول ونعل…أقصد قول وفعل إلى درجة أن شايل الإنجاز البيئي مالته وياه…ومن كثر ما يردد كلام السعودية ومصر تعب فجاب ببغاء يجلس وياه بالإجتماعات حتى الببغاء هو إللي يردد كلام السعودية وشعارات ووعود إنتخابية وبعدين ببغاء مكاو هو رمز لحماية البيئة السياسية مثل ما حيوان الباندا هو رمز لصندوق حماية الحياة البرية، يعني واحد من يمشي وببغاء فوگ چتفه أكيد هذا إنسان متحضر وعنده إهتمام بالبيئة السياسية الخضراء ومدينتها الموجودة في بغداد على عناد كل دول العالم…المدينة الخضراء وليست المنطقة الخضراء مثل ما الغشمة يگولون عبالهم البيئة السياسية في الخضراء بس بمنطقة وما يدرون أن إهتمام القيادة بالعراق وعلى رأسها الدكتور الرجل صالح للإستعمال الخارجي ومطلق اللغوة نتج عدنا مدينة خضراء بكثر خضار دولاراتها وبساتينها وحدائقها وببغاتها…وما ببغاء الدكتور غير نموذج من الببغاوات الموجودة في المدينة الخضراء وهذا الببغاء ينافس حيدر إبن الملا أو مه حمود ئوصمان أو غباء الأعرجي أو أبو الگصة القندرية علي إبن شلاه من ألف رحمة على إيدك يا لؤي …هذولة هم أشهر ببغاوات المدينة الخضراء بس ببغاء صاحبنا الدكتور البيئي يتفوق عليهم لأن هو ببغاء بيئوي.
هسة عرفتوا ليش صعد مؤشر القمشرة عندي؟؟؟ وأكيد أنتو همين  راح تحسون أن فيروس القشمرة موجود بجسمكم…ومثل ما گلت ببداية مقالتي…أن فقط واحد يگدر يحس أن بهذا الفيروس من يشوف نفسه قشمر وماكو چارة للعلاج…وبين طاوة رئيس العصابة  وببغاء القرصان…تگدر عزيزي القارىء تعرف نفسك مصاب بفيروس القشمرة لو لا.
[email protected]