راح أبدأ بطيحان الحظ، أبو شفايف المنفوخة (إي أبو مو أم) رئيس مجلس المصايب والنوائب والمبرطم أبو البرطمان العراقي أبو قلب غير السليم المجبوري، و إلمجبور على تنفيذ أوامر تصدر له من خارج الديار العراقية الخربانة، هذا المجبوري ما عنده هم ولا غم ولا يحرگ گلبه شي بالعراق المسموط سمط رغم البرد والشتا غير تأسيس مجلس أعلى للمرأة المسلمة !! شنو يعني مجلس أعلى ؟؟ هو منو طيح حظ المرأة العراقية وخلاها تنزل لأدنى الدون وأسفل السافلين غيركم وغير ( التعليمات الدينية الإلهية) إللي مچلبين بيها من قبل أكثر من ألف سنة ولا تريدون تغييرها أو دراستها حتى تتناسب وي هالوكت !! هسة جاي أبو ما أعرف شنو وتريد تشيل المرأة وتخليها في مجلس أعلى ؟؟ ولك أعلى يصير بالعلم مو بالعقول المقبغة ، الدين ما يبني أوطان ولا كرامات ، العلم هو إللي يبني الدول، الدين قواعد إلتزامية نگدر نحققها إذا عدنا قوانين تشريعية، وإللي يريد صفاء روحي ويدخل في ناموس ملكوت الرب أو الله أو الخالق، عنده بيت يگعد يعتكف ويلعب يوگا أو يتدروش مثل دراويش جلال الدين الرومي أو يقرا كرامات آل البيت ويعوف الدولة وما فيها.
ولك ما أعرف شي أصيحك، الناس وين وأنت وين داير وجهك، تريد أغني لك أغنية مي أكرم ؟ حاضر ” داير وجهك داير وجهك يمعود طاح حظك “.. الناس حايرة شلون تطلع من أزمة النفط وشلون تلگى حلول إقتصادية، وأنت الأفندي مال تالي الزمن تريد المجلس الأعلى للمرأة العراقية ؟ بشرف وحگ العراق إللي ما بقى بيه لا شرف الوطنية ولا حق المواطنة أسألك منو صاحب هاي الفكرة ؟؟ ولك الدول الأخرى بيها المجلس الأعلى للبحوث الإستراتيجية، المجلس الأعلى للجامعات، المجلس الأعلى للإقتصاديين، المجلس الأعلى للحاصلين على جوائز نوبل، المجلس الأعلى للرياضة، المجلس الأعلى للطاقة، المجلس الأعلى لتطوير المجتمع، وأنت جاي تريد المجلس الأعلى للطيحان الحظ ؟ ولك أنت شايف صور لطالبات الكليات العراقية قبل ستين لو خمسين سنة؟؟ أكو بيها أبو بينهن أي وحدة محجبة؟؟ إنت شايف صورة غلاف مجلة ألف باء بالسبعينيات لمسبح أمانة بغداد، وشايف الناس شلون د تسبح بمسبح مختلط ؟ إنت شايف عفيفة أسكندر تغني وأكو وحدة گاعدة لابسة تنورة فوگ الركبة تعزف قانون ؟
وبعدين تعال أسألك..أنت رئيس لمجلس المصايب والنواب العراقي، يعني لازم تمثل كل العراقيين مو مثل صاحبنا جلال الكردستاني إللي چان رئيس بس لكردستان، ولا لصاحبنا أبن العوجة إللي چان رئيس بس لتكريت، ولا لصاحبنا معصوم إللي هو رئيس فقط لعائلته وعشيرته وبطنه ، مو صح؟؟ إي لعد شنو سالفة المجلس الأعلى للمرأة المسلمة؟؟ ليش ما تگول المجلس الأعلى للمرأة العراقية؟ ها تخاف الحزب الإسلامي مالتك يزعلون ويسحبون منك الترشيح مو ؟ ليش الكل المرأة العراقية هي مرأة مسلمة ؟؟ ولك يا همين ما أعرف شنو إنت تعرف شگد نسبة العراقيات مو المسلمات ؟ أو العراقيات مو المؤمنات ؟ هذولة همين عراقيات بس ما عدهن إلتزام ناحية الدين الإسلامي يا إما مو مسلمات يا إما مو مؤمنات أساساً بس عراقيات والدستور يحترم حقوقهن مو هيچ لو آني قاري الدستور الياباني وما أدري ؟ هاي همين نفس سالفة العلم العراقي المكتوب بيه الله أكبر، أدري إذا واحد ما عنده إيمان بالله بس هو خوش رياضي وراح يمثل العراق بدورة الألعاب الاولمبية بمقاديشو شلون راح يشيل علم هو ما مؤمن بيه؟؟ يمعودين خليكم من شغلة الدين، أكو الله ونعم بالله ، عندك بيت إگعد وأشكر الله إللي سواك رئيس لو وزير من لا شيء تصديقاً للآية القرآنية الكريمة ” هل أتى على الإنسان حين من الدهر لم يكن شيئاً مذكوراً ” ها جيتك بالحجة لو لا ، كلكم چنتوا شي غير مذكور لا بتاريخ الوطن ولا الإنسانية هذا إذا حسبناكم على الإنسان لأن أنتو بالضبط ” بل هم كالإنعام وأضل سبيلاً” والأنام بالتعبير القرآني هي حاشا القراء تعني البهايم ..ها همين گول شنو هذا !
يا رفاق طيحان الحظ
إذا صدگ نريد يصير براسنا خير وبركة ومو گشرة حايرين وين وشلون نوگف گدام الناس، لازم نتخلص من عقدة الدين، إللي يريد يتمسك بالدين من حقه، حق دستوري، عنده بيت خلي يمارس فيه طقوسه الدينية أياً كان دينه وإلتزامه الديني تجاه الله أو الرب او الخالق، مو يجي يخرب البلد كله بمزاج عقيدته الدينية. ولكم مو هذا داعش المجرم د يذبح ويسبي ويبيع الناس والنساء بسبب الدين، شلون تريدون تتخلصون من داعش وأنتو مچلبين بأساس عقيدة داعش !
يمعودين عوفكم من كل هذا، ترى الدنيا بيها شغلات حلوة، مثلاً، ليش ما نسوي المجلس الأعلى للصگلة، نحافظ على تراث هذي اللعبة من الهجمة الشرسة لكلاش أوف كلانس ! لو المجلس الأعلى للدنبگ، نحافظ فيه على نغمة الزنجاري والدنبك العراقي المميز في وجه أصوات طبول الحرب والجهل، وإذا تريدون الناس المتدينين لا يزعلون، نگدر نسوي مجلس أعلى بيه ونسة وهمين بيه الدين وهو المجلس الأعلى للعبة المحيبس ! همين لعبة وونسة، وهمين هذي اللعبة مرتبطة بشهر ديني وهو شهر رمضان !
آني حچيت إللي بگلبي، وإللي يريد الخير لگلبه ووطنه المبتلى ، يقرا هذي السطور بدون عواطف معينة، بل بالعقل ، ترى العاطفة هي أساس التطرف، أدري هذا الحچي ما راح يعجب الكثيرين، خلي لا يعجب، المهم يعجبني ويريح گلبي وأبري ذمتي تجاه وطن مشيت على ترابه ودرست في جامعاته وأشيل جنسيته رغم الأذى، بس بيني وبينكم، ما أترجى شي من كل ما أكتب، شلون أترجى خير من وطن رئيس برلمانه مجبور ، ويصر بكل فعل وقول على أنه المجبوري ولو كره العاقلون.
