إحنا ماكو شي طيح حظنا غير لساننا، والعراقي يحب يسولف ويچذب ويطير أفيالة ويسوي من حبة گبة، والهيوات والكلاوات، وفوگاها ما يحفظ سر، أصلاً تصير عنده حساسية وجلده يحكه من عنده سر، لازم يطگه ويحچي، لأن ذاك هو مبين عنده سر، وهذا سبب إختراع لعبة المحيبس الإستراتيجية في العراق، هي في الحقيقة تمرين لتطوير الذات في حفظ السر إي وداعتك شي عبالك، بس وين، هناك بالجولة الخامسة ينكشف السر وينعرف المحبس بيا عظمة .
ومحد طيح حظ العراق غير أبو اللسان وتاجر النعلان، بعده كل شي ماكو ، ولا راح يصير أكو ، وطلع عالتلفزيون بيوم كذبة نيسان 1990، وشال بيده جداحتين مال شمعات نيون عالأساس جداحات نووية، ولك عمت عينك إذا صدگ، هسة حتى لو صدگ ليش تحچي وتگول ! لا والمصيبة هو دا يگول في مذكراته بالسجن إنو كان يريد يدخل الخوفة براس إيران ! أموووووووو داك، تاليتك الحفرة وتالي إيران راح تسوي القنبلة ولحد هسة ما حچوا وگالوا عدنا شي، دوخوا العالم رايحين جايين حتى الناس ملت وضاجت وگاللولهم سووا إللي تريده…يزي عاد…إي جون كيري حتى شوفوا چهرته، لبسوه بوشية يطلع يشبه بيبياتنا، بيبية بحلگها مزبن ترس صدر…يزي عاااااااااااد.
وبعد ما راح وكت وإجى وكت، صار السر ما يصير ينضم وجوباً وشرعاً، مو بكيفنا، لان إذا نضمه ننحسب على هاي الطائفة أو ذيچ المجموعة وجاي نضم السر لأغراض سياسية وإنتخابية وتجارية وتندرات وبكيفك بعد يا أغراض، حتى أغراض زيادة النسل، مثلاً المَرَة الله يحفظها ما تريدك هالليلة وما عدها مزاج، وهناك تسالها خيرچ شبيچ ؟ وتجاوبك ” عود أنت شريف وما تدري إشبي، ولك من وجهك مبين عندك سر وضام عليّ ” وأنت حتى تنقذ رجولتك وما تصير فلقة، تگول السر، وتتفضل هي عليك وتنطيك خمس دقايق تمارس حقك الزوجي بشرط القذف السريع، وبهاي الطريقة يزيد نسل العائلة بسبب العمليات التي تحدث بعد ما تطگ السر بحضن المرة !
ولكم يا خايبين الرجا والوطن وصالح المطلگ، أشوية سيطروا على نفسكم، النوب صايرة مودة، كل مسؤول وضابط حاط لنفسه تارگت معين من عدد اللقاءات التلفزيونية بالأسبوع ولازم يطلع على كل القنوات الصديقة والمتحالفة والعميلة والعدوة إذا كان يدفعون خوش فليسات، ولازم يجيب بكل لقاء سر
ويطگه عالشاشة ، ما عليه من أي شي، المهم يحقق ذاته ويحقق التارگت مالته، مثل إنضباطية أيام زمان، آمر المفرزة ينطي تارگت رايدين فرد خمسين جندي بالتسفيرات بالحارثية، وتعال شوف الحجج إللي يطلعوها الأنضباطية حتى يجيبون خمسين راس، مّرة لزموا صديقي نايب عريف سرمد ، تعال إنت ليش مزين وجهك قاطين وطالع كلش ناعم عبالك إبنية ! وآني أخذوني لأن زياني مو ناعم ! وثنيناتنا صعدنا بنفس الإيفا، وكان نشوف واحد لازميه لأن چان ياكل لفة فلافل بالعمبة، وشلون يصير ؟ يجوز العمبة راح توگع على ملابسه العسكرية وقيافته وتروح الهيبة، لازم ناكل الفلافل بدون عمبة حفاظاً على هيبة الجندية والعسكرية وتحقيق النصر المؤزر لنا والموت الزؤام لأعدائنا، أگول أحد منكم شايف الموت الزؤام؟ شنو شكله ؟ آني أعتقد الموت الزؤام ما يموّت لأن أشو صار لنا خمسين سنة نكتل أعدائنا الموت الزؤام تالي ذولاك هم مثل صل العربيد، لا موت ولا زقنبوت !
