المجتمعات الفقيرة مبدعة، لأن مليانة يأس، والناس بس گاعدة تفكر بأي شي أو فكرة حتى تطلع من بحيرة اليأس إلى بحيرة البجع، والمكسيك هي من هاي المجتمعات، من هاي، كل شي يجينا من المكسيك يخبل، سلمى حايك تخبل، صح هي لبنانية الأساس بس مكسيكية الحضور، الأكل المكسيكي يخبل حتى لو يسوي إلتهاب وتهيج في البواسير (لا ينصح به للشيخ إللي ببالي) ، بطولة كأس العالم بالمكسيك كانت تخبل من جاب مارادونا گولين خرافيين واحد بالأيد والثاني من غربل الفريق الإنگليزي من گاري لينيكر حتى پيتر شيلتون نكاية بحرب فوكلاند، المسلسلات الملكسيكية تخبل مو بقصتها بس بممثلاتها إللي تخلي واحد يراجع ذوقه الكسيف في إختيار أم الجهال (ما يصير نگول أم البنين لأسباب ميتافيزيقية ميثالوجية جيوپوليتيكية)، زورو يخبل ، ولو چان عدنا درزن زورو كان الحال غير الحال، بس إحنا عدنا درزن أئمة ، همين حال من غير حال، والحال بالحال يذكر…أعصبوها برأسي وقولوا طائفي…وتعلمون بأني لست منه بشيء !
هذي المرة، جانا العم چارلي من المكسيك، وما أعرف ليش هذا العم المكسيكي أسمه چارلي مو ألفارو سپيدو أو أليخاندرو غونزاليس أو خورخي فرنانديز ، كل شي تغير، حتى الأسماء المكسيكية تغيرت، مو بعيدة نشوف ممثلة مكسيكية إسمها ساجدة عبيد جونيور . المهم، چارلي ما عنده نفاق، فرد واحد عدل، ما يگول ها خليني أشوف لو يمكن أو ينبغي أو إرهاصات أو في ذلك السياق ولا حتى بناءً على متطلبات المرحلة والمصلحة العامة ! ما عنده غير أي او لا. أنت موجود ؟ أي لو لا.
جبت آني معدات تحضير العم چارلي، وسويت چاي مكسيكي…أي لعد..أكو چاي مكسيكي حالهم حال الچاي المغربي، المهم…چارلي چارلي أنت هنا…كل شي ماكو…چارلي چارلي أنت هنا..ولا تيفو! صار عندي قلق وأعربت عن قلقي بنفس طريقة بان كي مون…وگفت گدام ميز المطبخ، ولبست نظارة قديمة، ولميت شفايفي طلعن مثل شفايف وحدة أعرفهأ من تنصب عالشعب، وأعربت عن قلقي براحتي، يا فحل ما بقيت شي بالمطبخ ما حطيت بيه قلق، هي القلاقل تجيب قلق، ومال چارلي ما يجيني رغم أكو چاي مكسيكي وخبز الذرة المكسيكي ترى الشغلة بيها إن واخواته كلهم، النازحات وغير النازحات !
يمعود چارلي وينك، كلش ظل بالي، لبست الشورت والفانيلة كت ولبست كاب وترانس شوز وحطيت الهيدفون وفتحت موسيقى ياني وطلعت أعلج أدوّر على چارلي، وهناكن أشوفن لك جماعة ملتمين براس الفرع، رحت مسرعن وبلهفتن ، ودخلت بيناتهم، لاااااااااااااااااااااااااااااااااااااااا …ولك چااااااااارلي لاااااااااااااااااااااااااا.
لافتة نعي : ” تنعى عشائر ألبو رودريگيز فقيدها چارلي والذي إستشهد في تفجير چيخانة گوادو لوپي المخصصة لعرض المسلسلات المكسيكية…ويدعو الشيخ رودريگيز كافة الفصائل الموسلحة في ألبو مالته والموتجحفلة معها والموتحالفة چتف بچتف لأخذ الثأري والفصلي العشائري لدم الشهيد چارلي الرودريگيزي “.
وطبعاً الشيخ رودريگيز يحمل الناس الموجودين بالعراق أو الإستعراقيين مسؤولية قتل چارلي لأنهم كلهم جاوبوا ورقة وقلم وصاحوا على چارلي :
چارلي چارلي أكو فساد: عوووووووووونعم
چارلي چارلي أكو بوگ: عووووووووووووووووووووووو..عووووووووووووو نعم
چارلي چارلي إحنا عايشين : لا
چارلي چارلي يصير براسنا خير: هههههههههههههههههه صدگ تحچي…طبعاً لا
إلى درجة چارلي كان راجع للمكسيك حتى يجيب غراضه وزوجته وأطفاله وقدم طلب للشيخ رودريگيز بالهجرة إلى العراق، لان الشغل موجود ومثل الزبل ( هيچ عبّر چارلي عن الكثرة بالطريقة العراقية بحسب تصريحات الشيخ رودريگيز لقناة مكسيكنا)… بس في طريق الهجرة إلى العراق الذي لا يظلم فيه أحد ، إستشهد دفاعاً عن العقيدة المكسيكية بعبوتن ناسفتن غادرتن …
هسة تعالوا شلون ندفع فصل مال چارلي وهذولة كلهم چحنتية وناس واصلين كلش لخط النهاية ؟؟؟
يللا راح نقدم للشيخ ردوريگيز خمسين واحد مثل چارلي ندربهم وإن شاء الله يقتنع….
جاسم جاسم أنت هنا؟ ولك جاسم جاسم أنت هنا ؟
سعدي سعدي أنت هنا؟
ويگولون الگعدة مال الفصل العشائري راح تصير بجنيف ! وجيب خلگ وتحمل الحر والوساخة بجنيف….هسة خلوها عدنا…بس ما ردنا يزعل شيخ عموم آل مكاسكة الحاج فتلة المكسيكي .
يا عيني عليك يا چارلي.
