يابة آخيراً فهمنا سالفتنا إللي چنا دايخين بيها خمسطعش سنة، وطلع الجواب بسيط جداً أبسط من العفطة. وشگد إرتاحيت بعد أخصص وكتي مو للدوخة، الدوخة ما جابت شي، راح أخلي الوكت الجاي كله للضوجة.
أبد بعد ماكو سالفة الكهرباء، لأن طلع عدنا ما يعادلها، مو لازم كهرباء باب أول إذا عدنا شي يعادلها، أصلاً من نچرچب هالشي ونعلگه محد يعرف الفرق عن الصورة الأصلية أو ما يعادلها، بشرفكم تعرف تفرق شحن الموبايل من كهرباء الوطنية أو من كهرباء المولدة ؟ إذن كهرباء المولدة هي ( ما يعادلها ) للكهرباء الوطنية.
وبعدين ماكو داعي نگلب الدنيا ونگول ماكو ماي والأنهار نشفت، لأن عدنا ما يعادلها، إذا أنهار الماي توقفت عدنا أنهار الدم ما تتوقف، تگدر تفرق كلمة ( أنهار ) شنو الفرق إذا بعدها تجي ( الماي ) لو ( الدم ) ؟ ماكو أي فرق، يعني هذا بذيچ، أنهار الماي أو ما يعادلها أنهار الدم، وهذا إنجاز إلنا لأن أسقطنا خرافة الخدعة إللي تگول الدم ما يصير ماي، وأكدنا أن الدم حتى يصير بولة بالشط الناشف لتعويض الماء.
وعدنا قوانين أو ما يعادلها، شنو فرق بين جلسة تحت قبة الپرلمان وجلسة فصل تحت خيمة الديوان؟ شنو الفرق بين قانون العقوبات وقانون الفصل العشايري، تگدر تفرق إذا واحد إنقتل بسبب غضب حماية نائب بالپرلمان عن واحد إنقتل بسبب غضب حماية شيخ العشيرة ؟ إذن عدنا قوانين أو ما يعادلها ، بعد لا تظلون تبچون بوجه إللي يسوى وما يسوى وتگولون كلها فالتون ماكو قانون.
وعدنا وزارة الصحة أو ما يعادلها، شنو الفرق بين الپاراسيتول من صيدلية لو الپاراسيتول من بسطية عالرصيف، ثنينهم نفس الحجم ونفس التأثير على الصداع وألام الدورة الشهرية أو الدورة الپرلمانية؟
عدنا بيوت أو ما يعادلها، شنو الفرق بين بيت من طابوگ لو خيمة بالمخيم؟ بالحالتين ماكو أنترنت، والباب ياهو يدفعه يدخل، والبيت مستباح والكهرباء عالتواسيل، هنا تبوس إيد أبو المولدة وبالمخيم تبوس قندرة أبو المخيم حتى توري لطفلتك گلوب بيه ضوة وتگوللها شوفي بابا هيچ شكل الگلوب واوا ولا تمدي إيدچ، ومن هاي الدولة خافت علينا وطفتْ الگلوبات حتى ما ننتل أو ننچوي.
وعدنا أوطان مو وطن واحد، أو ما يعادلها. صرنا تحت كل نجمة وبكل مكان، شنو فرق الگمر إذا نشوفه في بغداد أو في كوبنهاگن أو بيرن أو أوكلاند لو مونتريال، نفس الگمر بس إحنا وجه فگر ونحب نلطم ونردد ” عندي لأجل فراقكم آلامُ فعلى ما أعذلُ فيكم وأُلامُ”، وشنو الفرق بالموت إذا واحدنا يموت ببغداد لو يموت بپاريس أو لندن؟ نفس طيحان الحظ وإسمك ينمسح من كروپ الواتساپ وبالحالتين أصدقاءك ينزلون ( حداد ) بالفيسبوك.
عدنا رواتب أو ما يعادلها بعد الإستقطاعات، وعدهم همّ رواتب أو ما يعادلها بعد إضافة الإمتيازات والمخصصات والمكافآت والحوافز . عدنا حياة أو ما يعادلها من الحسرات والضياعات، همّ عدهم حياة أو ما يعادلها في الأحلام، قصور ما دافعين بيها فلس، مزارع وضع اليد. عدنا جهنم أو ما يعادلها بالصيف والحرارة فول أوپشن وأبو المولدة زعلان، وعدهم الجنة أو ما يعادلها من سفرات وحفلات ولا حساب ولا عتاب من أي أحد، كلوا هنيئاً بما أسلفتم في الأيام الخالية ، صدگ من چانت جيوبهم خالية .
عدنا ضباع أو ما يعادلها، عدنا مطايا أو ما يعادلها، عدنا حديقة حيوانات مفتوحة أو ما يعادلها.
وباچر من نتحاسب على هذا العمر، نگول إحنا ما عشنا عُمُر حتى تحاسبونا، إحنا يا دوب فتحنا عيننا عالحياة أو ما يعادلها، وظلم نتحاسب على هاي الغمضة وغيرنا صار نائب بالپرلمان بشهادة إعدادية أو ما يعادلها.