والمشكلة كلهم طيازتهم مكشوفة حالهم حال قرود البابون ما أعرف الفافون، المهم هذا القرد الضخم إللي طيزه برتقالي يخبل، كلهم هيچ وواحدهم يدعبل للثاني : طيزك برة تسكت لو أفضحك ؟ هسة ليش أكو سر ما إنعرف؟ أكو سر ظل ما مكشوف ؟ مو ولكم أدبسيزية حتى لون كساس نسوانكم عرفناها بسبب كشوفات عمليات التبييض وحتى عرفنا قطر الفتحة بسبب وصولات عمليات تضييق الفتحة إللي دفعناها إحنا من جيبنا حتى يتونس السيد النائب !
وتعال وشوف، بعدنا الشغلة خطة، بعدها ما نعرف شنو ولا وين، ويطلع قائد عمليات الطشت بلا تايد ، رتبة أطول من رگبة صلاح البحر، ويحچي ” راح نهجم بثلاث فرق، الفرقة المدرعة إللي يم الحوش، وفرقة المدفعية إللي بصف الگراج، وفرقة المشاة إللي براس الشارع، وراح نجيب قوات النخبة إللي دربناهم بمعسكر الحلة، وخلي أگوللكم معلومة، راح نستخدم أسلحة متطورة جداً جبناها من صربيا تدرون شنو هي؟ قذائف ليزرية إسمها عين البومة، ……” ويشتغل الفلم والإخراج، وثاني يوم يطلع هو نفسه ويگول ” شنّ العدو ليلة أمس هجوماً مباغتاً ” ! طاح حظ البعورة، وحظ المباغت آغا، ولك يا مباغت مو صار لك ست ساعات تحچي وتنطي إحداثيات ومطوبز للعدو ، شتريد العدو ما يجي ويقضي وطره منك ؟ ( هذا تعبير شرعي بحسب برنامج آداب المؤمن على قناة المهتدون ). والمصيبة أن القائد العام للقوات المشتتة يطلع قبل إثنين وسبعين ساعة ويعلن ساعة الصفر إشوكت للهجوم وإستعادة بيجي ! أگول هي مو هاي نفس بيجي إللي خمس مرات رجعناها ورفعنا العلم ودحرنا العدو بحسب تصريحات وزير الدفاع ؟ طبعاً إذا نظل نحچي ونسولف كل شي ما نقبض، ونفس الحال، من شهر سبعة وإحنا نسمع، بعد ثلاثة أيام راح نحرر الرمادي، وصار لون الرمادي أحمر من الدم وبعدنا .
إخوان السنة والشيعة طاح حظكم
كافة المكونات العراقية همين طاح حظكم إذا أنتو مكون ، من هذا ما عدكم حقوق بشر ولا إنسان لأن أنتو مكون مو بشر.
كلكم وآني همين وياكم طاح حظنا
خلونا نتعلم أشوية نسكت، أشوية مو هواية، شهرين وداعتكم، نسكت ، يعني حسبة من هسة لراس السنة، ما نحچي، ولا نعلن، وشوفوا شلون راح تمشي الأمور، اولاً كل القنوات الفضائية راح تعلن إفلاسها، ومن وراها الإحزاب إللي تمولها، ومن ورا الإحزاب السياسيين، ومن ورا السياسيين الفساد، وتجيك الحسبة، بس شهرين بلا كلام… عود ورا شهرين نوزع عليكم أسرار تخبل، روحوا طگوها بوجه العالم…
هل أنتم موافقون !!!
لعد الله الموفج
