اريد انطيكم معلومات علمية وطبية دقيقة عنها ، بما انه انت او انتِ گاعدين هسة وحظر اريدكم تقرون هذا المنشور العلمي والتوضيحي عن فيروس كورونا الجديد( المحور) او يسمها البعض السلالة الجديدة …
?اول ظهور الها في جنوب شرق بريطانيا واسمها B.1.1.7
?الطفرة المهمة الي صارت بيها سموها الأنگليز N501Y
?الي صار بهاي الطفرة انه الأشواك مال الفايروس( النتوءات البروتينية) و اكيد شايفيها برسم توضيحي للفيروس ، هالاشواك تغير شكلها يعني بالسلالات السابقة او اول ظهور الفايروس چانت ما تمسك الخلية الحية بسرعة هسة تطورت وكامت تمسك الخلية الحية بسرعة وتغزوها ، زين هسة شصار تغير شي عن السابق ؟ الي صار هو انه جرعة الفايروس( viral Load) والي هي اقل جرعة من الفيروس تسبب الإصابة بكوفيد سابقاً لازم تكون عالية حتى تحقق ( يعني تدخل جرعة عالية أثناء الرذاذ المتطاير من شخص مصاب) ليش الا عالية لانه اكو هواي من جنود الفيروس ما يحقق التمسك بالخلايا الحية عن طريق الأشواك الي ذكرناها حتى يغزوها
بينما بالتحوير الجديد بجرعة قليلة من الفايروس تحقق الاصابة ليش؟ لانه الاشواك مالته صارت اكثر تطور وتمسك الخلايا الحية اسرع من السابق …
هذا هو الفرق الوحيد عن السلالات السابقة
حلو الحچي لحد الأن ؟
زين هذا التطور راح يغير ويأثر ؟
الجواب التغيير صار بنقطتين مهمه فقط
✅اولاً: سرعة الأصابة اكيد اسرع بالسلالة الجديدة المحورة نسبة العدوى من 50% الى 70% اكثر من النسخ القديمة
✅ثانياً: انتشارها اسرع من السلالات القديمة
زين عيني هل هذا زاد من عدد الوفيات ؟
مكتب الاحصاء الوطني البريطاني بالتعاون مع جامعة اكسفورد وجامعة مانشستر ومنظمة الصحة العالمية سوو مسح بهذا الموضوع ولگو انه على الرغم من الطفرة المطورة من الفايروس وسرعة الانتشار والعدوى الا انه اعداد الوفيات ما ازدادت عن السابق بمعنى انه الفيروس هو طور نفسه بالاصابة ولكنه لا يزال عاجز انه يقتل الفئات الي مناعتهم قوية يعني ما اختلف شي عن السابق …
وهسة راح احچيلكم عن الأعراض الي تسببها السلالة الجديدة وهنا ركزو وياي وحسب المسح الي سواه مكتب الأحصاءات الوطنية البريطانية
✅ فترة الحضانة ما تغيرت هي نفسها من 2 الى 14 يوم
✅الأعراض تترواح بين الخفيفة والشديدة مثل السابق وكلمن ومناعته بهالشي ..
?الحرارة : چانت نسبة المصابين بالسلالات القديمة 19% بينما بسلالة كوفيد الجديدة المطورة النسبة 22%
?الگحة: ازدادت من 28% الى 35%
?الام عضلية: هايه ميزة مهمه بسلالة كوفيد الجديدة والنسبة ازدادت من 21% الى 24%
?التهاب الحلق : النسبة ازدادت من 19% الى 22%
?الصداع : ماكو اي تغيير بين السلالات القديمة والسلالة الجديدة
?فقدان الشم والتذوق : هناااا النسبة قلت من 19%( بالسلالات القديمة) الى 15% ( بالسلالة الجديدة) يعني فقدان الشم والتذوق اذا صار ممكن يكون المصاب بسلالة قديمة اصلاً .. وهذا كان شي مزعج لكثير من المصابين بالسلالات القديمة والي بيهم صارله ٦ تشهر واكثر وما رجعله الشم ??
?واهم نقطة هي ضيق التنفس ونزول الأوكسجين : وهناااا هو الي يشكل اكثر خطورة بين المصابين ⬅ لاحظو انه ماكو اي تغيير عن السلالات القديمة وبالتالي هذا مؤشر اخر على انه السلالة الجديدة غير خطرة مثل ما حلل البعض بكيفه وبدون اي مراجع علمية وطبية…
?اعراض الجهاز الهضمي: من اسهال وتقيء والام بطن هي نفس السلالات القديمة وماكو بيها شي جديد…
العالم الألماني كريستوف سبيشت يگول ليس هناك ما نخشاه بعد من سلالة كورونا الجديدة…
اما الحديث عن اصابة الأطفال بكورونا الجديدة المحورة ، من خلال المسح عن الاصابات شافو اصابات الاطفال كانت بنسبة اعلى من السلالات السابقة وهي ما تستهدف الاطفال فقط مثل ما يروج البعض وممكن يكون سرعة الانتشار سبب هالشي وكانت الاصابات تتراوح بين خفيفة الى متوسطة الاعراض وبدون مخاطر
البروفيسورة ويندي باركلي، التي تعمل في كلية إمبريال كوليدج لندن، وعضوة مجموعة (نيرفتاغ) تگول السلالة المطورة الجديدة أصبحت أكثر قدرة على الاتصال بالخلايا البشرية وإصابتها، نتيجة طفرات طرأت على الفيروس.
وأضافت :طرأت تغيرات في طريقة دخول الفيروس للخلايا البشرية، ما يعني أن الأطفال قد يكونوا معرضين للإصابة مثل البالغين…
الحل الوحيد لكورونا بكل سلالاتها وطفراتها هو الوقاية والنظافة واهم شي لبس الكمامات والتباعد وغسل اليدين بأستمرار والتعقيم المستمر
الصحة والسلامة للجميع
