ما اعرف عليمن نضحك لو منو القشمر بينا، بس إللي أعرفه إن الاخبار والصور وصور من المعركة وقال القائد كلها دا تگول وتأشر بكل وضوح إلى مجموعة من القشامر يجوز آني وأنت بيناتهم في أحسن الإحتمالات ويجوز أبوك وجد جدك همين بيناتهم في أسوأ الإحتمالات واصدقها من الناحية التاريحية والجغرافية والفيزيمكانية .
رئيس الأركان بيشمرگي، قائد القوات الجوية بيشمرگي، في بلد ماكو بيه وزير دفاع ولا وزير داخلية، يعني الجيش كله بيشمرگة، لعد منو دا يضرب منو؟؟؟ ليش كل هالهوسة؟؟ اخاف تمرين تعبوي بالتفلة الحية وبالمدافع المحشوة بالبلغم؟؟ مووووو؟ يعني إذا القائد العام للقوات المسلطة (لأن قوات السلطة ) أصدر أمر عسكري لأي قطعة بالتحرك، منو ينفذ هذا الامر؟؟؟ مو رئيس الأركان إللي هو كاكه بابكر ؟؟ وإذا بابكر بيشمرگي فهذا راح يخلينا گدام إحتمالين: بابكر راح ينفذ الامر وبهاي الحالة حتى قوات البيشمرگة تسوي مناورات بالأسلحة الحية على حساب مخازن وأسلحة جيش بغداد، او أن بابكر راح يكسر جيش بغداد گدام أي مواجهة وي البيشمرگة حتى تصير قوات البيشمرگة هي قوات النخبة، والإحتمالين حصل تماما في مواجهة طوزخورماتو، خاصة بعد ما إجت الاخبار أن الفريق أمير الزيدي قائد قوات دجلة طلب من قائد العام للقوات المسلطة على رقاب الغشمة أن ماكو داعي لإستفزاز قوات البيشمرگة لأن مو لعب.
والاخبار تگول أن قوات البيشمرگة إللي حول طوزخورماتو مجهزة بكتيبة مدفعية ثقيلة !! بس من غير ما حد سأل نفسه هل من حق أي محافظة إبرام عقود أستيراد اسلحة لو هاي الأسلحة من غنائم معسكر الجمار والغزلانية وعين زالة في الموصل ومعسكر خالد بكركوك؟؟
وهسة همين إحتمالين: إذا أربيل وقعت عقود شراء أسلحة على حسابها لعد وين چانت لجنة الامن والدفاع في مجلس النوام العوافي بقيادة المارشال حسن السنيد؟؟  اما الإحتمال الثاني فهو فرهدة أسلحة الجيش العراقي من المعسكرات إللي صارت وضع يد وتوزعت قطع أراضي للاحزاب الموالية لجهات معينة. وهمين الإحتمالين حصل بالصوت والصورة.
وراح نوسع القصة أشوية حتى تضم كل القشامر..نعرف أن أربيل ما چانت موافقة على صفقة الأسلحة الروسية، وبعد فشل أربيل في وقف هاي الصفقة، قامت مخابرات أربيل بترشيح أسماء الوفد المفاوض للأسلحة وطبعا بامر من كاكه بابكر بإعتباره رئيس أركان الجيش وهذولة المرشحين ورطوا الوفد المفاوض بصفقات فساد حتى الصفقة تنلغي، ونفس الشي صار وي صفقة طائرات إف – 16 إللي طلعت هي بس هيكل، لو دافعين فلوس بطيارات ورقية هواية كان أحسن على الأقل چنا نسوي مهرجان للطائرات الورقية بالحبانية لو بابي نؤاس ما نجيب طيارات ما بيها أي نظام مراقبة ولا رادار ولا قابلية لحمل صواريخ موجهة!
يابة كافي مو يا حجارة دا نشيلها بالعراق دا تعفط علينا ، بشرفي كافي مو شبعنا من كوميدياتكم السخيفة عبالك هاني رمزي لو سمير غانم.  وبعدين سمعوا تصريح مسعود البرزنة من طلب من قوات البيشمرگة يدخلون حالة إنذار جيم، گال إحنا في حالة مواجهة عدوان !! أي زين لعد ليش جماعتك بعدهم گاعدين بمعسكر العدوان ببغداد لو إنكشفت اللعبة طلعت هذولة كلهم قنابل موقوتة لمثل هاي المناسبات؟؟ هو رئيس دولة العدوان بيشمرگي كاكا جلال وهمين أرجع وأگول رئيس أركان دولة العدوان بيشمرگي وقائد قوات دولة العدوان بيشمرگي.. بشرفي حتى باقوى أفلام أميتاب ماكو هيچ سيناريو.
وهمين راح أكبر الموضوع حتى يلم كل الغشمة، البيشمرگة قوات حزبية يعني الجناح العسكري لحزب كردي قومي متعصب، والمعروف بكل دول العالم وفي الأعراف الحزبية أن أي حزب معارض وعنده جناح عسكري من يصير بالحكومة يوجه بحل الجناح العسكري، إلا في العراق، أشو الجناح العسكري للاحزاب الكردية صار هو الحاكم الفعلي والقوة الضاربة بالعراق؟؟ شوفوا شين بين – الجناح العسكري في إيرلندا، حل نفسه من صارت المفاوضات – اي بس مفاوضات – وي لندن مو بالحكومة وإحنا نص الحكومة والوزراء السياديين ورأس الدولة من الاحزاب الكردية ومع ذلك الجناح العسكري الكردي بعده بكل حيله…الله يديم الغباء والغفلة…وخالد الشواني وكاك مه حمود ئوصمان حفظه الله ورعاه الوجه الباسم لكل القنوات العراقية والمنسق العام لما يطلبه المشاهدون والمستمعون وحتى ما تطلبه ماما من بابا.
يابة بلا قوات دجلة؟؟؟روحوا شوفوا إلكم قوات غفلة أحسن من هاي القشمرة…ورحم الله إمرأً عرف غفلته قبل ما يصير قشمر.
[email protected]