الحقيقة شوفت صور لناس اسلموا فب لاد الفرنجة وهنا اكتشفت ان الدين عندنا غير الدين عندهم
غير نظام الدولة الصحي المتطور العندنا السابقهم ب7000 سنة ضوئية -ربنا يغفرلنا الكدبة دي-ونظامهم
ومدارسنا الحكومية العريقة الطلعت احلي ديلر من روض الفرج في القاهرة لحد حارة البطارية في اسكندرية
ومدارسهم
فـ ليه هتقف ع الدين اكيد عندنا غير عندهم وسبحان الله مشوفتش في المسلمين من الفرنجة دين ذي العندنا عندهم …
يعني هما منشكحين جدا انهم خدوا القرار انهم يبقوا مسلمين واحنا هنا مسلمين بالوراثة دا بجانب الستر ودي الاشياء البتورث في مجتمعنا الدين والستر والصحة انت ورزقك
الدين عندنا طرحة مغطية ربع الشعر المقتنع و الباقي بيواكب الحضارة علي بنطلون فيزون مع رعاية شاشات hd لجودة رؤية افضل
الدين عندنا رمضان 30 يوم و ليلة الوقفة سلسلة محلات الخمور الاكثر مبيعا في تاريخ الجمهورية في اليوم دا
الدين عندنا المعوذات في براويز في المحلات
الدين عندنا سبحة في الايد وبقت تتعلق في الرقبة ميضرش
الدين عندنا الله اكبر مع كف خماسي لما حد يقولك علي حاجة تخصك حلوة وممكن تكون ف ضهر توكتوك او مشروع ومعاها صلي ع النبي “ص”
الدين عندنا مصحف بتشتريه تحطه في العربية الجديدة وميتحركش من مكانه إلا للعربية الاحدث
الدين عندنا يعني شهر رمضان يعني الصباح لله وبليل لعبد الله في رمضان نايتس
الدين عندنا السور الكنت بتحفظها ايام ابتدائي لامتحان الدين و تحفظها نص نص في اعدادي وفي ثانوي مبتعرفش عنها حاجة ولما تتخرج سعيكم مشكور
الدين عندنا القرأن البيتختم شهر واحد في السنة
الدين عندنا دقن وقفطان و ممكن نشيل موضوع الدقن دي عشان بقت موضة عشان البنات بتحبها وشيفاها سو سيكسي
الدين عندنا ايات بنقولها لما نتزنق في موقف عشان نبرر نفسنا و نبان اننا مبنغلطش
الدين عندنا رنة موبيل بصوت حد من المقرأيين او الدعا
الدين عندنا لما تعاكس واحدة “اللهم صل علي النبي”
الدين عندنا صور ايات قرأنية كباك جراوند وبروفيل بيكتشر وصور بتتشير مكتوب عليها انظر او انت والشيطان مع بعض في ريليشن شيب
الدين عندنا ترهيب اعمل عشان متروحش النار مش اعمل كدا عشان تروح الجنة او ربنا يحبك
الدين عندنا سيلفي في صلاة العيد
الدين عندنا صوت المرأة عورة و عينها فتنة و ختانها واجب و تستر من وهي عندها 14 سنة عشان متجبلناش العار
الدين عندنا سوبر ماركت المدينة و مكتبة هدي الاسلام
الدين عندنا لينكات ع السوشيل ميديا انظر ماذا حدث للفتاة التي ألقت بالمصحف
الدين عندنا انك تدخل تدعي علي حد مش من فصيلك السياسي لما يموت
الدين عندنا انك تتصل بصلاة رحمك كل سنة مرة عشان تقولهم كل سنة وانتوا طيبين
الدين عندنا انك تصلي ايام الامتحانات وتقعد تدعي وبعد كدا فركش
الدين عندنا شيوخ بتقولك النار وعذاب القبر وعذاب ربنا الهيلاحقنا بس محدش كلمنا عن جمال الجنة ومغفرة ربنا المولي عز وجل رحمه
الدين عندنا الافلام المن الستينات و السبعينات ذي رابعة العدوية وفجر الاسلام
الدين عندنا انك بعد ما تكلم حبيبتك او خطيبتك كلام استغفر الله العظيم وفي الاخر تقولوا لبعض لا إله إلا الله
الدين عندنا الدعي يا رب الاهلي يكسب يا رب الاهلي يكسب يا رب اخس يا رب اتجوز واحد غني
الدين عندنا اصلي محسودة
الدين عندنا تشير لاحاديث رغم انها من غير سند
الدين عندنا معا لعودة دولة الخلافة
احنا شعب متدين بطبعه