أبو المثل ما خلة ما كَال ومن أقواله الشهيرة ( الما يسوكَة مرضعة , سوكَ العصة ما ينفعة ) من حيث خلتنة هاي الوضعية والتجربة المرة الي عشناها بعراقنا اليوم كلشي نشوف ولكل مثل طلع أربعين شكل ولون , ومن هاي الشكولات خلانة نشوف شخص مثل السيد وفخامة و جسارة نائب رئيس الوزراء المحترم جداً ( صالح المطلكَ ) شخص من تسمع بأسمة أول مرة بالك ياخذك بعيد و ترسملة بخيالك فد نظرة مرموقة نتيجة ارتباطة بعشيرة وبولاية مشهورات بالكرم والطيب والرجولة والشهامة , لكن الأيام غدارة وما ينضم بيهة شي بمرور الوكت , أشو يوم ورة يوم كامت تتكشف الحقائق وتطلع (( الريحة )) مكرم السامع , أنسان مفلس جماهيرياً من حيث من حاول يتاجر بقضية أهلة وعمامة بالأنبار وشد رحالة ب سفينة مال تايتاينك هو وربعة حتى يركب الموجة مثل ماسامع بعلم السياسة الما مفتهم منة كلشي بس الهوسات , لكن أهلة وعمامة بيني وبينكم الحجي تلكوه بالورود المتحجرة وفشخوه وراح وذبهة براس المدسوسين ومايدري لو لازميه الناس جان اكلوه لحم وذبوه عظم , بس المشكلة صاحبنة معتبر روحة قاعد سياسي اوو اقصد قائد سياسي وعندة كتلة بس المسيجين من رشح ابغداد ما طلع غير عشرتالاف صوت مشكوك بصحتهة ونزاهتهة وما طلع مقعد طي…. خلفيته الموقرة , مما يعني أنه مفلس تماماً جماهيرياً و شرعياً , بس أكو خلاف بيني وبين ربعي على موضوعة لحجي صالح من حيث ربعي كلما جابوا سيرته وكالوا هذا ابو العرك لكن اني انتفض وأرفض أن يساء لكل أهل العركَ لأن ما شفنة واحد ابو عركَ وماعندة غيرة وحمية ومواقف زلم , وهذا ما عندة ذني كلهن لذا فهو بعيد كلش عن العركَ وأهل العرك , حجي صالح كلما قربت الأنتخابات و لزم الطبل ( ألة موسيقية شعبية )
ودك تهذري وتمسلت حد ما يحاول يقنع المغفلين بمصداقية قضيتة لكن أبو القضايا هذا بضربة حظ وتضخيم اعلامي وعناد واستغلال وضع لزك لرب الكرسي مال نائب رئيس الوزراء لهاي الدورة وكَال لو ألعب لو ما العب وترة اسوي وأذبح وأصلخ وجماعتنة الأمريكان غشمة يصدكَون بكل واحد , وكَالوا دسدوا حلكَة بمقيعيد وخل ينجب ويسكت لأن همة عدهم مشروع ويريدوه يمشي وما يضرهم لا صالح ولا غير صالح , وعبالهم العشر مقاعد مالاتة ومايدرون كلهن مال ناس دفعوا بيهن فلوس بمناطقهم وبمحافظاتهم ومن ضمنهم الطبلجي مشعان الجبوري الي الله سهل وتفاضحوا من ورة النسبة الي حاولوا يتقاسموهة علمود فلوس اللجنة مال النازحين ,وأنفتحت بيناتهم نار جهنم , وصار فرجة للمايشتهي يتفرج هاي اللجنة شبيكم الي باعت الخيمة أم ال 500 الف بأربع ملايين علدولة, المهم صالح المطلكَ اشلون ما أشوف انكشفت ألاعيبة و فاحت ريحته , وصار لازم يتحاسب حساب شديد بعد أن انكشفت تجارتة بمصائر الناس النازحة , هاي الجحافل الي الله غضب عليهة واتبهذلت بين العباد , انوب أجة حجي صالح وكملهة بلجنتة الفاسدة الي فسادهة ما كدروا يغطوه مثل اللجان السابقة ورأساً البرلمان أحال اللجنة على النزاهة وهاي الشغلة أول مرة يدبرهة برلماننا الموقر والله يسهلة ويتجرأ ويفك الجبسة , المهم ما نريد نجيب سيرة العالم بسوء ولا ننتقص من أحد , أحنة الي نريدة السارق يتحاسب حساب عسير ويصير عبرة لمن يعتبر و السالفة لا مال أعلام ولا مال تهويس ولا مال مستحاة , لأن المايسوكَة مرضعة سوكَ العصة ما ينفعة.
