والله أحبكم بگد الزبل ! خرة بعرضه مكتبته مليانة كتب بگد الزبل، الشغل ما يوگف عنده حتى لو بگد الزبل، إحنا الخير عدنا بگد الزبل، أحلامنا بگد الزبل، مقابرنا بگد الزبل، أعداءنا بگد الزبل، خو خيباتنا بگد الزبل قاطين وثلاثة ولا تخاف تزيد للمية ، بوگاتنا بگد الزبل، الفساد بگد الزبل، شعاراتنا بگد الزبل جيب أچياس وتدلل، محللين بگد الزبل، قنوات فضائية بگد الزبل، عمايم بگد الزبل، طرابيش بگد الزبل، فتاوي بگد الزبل، مناسبات بگد الزبل، عطلات دينية بگد الزبل، عطلات وطنية (بكيفك على يا وطن أنت محسوب) بگد الزبل، الرشاوي بگد الزبل، الطسات بگد الزبل، الألغام بگد الزبل، عشاير بگد الزبل، تجار بگد الزبل، لجان تحقيقية بگد الزبل، هيوات بگد الزبل، دبات بگد الزبل، شعراء بگد الزبل، كتاب بگد الزبل، جرايد بگد الزبل ، نواب بگد الزبل، أحزااااااااااااب بگد الزبل، مليشيات بد الزبل، جمعيات بگد الزبل، داعش بگد الزبل، أصدقاء داعش بگد الزبل، خلايا نائمة بگد الزبل، زبالة بگد الزبل، مزابل …لا هنا عدنا نقص لأن مو بگد الزبل، لأن لو بگد الزبل چانت تگدر تستوعب كل هاي الزبالات بكل مكان، يا ناس عدنا نقص في المزابل جعلها الله في ميزان حسناتكم، تجي يوم القيامة شايلك مزبلة شكبرها، طبعاً رأسأ الميزان راح يميل جهة الزبل..
إحنا شعب متربين بالزبل والمزبلة، ياهو يفتح حلگه نشم ريحة زبل، حتى آني، مو أستثني أحد، كلنا شعب عدنا جينات وراثية وي الزبل، من هذا ما نگدر بلياها، نعامل كل شي عدنا على أساس أنه زبل، حياتنا زبل، سعادتنا زبل، عمرنا زبل، عيوننا ما تشوف غير الزبل، الدنيا حد الشوف حد الشوف زبل زبل…والگلب ينثر زبالة…والگلب ينثر زبالة..
العراقي يحمي حدود بيته بالزبل مثل مال الأسد أو النمر يعرف حدود عرينه بريحة بوله، هيچ يشمر الزبل منا ومناك، گاعد بالحديقة وخلص اللفة…والله…شمر الچيس من فوگ الحايط، أم البيت خلصت الدورة فتحت الشباك وشمرت الحفاظة للشارع، أم الجهال نظفت الوليد إللي عنده إسهال ، خو ما تخلي الحفاظة وريحتها بالبيت شلون يصير، وهناك تروح تشمرها بباب جارتها إلل عداوة وياها، الأكلة محمضة، ندير الجدر بالشارع، ماي الغسيل نطلعه للشارع، وكل ما زادت حدود الزبل زادت هيبة البيت، البيت إللي داير مدايره زبل الناس رأساً تعرفه…هذا البيت بيه خير بگد الزبل، ومن تريد تنطي عنوان إبد ما تحير : أول ما توصل للدربونة راح تعرف بيتنا من الزبل ! بس تصير المشكلة غير شكل إذا هذا العراقي صاحب الأمجاد الزبلية يعيش بعمارة بيها شقق…هناك راح تشوف ظاهرة كونية ماكو غير بالعراق، ظاهرة تدل على تحضر العراقي، أچياس مليانة زواع تنزل عليك وأنت توك طالع من باب العمارة، سطولة ماي مال الغسالة غاسلين بيها جواريب معفنة تندار عليك، چيس عبالك الصحن الدوار يجيك وتطشر منه بقايا يابسة عالتمن وي يتبسي بيتنجان وي سلگ مال الدولمة ، أي العراقي يحب يزبل على زبل، ومن يجي الليل، شكو شي خربان بالبيت بالطوابق العليا، تنزل بقدرة الظاهرة الكونية العجيبة إلى ساحة العمارة.
وطبعاً جماعة عبعوب أبو الدروب ما إلهم علاقة بالزبل المتساقط مثل القنابر مال الهاون ، قنبرة زبلية، حچينا گبل عن الفرق بين القنبلة والقنبرة، مو من تسمعون قنبرة ساقطة عبالكم هي أخت قنبر ساقط إللي سقطنا نينوى…عبعوب إختصاصه مو الزبالة الفضائية ، ماكو فريق عبعوبي يفتر على العمارات السكنية إللي صايرة تتباهى بزبالتها خاصة إذا زبل بيه مواد سايحة لو سائلة وتعال شوف حايط العمارة، صدگ صدگ زرق ورق.
خو يوم إللي ما يصعد الماي للشقق الفوگ، هاي سعادة ما بعدها زيادة، الخرية بالچيس ، و…شووووووووو…صاروخ خرائي، وإذا ما تصدگون روحوا شوفوا حيطان البنايات عبالكم محناية، بس غير نوع حنة، حنة چانت بالچيس بحسب التوضيح أعلاه (ما يصير نكرر مرتين نقدر مشاعركم ترى آني هم أفتهم بالزبل ولعبان النفس)!
بس آني كلش تفاجأت من طلع واحد كاشخ ذيچ الكشخة، وگاعد عبالك بيه بواسير ملتهبة، وگال :..إحنا قدما للمواطن خدمات بگد الزبل ! لأن بصراحة دوخني هذا التصريح…لأن كلش صحيح ومثل هيچ صراحة ما متعودين عليها من المسؤولين الزبالة إللي عدنا…مو !!
