إحنا مو مثل باقي خلگ الله إللي عدهم منطقة حساسة وحدة لو منطقتين، إحنا نمشي ونتعثر بمنطقة حساسة، أخبارنا مليانة مناطق حساسة، شوارعنا مناطق حساسة، جرايدنا كلها مناطق حساسة إلى درجة من نبلل صوابعنا حتى نفتح الصفحات وإحنا نقرا الجريدة تصير عدنا أمور فستوقية وحالة إنتصاب قنبر. طول اليوم، كل ساعة نسمع ونردد منطقة حساسة، يمعودين صار بينا عجز جنسي من ورا تشبعنا برؤية مناطق حساسة مكشوفة في مدننا البائسة حد الدفرة.
وتدرون المنطقة الحساسة يرادلها تعامل خاص، وأيادي رقيقة تعرف شلون تحل مشاكل المنطقة الحساسة، وتفهم شنو إحتياجات المنطقة الحساسة. ولأن مو كل واحد يعرف هذي الفنون ، صرنا نفقد مناطق حساسة، فقدنا الموصل والرمادي وگبلهن فقدنا أربيل والسليمانية ودهوك ( صدگ أكو مدينة بالعالم إسمها دهوك؟ أشو لا حس ولا خبر)، عبالهم التعامل مع هيچ مناطق حساسة هو مثل ما الواحد يمشي بالشارع وهناك صارت عنده ضرورة إستراتيجية بتعديل الأوضاع في منطقته الخاصة وتعديل مسارات خصاويه وسنترته، وبدون مواربة ( هاي كلمة مع السياق ) يمد إيده ويعدل المسائل العالقة باللباس وهو يحك المنطقة الحساسة گدام الناس عبالك شايل ورق سمبادة وخاصة في الصيف من تلتهب المناطق الحساسة وتنسمط سمط.
أيها العراقيون والمستعرقون
لقد منّ الله علينا بمسؤول حساس يحس بحساسيتنا وحساسة أموراتنا ومناطقنا الحساسة، ويمتلك إيدينات تعرف التعامل برقة وحنية مع متطلبات المنطقة الحساسة وين ما چانت ومهما كانت تضاريس الوصول إلى تلك المنطقة صعبة ووعرة، إيد ناعمة مثل الحرير بسبب ساحات الوغى وحمل الأسلحة والنوم تحت الچنكو وأكل مرگة هوا، إيدين مولانا العزيز سليل الأعزة عزيز العراق وشهيد المزراب. إن هذا القائد المجاهد الغيور قد أخذ على نفسه الشريفة القيام بالمهمة الوطنية والتعامل مع المناطق الحساسة بدون أي وجل من مخاطر الوصول إلى تلك المناطق والإطلاع على مجريات الأمور هناك حرصاً من سيادته على بقاء تلك المناطق بيضاء ( هذا مصطلح عسكري مشفر والمقصود خالية من المتفجرات والعصابات وأزلام النظام السابق).
ولأن سلامة المنطقة الحساسة من ضرورات الأمن العسكري والراحة والتمتع بالضبط العسكري لتلبية أوامر اللحس…العفو الحس العسكري، فقد أوعز القائد المجاهد إلى العلماء من أمته وكتلته النيابية وفي سلاح الهندسة العسكرية بإيجاد الحلول المناسبة لتطهير المناطق الحساسة والوصول إليها دون عوائق أو وجود أعشاب أو دغل للإطلاع عليها عن كثب، وقد نجح العلماء في أبحاثهم الجليلة الشأن في مسيرة الإنسانية والوطن، وخرج علينا القائد المجاهد وهو يزف البشرى بالطبل ويجدد الأمل في المناطق الحساسة، مهما غطاها اللون الأسود بسبب حرائق الجنس، العفو العفو حرائق الجيش، أشوية عيوني تعبانة وأروح صفح من أطبع.
أيها الشعب الغشيم
يا جماهير أمتنا المقيتة
بعد لا تقلقون على مناطقكم الحساسة، أخاف تباوعون وتخافون من اللون الأسود بسبب الحرائق، ترى العزيز أبو العزة عنده حل فانتاستيك، كريم ما أعرف مرهم، تخليه على المنطقة الحساسة وترجع الأمور بمكانها، لا أسوداد ولا عبالك صايرة أي حرب أو إحتكاك بين القوات المتلاحمة هناك. شنو من القدرة يا إلهي، مرهم؟؟ صدگ سيد لا يأتيه الباطل من بين يديه (بس يگولون مرة إجاه الباطل من خلفه من كمشوه الأمريكان). ما نحتاج شي، فقط الوقوف على إحتياجات المنطقة الحساسة وذلك بفتح الممرات الآمنة والحرص على التباعد بين مساري الطريق ثم إزالة الأحراش إللي تعيق الرصد الجيد، ثم مسح المنطقة من الناحية العسكرية، وبعدين وضع المرهم أو الكريم وإعادة مسح المنطقة بمساندة القوات المساندة، لتهيئتها للهجوم الليلي. خلاص، ثاني يوم الصبح، ماكو أي أثر للحريق ولا سواد في منطقة العمليات.
وبهذا الإنجاز العظيم، راح تتمتع مناطقنا الحساسة بالنظافة العسكرية، ماكو لا طسة بسبب لغم ولا وجود لأحراش تعيق الرؤية، ترى السيد جاي ومتحلف، يريد كل شي أبيض، بيوض الله يسلمه، خلانا نتمتع بجيوب بيضاء ما بيها ولا فلس، نمد إيدينا وندور على الفلوس تجي إيدينا بخصاوينا، وين الفلوس ما تدري، المهم أكو بياض بالموضوع، الله يبيض دجاجاتك سيدنا ومولانا، ويخليك تتمتع برؤية ولمس ولحس كل المناطق الحساسة وين ما تريد، وعوفك من إللي ما يفتهموك، عبالهم المنطقة الحساسة هي بس بين الفخذين، أموداهم إشگد عدهم حقد وكبت، ما يدرون أكو منطقة حساسة متأرجحة غير ثابتة، تگلب العمامة إلى القمامة، وأعتقد سيدنا وأنت في خضم أي في خضم أتون المعركة واگع بهاي المنطقة وما تدري أجلك
الله من الخطأ، حاشا قدرك وقندرتك الروغان إللي دست بيها الجادرية وخليتها تصير مقدسة، سيدنا لا أمر عليك، بس شوف نفسك بالمراية لدفع الشبهات، هذا إنت لابسها على راسك عمامة لو قمامة .
أيها العرقيون الحيارى
الوكيل الحصري لكريم ومرهم الأمل لتبييض المنطقة الحساسة: المجلس الأعلى للمناطق الحساسة. يرجى إرسال صور مناطقكم الحساسة لتقدير الكمية المناسبة للتعامل مع الوضع .
أسرع بالحجز…عرض خاص، مع كل عبوة صورة لشهيد المزراب. وبكيفك شي تسوي بيها !
وعلى الله يا بشيرة على الله !