كان يا مكان في حديث الزمان كان اكو واحد كاتله الوسخ صار سلطان راد يخرج ويه زوجته السلطانة في نزهه بالغابة هم جان كاتلها الوسخ..
 فأخذ وياه وزير الطقس والاحوال الجوية باعتبار كان الفصل بالشتاء فسأل  وزير الطقس كله شلونه الجو اليوم جاوبه الوزير كله فخامتك الجو ممتاز ومشمس ولوز لايز ..سيدي السلطان

طلعوا بالنزهة  و ياهم الحمايات ووصلوا لنص الغابة واذا بالشمس تغيب والگراگيع تضرب وبلشت  تمطر مطر قوي والطيان صارت للهامة لان تدرون الشوارع ما مبلطة ومجاري ماكو وصخرة عبعوب سدة المجاري بالغابة والسلطان والسلطانة اتمرغلوا بالطين وانصمط ابو ابوهم ..((يستاهلون وببو زايد ))

فالسلطان انزعج جدا وگام يصيح هذا كمين وعملية مدبرة ضدي من الخصوم السياسيين والله عندي ملفات الا افضحها واخليها تصير بالبوكسات بمجلس النواب ..واللوگية الي وياه يگولون نعم سيدي انهم الخصوم السياسيين وراء هذه الامطار لتعكير مزاج فخامتك سيدي

المهم السلطان لگاله كوخ بالغابة ودخلوا بالكوخ كل الحبربش الفاسدين شاف فلاح گاعد بالكوخ وبصفة حمار رافع اذاناته .

ارتاح السلطان الفاشل شويه وسئل الفلاح كله ليش ما طالع  للشغل اليوم ..

فگله الفلاح مو الحمار رافع اذاناته شسوي لعد

فگله السلطان واذا رافع اذاناته

گله الفلاح يعني الطقس مو زين واذا ينزل اذاناته الطقس يكون زين ..

التفت السلطان لوزير الطقس كله طاح حظك شفت هذا الحمار افهم منك و طاح حظ  سلمان ..وطرده لوزير الطقس الفاشل من الوزارة وسواه سفير لان هذا السلطان اي واحد فاشل او فاسد ميعاقبه لو يرقي لو يسوي سفير بأحد الدول الأوربية .

المهم السلطان اتفق ويه الفلاح ان الحمار يصير وزير للطقس والفلاح المرافق الاقدم للحمار فوافق  الفلاح لان وين لاگيها راح تصير حمايات للحمار ويجيب باقي الحمير يعينهم بوزارته وراتب بال 30 مليون دينار ورباخ ويگعد بالمنطقة الخضراء ..

المهم ومن ذاك اليوم اتعلم هذا السلطان الفاشل وين ما كو مطي وحمار ( أجلكم الله ) يعينه بحكومته الفاشلة بصفة وزير او قائد عسكري او مدير عام  لما دمر البلد واجتاحته داعش واحتلت نص البلد  …وعاشوا عيشه طايح حظها .