(بغداد)( X -1)

ضرب فيروس كللللللللللش خبيث أخبث من محمود أوصمان كمبيوتر مجموعة ميرسر للإستشارات ، والمشكلة أن خبراء الكمبيوتر والأنترنت مال هاي الشركة ما عرفوا أن هذا الفيروس دخل بالبيانات الخاصة بإختيار أفضل وأسوأ مدينة بالطوبة الأرضية من بين 200 مدينة عالمية وهذولة الغشمة سارعوا ونشروا نتائج البحث من غير ما يسوون فيروس سكانر على كمبيوتراتهم لأن الظاهر نورتون مالتهم صاير أوت أوف أبديت وما يشتغل أو كاسبرينسكي مالتهم نسخة شارع صناعة ما يشتغل غير ساعتين.
ومشكلة هذا الفيروس أن النتائج كلها تنضرب في المايناس وان أو (-1) .. الأول يصير الأخير، ولهالسبب قرينا وسمعنا أن بغداد أسوأ مدينة – حاشا لله – على وجه الطوبة الأرضية للمعيشة وفيينا هي الأحسن… والصحيح إن بغداد أفضل مدينة بس لو مو هذا الفيروس الخبيث إللي غير النتائج مثل ما تغير المافيا نتائج الدوري الإيطالي وتخلي يوفنتوس تخسر وي فريق نقابة البيتزا البايتة !
يعني أكو أحد غشيم يصدك أن بغداد هي أسوأ مدينة؟ معاذ الله هذا بهتان عظيم…لعد وين راحت أمانة بغداد إللي إنجازاتها أكثر من إنجازات المرحوم قاسم نافورة إللي ترس بغداد بالنافورات وبعدين إكتشف ماكو ماي بالرصافة، ويوم إللي راح يجيب ماي للنافورات من الثرثار غرگ بالماي !
وخطية أهل فيينا صدگوا بالتقرير المضروب وأحتفلوا بالنتيجة بإقامة أمسيات موسيقية لبيتهوفن وشوبارت وباخ وموزارت على المسارح التعبانة في فيينا، ما يستحون مصدگين بروحهم عدهم مسارح، وما شايفين ولا سامعين بمسارح بغداد إللي تتحول بدوسة دگمة بالدشبول إلى بارك مال سيارات وبدوستين يتحول المسرح إلى مقر حزبي.. شوفوا الأحزاب المثقفة مالتنا ما تسوي إجتماع إلا بمبنى المسرح…لأن كلها تمثيل مضروب وسخيف مثل تمثيل ماجد أبو حنچ.
بس إحنا العراقيين وأهل بغداد ما عبرت علينا النتيجة وتقبلناها بروح عراقية آبية (هاي كليشة أزلامية) لأن مللينا من المركز الاول ! شنو ماكو غيرنا على الطوبة الأرضية، وهمين ترى نريد نشجع فيينا الخربانة ومن لف لفها (هاي كليشة دعوچية) بلكن توقف حسدها وتبطل تضربنا بعينها الحارة إللي دمرتنا، هسة ليش الحسد والعين، إذا تريدون ندز إلكم فيكتوري تيم Victory Team مال أمانة بغداد …وداعة أكبر عمامة وكرش بالعراق كلها يومين وترجع فيينا مثل بغداد…بعد عليش الحسد !
وراح تگولون شلون عرفنا بسالفة الفيروس…والجواب كلللللللللللش سهل أسهل من مربع تكامل لوغاريتم أس جيب تمام تحت الجذر التكعيبي..لأن لوما فيورس والنتيجة چانت صحيحة وإن بغداد هي أسوأ مدينة على الطوبة الأرضية چنا نسمع أن محافظ بغداد – لا سامح الله – أستقال، أو إن أمين بغداد – كللللللللللللللللللش لا سامح الله ولا المرجعية  – قدم إستقالته بعيون ضفدعية باكية، أو إن رئيس مجلس النوام السيد صخامة يشيل چوالاته ويرجع للموصل…أو أن الرفيق العتيگ الدكتور طالح فهرنهايت (مو مطلق ديروا بالكم) رجع إلى الشعبة الأزلامية تائباً وهو يجر أذيال الخيبة والخذلان إلى درجة ينسى يردد القسم الحزبي من يدخل للإجتماع بعد غياب قسري…بس لأن كل هاي الإحتمالات ما صارت…إذن نتيجة تقرير مجموعة ميرسرمو صحيحة ولأن هاي المجموعة المتخلفة تستخدم برامج كمبيوترية بالمسح وتحليل النتائج…إذن أكو فيروس ضرب البرامج …وهذا الفيروس إذا يضرب الكمبيوتر يخليك تصدگ دا تشوف صورة براد بيت وإنت دا تباوع على صورة قاسم لعيبي !
عيوني أهل بغداد…يمعودين لا تهتموا بالتقارير الخاطئة إللي دا تروجها القيادة القومية لحزب الأزلام – فرع القيادة القطرية للنمسا لتدمير العملية السياسية الديمقراطية الفيدرالية الأقليمية العمائمية البارزانية العظمى والصغرى في العراق ابو الچروخ …هاي التقاير كلها خاطئة…ترى بغداد هي الأجمل والأفضل والاحسن…ولو كره أهل فيينا إللي عمرهم ما يصيرون أوادم ولا راح يشوفون خير…ومن وين يشوفون خير إذا الكهرباء بكل فيينا مقطوع…وما راح يگدرون يتفرجون على الخير في مسلسل حافات بغداد المزبلة…بالخير ! .