عمي والله انتو شعب بطّران ومتعافي على النعمة اللي بيها !! ….روحوا شوفوا قطر …شعبها راد منتجع سياحي اضطرت حكومتهم ان تبني الهم مدينة اللؤلؤة ! وراها بفترة اتذمروا القطريين من الحر الشديد ….هم اضطرت الحكومة تستورد الهم غيمة صناعية متحركة !! …شوفو الدول خطية كلهم يضطرون اما يصنعون او يستوردون بس انتو الشعب العراقي شعب بطران وميحمد الله على النعمة اللي هوه بيها …كنتوا تروحون الى اسطنبول ولبنان وفيزا وطيران وتعب علمود تكعدون على البحر …وهسه بسبب حب واهتمام الحكومة بيكم صار عدكم بحر طبيعي !! مو صناعي …كل شي عدكم طبيعي والحمد لله …الموت طبيعي جدا !! والمرض طبيعي جدا!! والسرقات طبيعيه جدا كله هذا بفضل حكومة ابو حمودي الوردة وشريكه البطل عبعوب !! …على الاقل هسه راح يطلع عدنا جيل محترف بالسباحة والغوص ..ماشاء الله الكل يسبح ويغوص ويمارس هوايته …والتعلم هنا مجاني وطبيعي هم !!
واللي يعترض ويكول ماعندنه ثروة سمكية هم راح اجاوبه واكولها انتظر شوية اصبر يا عراقي يابطّران …..الخير جاي و ( الزوري ) راح يسبح بشوارعنا!! …
اللهم احفظ الوطن والحكومة وصخرة عبعوب !!
