كل شي بالعراق لعبة، السلطة لاعب، والناس ملعوبين، الدستور لعبة، الديمقراطية لعبة، الوزراء ملاعيب بيد رئيس الكتلة، ولكم حتى الوطن لعبة إسمها الوهم وشعارات. ماكو هيچ بلد كله لعب ما بيه ملل، وماكو أي مجال للضوجة، بس تگول أو تحس نفسك ضايج – وهاي حالة نادرة جداً – ، تنطيك الحكومة لعبة تظل ملتهي بيها شهر، وتنسى الضوجة والملل. وهاي اللعبات والملاعيب كلها أساسها إكتشافنا لسر الحصة والمحاصصة، الحياة حصة، الموت حصة، المقابر حصة، الأكل حصة، التموين حصة، الوزراء حصة، قسمتك من كعكة إسمها الوطن حصة، البوگ حصة، الموازنة حصة ، المليشيات حصة، الجنة حصة، النار حصة، الدين حصة، الائمة حصة، السُنة حصة، الشيعة حصة.
والحمد لله الرب الكريم الحميد المجيد صاحب العين الساهرة على عباده، دعينا وإستجاب، ردنا شي نتميز بيه عن العالمين، فهدانا إلى صراط الحصة والمحاصصة ، بعد جلسة حب ومماصصة، فصرنا فوق كل الدول، وأسسنا لحضارة وادي الحصتين، حصة إيرانية ، وحصة كردستانية. وعرفنا شلون نطلـّع من الحصة حصة، ونعرف نقسم حتى العشرة على ثلاثة بدون باقي، وداعتكم شتريدون تنطوهم تدللون، ماكو هيچ عباقرة بالتقسيم، ما يوگف بوجههم أي رقم غير قابل للتقسيم، الأرقام الفردية ما لها وجود بالعراق ، وعدهم قابلية حتى يطلعون جذر مايناس واحد ويقسموه بيناتهم.
إحنا كل شي نخليه بيه پودرة المحاصصة، من هاي لحد هسة ما عدنا نشيد وطني لأن نشيد موطني نشيد المنظمات الفسطينية وما لها علاقة بالعراق، لازم كل فخذ وعشيرة وبطن عنده شي بالنشيد الوطني بحسب المحاصصة ، يعني النشيد يطلع أطول من سلسلة قصة الحضارة مال يول ديورانت، وراح نسمي النشيد الوطني مالتنا قصة الحصاصة، بيه كل اللغات العراقية والآرامية والأكدية والسريانية والعربية والكردية والتركمانية والشبكية والصابئية، وكل الرموز مال هذه الأقوام، وكل أسماء الأئمة (إنلاصت هاي بوحدها طنعش قصة بالنشيد ).
وهسة قناة ناشيونال جيوگرافيك بايگة هوا، لأن الناس بعد ما راح تتابعها، عندك ورقة أم الخمسين ألف دينار تنافس هاي القناة والمجلة مالتها. هاي الورقة راح تفتر العالم وتنقل لكل الناس بكل الدول، صور حيوانات، ومناظر وشلالات، ولغات أشكال وأنواع، وصور حضارات إنسانية حتى حضارة الأزتيك ومايا (الجرة الموجودة بعملة خمسين ألف) ، وممكن إستخدام هاي العملة العراقية كنشرة توعية للحفاظ على البيئة وحماية الأنواع المعرضة للإنقراض (البط والوز وجاموس البوفالو ) وممكن إستخدامها همين كنشرة توعية لمحاربة مرض البلهارسيا ومرض الملاريا والكوليرا (واحد واگف مطلع زروره توه جاي مخلص زربة لو بولة بالشط)، ومخروط مال أيس كريم للتوعية من مضار أكل الدوندرمة في نقل الكوليرا، وبعدين المقارنة بين اللغات، والخطوط وتأثر الحضارة الهندية ولغة الأوردو على باقي الدول، من ناحية اللون والزخرفة والإشكال، وإحتمال واحدنا يروح ويوصل لأي مطار برة، وبعد ما يختم الجواز يروح يبدل ورقة أم الخمسين ألف بعملة ذيچ الدولة، ياخذها أبو المكتب ويگلبها ويگول عيني إحنا مو مكتب سياحة وسفر وجاي تريد تزور حديقة الحيوانات ! هاي كلها نقدمها للعالم بورقة خمسين ألف عراقية، وهاي من النتائج المذهلة لعبقرية فهم المحاصصة والحصة.
