عمران أكبر جذاب بالنعمانيه وكل اهلنه أيعرفوه…كال اكو واحد لكه مصباح سحري , ورجع بيه للبيت , وبعد ما مسحه, طلع واحد كاله شبيك لبيك .. ما صدك, كله, اريد جسر من النعمانيه لحد بيت اوباما .. كاله, هذا صعب.. كاله, زين اريد ايصير بالعراق امان واستقرار.. كاله شوف تريد الجسر طابق لو طابقين..
صلاحيات صدام مو نفس صلاحيات المالكي !! لا تعفطولي من البدايه ولا تجتثوني .. وره ما تقرون موضوعي , أنتو حكمو.. العباس عليكم , مو جان الدكتاتور صدام حسين أيحل مشاكل الناس اللي جان أيقابلهم واللي جان أيزورهم بالبيوت ,مو بنظره منه , وحميد حمود أيسجل .. لو بالتلفون كلشي ينحل وما يحتاج أن أيسوي لجنه ..وزوج اللي ما ينفذ كلام صدام .. ويمكن هوايه من شيابنه أييدوني .. ونوري المالكي عنده نفس صلاحيات صدام .. وهسه مو مثل كبل .. هسه بالموبيل , تكدر شكو مشكله صايره تحلها .. تجي للمظاهرات الصايره بالرمادي والموصل وصلاح الدين ..شيريدون المتظاهرين .. أطلاق سراح المعتقلين اللي القضاء أطلق سراحهم .. بسيطه بالتلفون , حسن الشمري .. أبويه عندك معتقلين ومعتقلات خلاصنه مدتهم .. أريدهم اليوم يم أهلهم .. وباجر الصبح , عندي زياره ألوزارتك , حتى أشوف كلشي تمام .. أذا ما نفذ أصلخه بوكس ورجعه للفضيله .. وكدام قناة العراقيه والشرقيه والبغداديه .. كول , هذا الوزير ما نفذ الاوامر القضائيه اللي صدرت بأطلاق سراح معتقلين , يعني معناها , أنو هذا الوزير يبتز المعتقلين ..وأني سويت ما يمليه عليه ضميري .. شوف الشعب شلون ينكلب على الفضيله وأنت تصير فوك .. بعد شيريدون المتظاهرين .. قضيه المخبر السري .. تلفون للقضاء .. خلال تلثتيام , شكو قضيه بيها مخبر سري , يجري أطلاق سراح المشتبه بيه .. بس اللي ثابته عليه الشغله وفق القانون ..الشعب من أيشوف أكو متابعه من رئيس الوزراء , كل الوزراء الهتليه راح ينجزون ما عليهم .. لان ما يريدون يخسرون موقعهم .. والاحزاب تصير عدها خوفه منك.. بس أذا أنت ضعيف , الاحزاب تركبك والوزراء بكيفهم يلعبون, وأنت الخاسر الوحيد بالعمليه.. تجي للخدمات.. أول شي الكهرباء , تروح للوزاره وامام الكاميرات , وتلزم وزير الكهرباء وتضربه جلاق عراقي, وتكعده بحضن علاوي , ودكله , أنعل أبو رشحك للكهرباء.. أذا صدام حسين خلال ست أشهر رجع الكهرباء للعاصمه وقراها واريافها , أني أنطيك تلاثتشهر, أبوك أصمطه , أذا ما أشوف بغداد والمناطق المحيطه بيها منوره.. خوش.. وكلشي أتسوي.. خليها كدام الشرقيه والبغداديه..وتروح أتشوف أمانه بغداد.. دكله بعبوع لو عبعوب.. الشهر أربع أسابيع, كل أسبوع بمحافظه.. شكو زباله وشكو بحيرات من وره المطر لو المجاري.. أريد أبيدك تشتغل.. وتنظف ويه العمال, وتقدملي تقرير أسبوعي.. تره والله ما تحتاج الى أن تسوي لجنه وبيها الشهرستاني وهادي العامري, وشلون أثنين تحفه.. بيدك أبو سراوي.. الشعب أيحب الخفيه..وأذا الشعب حبك, خلي أيحدد البرلمان ولاياتك..
وصدكني يا دوله رئيس الوزراء.. الامان والاستقرار تره ما أيخلقه تواجد الجيش والشرطه وحواجز وسيطرات ولا كتل كونكريتيه.. هاي كلها قشمره وضياع وكت.. الامان أحساس يتولد عند البشر , ويجي من صدق حكومتك وأصرارها على توفير هذا الامن, مو بالوعود الجذابه ولا بسرقه المال العام.. نعم صدام ,جان أيبوك ,ودكتاتور ودمر العراق وضحى بالعراقيين , بس بنى جسور وخط سريع ومدارس وجامعات ومستشفيات, ومحى الاميه , وخلق أمان بالشارع وبالبيت وسوى معالم حضاريه قسم منها تفلشت بفضل أصدقاءك , أعداء الحضاره المتخلفين بكلشي.. بس بشرفكم منو ديمقراطي ومنو دكتاتور!!
وما خفي كان أعظم
