لا أحد يتصور آني من الربع إللي يقرون غمامة (قمامة) بس يجوز من الناس إللي يسمعون الإستقلال إستغلال لأن كل إللي دا يصير بالعراق الفيدرالي تحت الإستقلال السياسي بالقرار هو في الحقيقة إستغلال سياسي بالقرار والإنفراد بالطوبة حتى بعد تسجيل الگول والناس تتوسل باللاعب إللي جاب الگول يمعود خلاص ترى إجى الگول…هسة عوف الطوبة…وهو يگول بالعباس ما أعوفها…إلا پنچر أو الطوبة تظل يمي للإنفراد الجاي …لو ألعب لو أخرب الملعب .
أي شي تلزگ وياه چلمة (المستقلة) هو بالأساس واجهة لمحل يجري فيه كل أنواع الإستغلال…إستغلال من الكرسي حتى الچايچي…الكرسي لممارسة سلطة التخويف على الناس..والچايچي إللي يجيب ويودي الاخبار من غرفة مسؤول إلى مسؤول إستغلالي حيل مستغل…قصدي مستقل.
والمفوضية (المستغلة) للإنتخابات من هاي الهيئات حيل المستغلة بالعراق الفيدرالي..فبعد تجربة الفروج الحيدري (فروج سوپر يقاقي من البيضة بحسب شهادة الدكتوراه المزورة بالزراعة) وقراره المستغل في الإنتخابات إللي فاتت للجهة إللي وعدت اكثر للقائمة إللي جاي منها هذا الفروج، مالت تصريحات المفوضية المستغلة للإنتخابات. وبعدين أعضاء ذيچ المفوضية إللي صارت هسة (سابقة) منو همّ؟ شوفوهم كلهم مستغلين.. العفو العفو اقصد مستقلين (ترى راح أخربطكم وأخربط نفسي بين المستقلة والمستغلة)؟؟ منو المهندسة أمل إللي استغلت منصبها المستقل ونست الإنتخابات وگامت تلعب لگو بالعمولات ومشاريع المقاولات…منو الفاضي العبودي (إي الفاضي…لان كلش فاضي وگاضي عمره بلكن يتعلم يشد الرباط بس ولا تعلم يطلع الياخة بجهة والرباط بجهة).. هذولة إللي ضربوا دولارات يابو دولارات على اساس يصير العد والفرز ألكتروني تالي الشعب المگرود أنتظر أشهر حتى إعلان النتيجة النهائية والكل شافوا شلون چان الفرز، على ضوء الفانوس…مو المفوضية حيييييييييييييل مستغلة…إي مستغلة لحد آخر دولار في ميزانية الإنتخابات…تالي يطلع الفروج زعلان لان ناطي عمولة مائة دولار….حبيبي…يا حرااااااااااااااااام .
هسة شلون تصير الإنتخابات مستقلة إذا أعضاء المفوضية تعيين مو إنتخاب…وإذا الأعضاء حصص مو كفاءة؟؟..لا بهاي الحالة تعذورني راح تصير مستغلة. يعني المفوضية السابقة رئيس المفوضية شهادة دكتوراه مزورة بالزراعة..لا جاي يم الإحصاء ولا گايل مرحبا لمعيار التباين، أو المهندسة الفاشلة أمل إللي ما تفرق بين المبادل الحراري والتبادل التجاري، او القاضي العبودي إللي ما يفرق بين الجنحة والجناية، بس هذولة صاروا اللاعبين الأساسيين في رسم الحكومة العراقية لأن هم هذولة إللي (أشرفوا) على الإنتخابات,, ونفس الشي هالمرة، أعضاء حصص…تعال يا فلان شيل الكوشر مالتك…وتعال كاكا شيل الكوشر مالتك…وظلت بيضاية فاسدة نخليها بالنص ونشوف منو أسرع واحد إلها…التركمان لو السريان…عابت هالمفوضية الحصصية…من هسة أگص أصبعي حتى ما أروح للإنتخابات ولا أشارك بالبعصة البنفسجية القادمة..خلي تصير بي إلتهابات ولا هاي الإنتخابات..وبيني وبينكم ترى الديمقراطية الحليوة ما تتحمل اكثر من بعصة بنفجسية…عوفوها بحالها كافي بلا ملحة .
أدري…ليش ما نروح ونتوسل بالاميركان ونجيب اعضاء صدگ مستقلين أميركان عيون زرگ ، ليش لا؟؟ مو رحنا وتوسلنا بيهم حتى يجون ويعلمونا الديمقراطية؟؟ يعني المنتوج منتوجهم وهم أدرى بطريقة عمل هذا المنتوج وشلون صيانته حتى ينطي النتائج المضبوطة. وإذا أكو أحد (شريف أشرف شرف) يعترض ويگول “هم الاميركان شعليهم.. هذا بلدنا وإحنا نحير بيه”…اتفل بعينه وأگول لعد من گلنا هيچ ليش گلتوا ما نريد هذا الديچ !…لا نريد ديچ يعوعي ويقاقي بنفس الوكت..وهذا ما موجود إلا بالمختبرات الاميركية.
وحتى المفوضية ما تصير (مستغلة) هالمرة همين..روحوا جيبوا أعضاء إستيراد ما عدهم مصلحة بالسوق العراقية ولا عدهم شركات مقاولات ولا عدهم قضايا إرهاب نخليها عالرف وملفات محفوظة تطلعها الجهة الخاسرة بوكت إعلان النتائج حتى تنگلب النتيجة ، ولا عدهم شهادات مزورة ينطون النتائج للجهة إللي وعدتهم بالتصويت على قانون إعفاء المزورين من الملاحقة وعدم طردهم من وظائفهم السلطوية…ولكم يا إللي ما تستحون 40 أف موظف حكومي بالعراق بشهادة مزورة!!..إي عدكم هالقرصاغ وي التزوير هسة زوروا القهر وخلوا يبين للناس فرح وسرور حتى لو بالچذب مثل لعبات عدنان القيسي وي جو فريزو إللي بعد زوال درجة السرية من وثائق المخابرات العراقية إكتشفنا إن كلها چذب في چذب…إستغلال الشعب الغشيم حد الغفلة.
والمفوضية المستغلة تجيب الإستغلال…وإذا سألت نفسك الأمارة بالسوء والكآبة وين راحت الإستقلالية بالقرار العراقي؟… أجاوبك وأگول روح شوف منو الجهة إللي جابت هاي الحكومة…حتى تعرف شنو إستقلالها وشنو إستغلالها…وحتى تعرف الفرق بين المستقلة والمستغلة…وأهنيك من كل گلبي المتقرح بالحزن من تعرف الفرق بين القمامة..والعمامة.
هسة عرفتوا جواب الفزورة؟؟ هي المستغــلة لو المستقـــلة؟؟؟
[email protected]