بس هسة صارت بيننا وبين الدول غير الحصتية گاب چبير، وفجوة حضارية تهدد السلم المجتمعي (هاي الكلمة هسة كلش طاگة ولو تنزل بالإنتخابات راح تفوز) للدول إللي بيها أثنيات (هاي همين كلمة كشخة هذه الأيام) وأقليات وطوائف وما الله هاديها لمعرفة سر الحصة والمحاصصة. مثلاً، عندك طالب عراقي يروح يدرس بالهند (هاي الأيام هواية يروحون لأن مناك يحصلون على اللجوء بسسب رهاوة الإجراءات الهندية)، إي وهذا الطالب يصادق أنيل كومار الهندي، وأنيل كومار مثل علي حسين عدنا بالجنوب أو عمر الفاروق بالرمادي، أو حمه آمين بكردستان، او جورج صليوا بتلكيف، وهناك يبدي يشرح فائدة المحاصصة بالعراق، ويفتر راس آنيل كومار، ويروح عد جماعته، سونيل بابو، راجيش ناير ويخبرهم عن المحاصصة وهم شلون مهمشين، ويسوون حزب الهندوس المهمشين بالهند ! مو الهندوس طبقات عندك طبقة البراهما وطبقة المنبوذين المهمشين، وأشوية أشوية هذولة يريدون حصتهم في مدينة پوپال، ومناك تگوم جماعة أشفاق الله أكمل الرحمن ويسوي همين جماعة (أهل الجنة والثواب) ويطالبون بحصتهم من مدينة (الله آباد ) و (حيدر آباد) ، وبعد چم يوم يجي جيسون روبنسون (وهو هندي مسيحي من إنتاج الحملات التبشيرية الإنكليزية) ويسوي حزب ( الكنيسة الهندسة) ويطالبون بحصتهم من مدينة نيودلهي، ويسمع بهالشي جهانكير شاه جيهان (هندي مغولي) ويأسس جمعية (تاج محل) ويطالب بكل واردات السياحة مال تاج محل، وتگوم العيطة في الهند ، وتعال وشوف، حتى يسكتون كل الحلوگ ويتقاسمون الهند حصص بحسب
النظرية المحاصصاتية ، راح يكون الجواز الهندي عبالك تتفرج على فلم هندي المقدمة أطول من فلم الرسالة، وتكون ورقة مية روپية هندية عبالك لوحة بانوراما. من هاي…نطالب الخارجية العراقية إرسال ماردها الجبار لتوعية الهنود ودرء الخطر……المارد كلش شاطر بالدرء…يدرء درء بالكرتة ما صاير، ويفهمهم شنو معنى المحاصصة، قبل ما تصير الهند تتحسر على النعيرية، ويگوم الرفيق بان كي مون يصرف قلق، خطية صاير عنده إلتهاب بقلاقيله بسبب إدمانه على القلق.
وحتى لا تصير الورقة النقدية أم المية ألف العراقية (جاية بالطريق) بحجم جدارية لأن كل جهة تريد حصة بيها وتصير نشرة عالمية عن أسباب إنقراض الديناصورات وظهور النفط في العراق وبيها صور الخنزير البري لأن مختار محلة جزيرة أم الخنازير يطالب بتمثيلهم بالعملة، ، خلي كل محافظة تستقل مالياً وإقتصادياً وسياسياً ، وحتى لا يصير الجواز العراقي القادم بحجم دفتر أبو ميتين ورقة ، خلي كل محافظة وعشيرة يصير عدها حق في إصدار جوازات سفر وتنطي جنسية بحسب محافظتها وعشيرتها، ونبدي من الجنسية الدلمية بإعتبارهم العشيرة الوحيدة إللي أكو أكلة بأسمهم…وبعدين نشوف منو التالي !
