_ مرحبا
_ مراحب
_ شرايج نزوج اذا ماعندج شي باجر ساعة خمسة العصر
_ اوگف خلي اشوف اخاف متواعدة ويا احد
_ بسرعة فدوة ترى كلش مشغول اني
_ اوكي ،، خليها خمسة ونص الا خمسة ،، اشوفك يم المحكمة
_ باي
_ باي
ورا شهرين ..
_ هلو حبيبي
_ هلو عمري
_ عندك شي باجر الصبح انروح نطلگ ؟
_ عندي شغلة صغيرة اخلصها واجي ،، او اگلج خليها عگب باجر ماعندي شي ،،
_ اتفقنا ،، باي
_ باي
اعتقد راح يعزف اكثر الشباب عن الزواج سنة ٢٠٢٠ ،، وراح تنقرض هذي العادة الي راح تعتبر عادة وثنية قديمة ،، والاسباب كثيرة ومقنعة واحتمال يطور الامر الى ان يراجع المتزوجين من فترة طويلة انفسهم واتخاذ قرار بارجاع زوجاتهم الى اهاليهم هاي بالنسبة للي عدها اهل باقين على قيد الحياة ،،، اما الزوجات الي ماتوا كل اهلها وماعدها معيل راح يتبرع بيها زوجها لاحدى المؤسسات الحكومية ،، وخاصة مؤسسات الدفاع المدني ،،،
واذا صرنا منطقيين وواقعين ونريد نعرف سبب عزوف الشباب والشياب عن الزواج راح نقتنع قناعة كاملة بانها اسباب حقيقية ،،، خلي نسمع رأي واحد من الشباب سنة ٢٠٢٠ من سألته ليش متريد تتزوج ،، ؟
_ عيني شنو سبب رفضك للزواج ؟
_ وليش ازوج ؟
_ هذا نظام صحي يضمن لجنسك البقاء من خلال ذريتك الصالحة
_ وشصخم بذريتي الصالحة ،، وابشرج ذريتي طالحة وطايح حظها على هذا الوضع ،الطايح حظه ،، منين ما اجيبها عوجة ،، وتعالي اگولج ،، اذا اريد افكر مجرد التفكير بالزواج لازم افكر بالاتي ،،،
اني احب انوع ،، يعني زوجة وحدة في عصر الفتيات الاجمل من المانكانات في الجامخانات مال المحلات ،، هاي اسويلي مشكلات ،،
والتنويع مع المشكلات يسوي مزعجات ،، هذا اهم جانب من قرار عدم التحاقي بسرب المگاريد المتزوجين والي يدعون الاخلاص بينما هم بالحقيقة مالهم حيل المشاكل يكفيهم الي بيهم ،،
ثم اني مفلس منين اجيبلها المطلوب ! بيت ،، سيارة ،، ذهب ،، گصب ،، زفة ،، عرس ، وراها نصف شهر عسل او حتى ربع شهر ماعندي ،، واذا كانوا في عصركم الاهل متعاونيين لدرجة يزوجون اولادهم عن طيب خاطر فهذا الموديل بعصرنا انقرض لان الاهل خلوا فلوسهم كلها على الدكاترة والمستشفيات نتيجة الامراض الي ظهرت من بعد دخول داعش وماترتبت عليه من مصايب اذا مراح النا اخ او ابن عم فلابد عدنا قلوب تتاثر على ولد العالم ،، واكثر ما يتأثر همه كبار السن لان يعرفون قيمة الحياة لما الانسان يروح بشربة مي وهو بعمر الزهور ،،،
واذا افكر بالامور الاخرى ،،
تطبخ ! مو المطعم احلى واونس ،، واكله اطيب ،،
اجيب جهال ! هسة اني جارع نفسي حتى اجرع واحد يشبهني للحد الي يگلي ( بابا ) ،،
اسولف وياها بالليل ! اووووووو هاي اسهل منها ماكو ،، افتح الفيسبوك واختار ،، للصبح اسولف
نكد ،،، يكفي اقرا الجريدة الصبح كل يوم وافتح اي قناة عربية تفي بالغرض وزيادة ،،
تگليلي انت رجال عندك مطالب اخرى ،، اكلج بطلت ماعندي واهس ،،،
راح اسأل بنية اشوف شنو سبب عزوفها عن الزواج ،،
_ حبيبتي ليش مدا تقبلين تتزوجين وتتبطرين على علي وحسين ،،
_ يمه يازواج هذا فدوة اروحلج ،، اخاف احد يسمعج ويصدگ ،، عبالج احنا مثل النسوان نتستت ونگعد بالبيت انحط رجل على رجل ونشرط ،،
وبعدين شسوي بي ،،
يصرف عليه ! مو اني عندي راتبي يكفيني وزيادة ،، ومتونسة بحياتي بلا ما اكرب من الصبح لليل ولو يرضى لو ميرضى عليه ،، او تجيني أمه اطلع عقدها كلها براسي ،،، واذا شاء القدر وصار عدنا اطفال هاي النوبة العلاگة الي مراح اخلص منها الى الابد ،، واظطر احمل همه وهم عشيرته ويا لخاطر جهاله ،،،
شكو مدوخه روحي ،،، يسموني عانس ،، مو مشكلة ،، احسن ميسموني ناشز ،، يسموني مسترجلة افضل من يسموني مرية ناقصة ،،،
شفتوا محد راح يزوج بعد ،،،