آخيرا طلعت الحرب إللي سواها بوش وبلير على العراق مو چذبة…  وإحنا چنا نتصور الخطية طوني بلير أكبر چذاب بالتاريخ أو چنا نگول بوش أكبر كمش بالتاريخ لأن كولن پاول ضحك عليه…بس الله شعنده…تاليها طلعوا هذولة كلهم أوادم وإحنا الچذابين حاشا طوني بلير.
طلعت عدنا مفاعل نووي على شمرة عصا من بغداد..وطول هالفترة ما حاسين مثل كثير من الأمور إللي تصير بينا وإحنا ما نحس بيها إلا من توصل الحسرة للزردوم، مفاعل نووي عراقي بخبرات عراقية، لا خبرة باكستانية ولا هندية ولا كوريا الشمالية أو إيرانية.
مفاعل نووي عراقي بالأنبار!! وآني أتذكر من چم سنة گالوا منطقة عكاشات بغرب العراق كلها يورانيوم، بس ما چنت أتصور الحكومة تطلع لوتية بهالشكل وتنجح في بناء مفاعل نووي متنقل .بس بالعراق كل شي يصير..والعقلية العراقية إللي نجحت تشحن الموبايل بالشحاطة مو بعيد عليها تنجح تسوي مفاعل نووي متنقل Mobile Nuclear Reactor صنع في الدليم…يابة هاي الدليمية شتحمل من أسرار دولة !!
شنو السالفة مووووووووو؟؟
خلينا نبدي من بداية هذا المشروع العراقي إللي أنكشف بالصدفة قبل يومين، والبداية وي الوزير رافع العيساوي، إللي طلع وإشتكى بسبب إعتقال مئة شخص من حمايته…نعم مئة شخص من حمايته ومو كل حمايته للعلم والإطلاع رجاءاًً..بس مئة …بشرفكم لو مو رافع العيساوي هو الأسم الحركي لمفاعل نووي چا ليش الحكومة دا تخلي له اكثر من مئة شخص لحمايته؟؟؟ اكيد هذا يبول الماء الثگيل مال تبريد المفاعلات النووية ويطلع من ما أعرف وين اليورانيوم المخصب !! مفاعل نووي..يمشي ويتنقل ولا يبين عليه. بس آني كلش حاير من يجي هذا المفاعل – الوزير لإجتماع مجلس الوزراء…اكيد الشوارع كلها تدخل في إنذار جيم وحتى الأقمار الصناعية الاميركية تدخل في حالة تأهب لرصد تحركات هذا الجرم الأرضي المتنقل إللي لحد قبل يومين المخابرات الاميركية چانت حايرة…شنو هذا الجرم المتنقل من غرب العراق إلى بغداد مع كل هذه الحماية…بس حبل الچذب گصير والله يريد ينصر عباده الصالحين بوش وبلير وحتى كونداليزا رايس الطاهرة الصبورة على الإعلام إللي هاجمها وأتهمها بالچذب…حشاها وهي الطاهرة المحتسبة والصابرة على آذى الناس.
ومن تنكشف الچذبة تجر وراها باقي حلقات الچذب…ومن إنكشف المفاعل النووي إنكشفت وياه المختبرات النووية إللي تدعم هذا المفاعل، وطبعا همين مختبرات متنقلة ، مظهر الجنابي هو الإسم الحركي لمختبر مساند للمفاعل النووي العراقي وهذا المختبر الفريد والعجيب من نوعه يستاهل أقصى حماية..هذا المختبر (الجنابي) ما يمشي إلا وياه رتل عسكري لأن كلش غالي ومهم للعراق… بس الغشمة بالحكومة ما يعرفون أهمية هذا الجنابي بسبب نجاح التعتيم الأمني والتمويه والغش والخداع حتى لا ينكشف هذا المختبر العجيب للناس…ولهالسبب منعت سيطرة بغداد دخول هذا المختبر إلى بغداد بحماية الرتل العسكري…وهذا تقصيرإستخباراتي..كان لازم ينطون خبر تحرك هذا المختبر من الانبار إلى بغداد حتى يسمحون بدخوله برتل الحماية إلى بغداد، بس إحنا نظل هيچ ما نعرف كنوزنا ولا أهمية مصانعنا ومختبراتنا، ضيعنا المتحف الوطني بسبب ماكو حماية النوب تريدون نضيع مظهر الجنابي؟…صدگ ما تستحون..العفو مظهر رتل…أقصد مظهر الجنابي ومن حقك تسوي مؤتمر صحفي وتگلب الدنيا والصحافة لأن سيطرة بغداد منعت دخولك وي الرتل مالك وخطية دخلت بغداد بتاكسي !! إشوكت نتعلم!
وطبعا نواب مجلس النواب العراقي همين ثروة عقلية وسياسية وفكرية چبيرة…يعني كل واحد بيهم يستاهل رتل حالهم حال زميلهم مظهر الجنابي، 325 نائب بالبرلمان كل واحد يستاهل رتل، والرتل العسكري ما يقل عن ثمانية سيارات مصفحة وسيارتين بيكب وحدة بالأمام ووحدة في نهاية الرتل شايلة بي-كي-سي ، وإذا نعرف أن ثمن سيارة مصفحة (لاندكروز) ما يقل عن 150 ألف دولار، شوفوا الميزانية الامنية المخصصة لهذولة النواب النوام ! وإذا بكل رتل حماية ماكو أقل من ثلاثين حماية، فشوفوا الدور الإقتصادي الكبير إللي يقوم بيه مجلس النواب في تشغيل العاطلين عن العمل وإذا أجى أي واحد وگال آني عاطل عن العمل وما لاگي شغل أشتغل..أگول يا أنت ما تعرف تنيشن زين، يا أنت ما عندك أمانة وما حد من النواب أو الوزراء دا يأتمنك، يا أنت مو عراقي، لأن بسبب وزرائنا ونوابنا وأفواج الحماية وأرتال الحماية والطوارىء مالتهم ما أظن ظل واحد بالعراق ما عنده شغل.
ولان أكو مشاكل بين الجماعات السياسية ومن تكثر المشاكل بين السياسيين تضيع الأسرار لأن المصلحة الحزبية أهم من الوطن، فأكيد راح نشوف هواية أسرار، راح ينكشف المختبر البايولوجي العراقي ومو بعيد إسم هذا المختبر هو ناهدة الدايني..أو السلاح الكيمياوي المزدوج وإحتمال يكون أسمه عمار الحكيم أو المدفع العملاق وأعتقد راح يكون أسمه عبدالغفور السامرائي صاحب مقولة (خير الناس من سرق الناس)، وراح تنكشف أماكن هذه المختبرات المتنقلة وطرق وخرائط تحركها، حتى نتأكد تماما أن حرب بوش وبلير على العراق كانت حرب مبنية على وقائع مو على أفيالة طائرة…لأن الفيل الطائر حيوان يعيش بالعراق فقط.
يا حكومتنا…ديروا بالكم على ثروات الوطن…المفاعل النووي العيساوي والمختبر النووي الجنابي وباقي الأسرار المضمومة.
[email protected]