بدون كلام إنشاء
هذه تشكيلتي الحكومية…وهي تتألف من رئيس الوزراء و ثمانية حقائب وزارية:
رئيس الوزراء…وهو في نفس الوقت وزير التخطيط حتى يضع سياسة التخطيط ويوجه الوزراء بحسب هاي السياسة…ثم الوزراء :
وزير الخارجية والتجارة : لان ماكو سياسة بهالوكت ما بيها تجارة ومصالح تجارية
وزير الطاقة والصناعة والبيئة : لان هاي الشغلات الثلاثة مرتبطة ببعضها ولازم وزير واحد يهتم بيها
وزير المالية والاجيال القادمة: وهذا الوزير لازم يخلي السياسة المالية بما تخدم مصالح الناس هسة ومصالح الاجيال القادمة
وزير الموارد المائية والزراعة والهجرة من المدينة إلى القرية: وهذه الوزارة من مهامها إعادة تشكيل القرى وتشجيع الهجرة العكسية من المدن إلى القرى
وزير المخابرات والداخلية والامن العام: ما يحتاج شرح
وزير الدفاع والبحث العلمي : لان ميزانية الدفاع عالية فنربط البحث العلمي وي الدفاع
وزير الصحة والتربية والتعليم: مرتبطة ببعضها
وزير النقل والإتصالات والتكنولوجيا : مرتبطة ببعضها
ملاحظة: ماكو حقوق الإنسان لأن عيب تصير عدنا هيج وزارة…لأن هاي من البديهيات…وهمين ماكو وزراة المراة لأن عيب نگول هاي مرية وهذا رجال..وماكو وزارة الهجرة…إللي يعجبة يبقى وإللي ما يعجبه الله وياه…وماكو وزارة العدل..لان كل رئيس محكمة هو سلطة قانونية…وماكو وزارة أوقاف…لان كل واحد حر بدينه ومقدساته. وماكو وزارة إعلام في عالم الفيسبوك وتويتر واليوتيوب..ولا وزير ثقافة…إللي يريد يتثقف ويتعب على روحه بكيفه.. ولا وزير رياضة…لأن أكو اللجنة الأولمبية.
ينشر في الصفحة الرسمية لحبيب العربنجي
كتبت في يوم السعادة العالمي
20 – آذار – 2013