مقدمة قبل الفلم:
قبل سنة بالضبط كتبت هاي المقالة ونشرت في 6 آب 2011، وداعتكم كل شي ما تغير، وهاي المقالة زمانسز تتحدى السنوات، يعني نگدر نقراها بعد خمسين سنة ، لأن إحنا هيچ، فقط أكو فقرة سويتها تحديث سنوي وراح تقروها. وهمين العنوان غيرتها لأسباب آرشيفية.
……..
صح…طولت الغيبة عليكم بس لا يظل بالكم لأن لا عندي غيبة صغرى ولا غيبة كبرى، وبعدين وين راح أروح… گاعد مثلكم أنتظر رحمة رب العالمين بلكن يرسل علينا أرضة تاكل الكراسي حتى نخلص من هذا الهم والقشامر… مثل ما صار وي الملك سليمان و “ربي هب لي ملكاً لا ينبغي لأحد من بعدي” .
 
والموضوع يا إخوتي في الضياع…إن النوم سلطان والهوى سلطان على رأي أبو وديع جورج وسوف، يعني هاي الغيبة مالتي لأن چنت نايم نومة الذين كفروا بالإنتخابات وللسياسيين هم يلعنون… أولئك على هدى من عقلهم وأولئك هم النائمون المرتاحون رغم أن ماكو كهرباء والدنيا دا تمطر موت أحمر من الحر العراقي المنعش…خوش دفو… من تفووووووو على الچهرات إللي ببالي وببالكم !!
 
وإذا تريدون تنامون نومة طويلة المدى مثل صاروخ شهاب 3، فلازم تسوون فورمات لدماغكم ولإهتماماتكم، والشغلة ما تحتاج غير كاسة جاجيك على شرط خيار تعروزي… ولبن محمض بس دخيلكم مو لبن أربيل لأن أخاف كاكا مسعور يطالبنا بتعويض مادي ومعنوي لأن نستخدم اللبن المقدس في گعدة غير مقدسة، وكاسيت ياس خضر بس بيه أغنية تايبين لأن صدگ الجماعة توبونا…و بطل حليب سباع ولو ما ظل سباع بالعراق…هاي هي مستلزمات الفرمتة للعقل العراقي المليان قهر وندم.. وطبعا داعيكم سواها…بس الظاهر أشوية چثرت التعروزي بالجاجيك لأن نمت نومة حتى شفت أهل الكهف بالحلم دا يتعاركون وياي ويريدوني أگعد حتى لا أكسر رقمهم القياسي المسجل بأسمهم في موسوعة غينيس للأرقام القياسية بإعتبارهم ناموا أطول نومة.
 
شفت… يا ساتر يا رب…آني مرتاح وكلش خفت لأن هذا يعني إللي دا اشوفه بالحلم مو آني… يعني العراقي وي الراحة مثل الحية والبطنج بحسب المواصفات الرومانسية القديمة أو مثل إمارة موناكو وحي البتاويين بحسب المواصفات القياسية الجديدة… يعني ماكو إي قيطان يربطهم … والظاهر همين جماعة الگعدة جايبين دولكة ماي بارد بس من وين دبروها ما أعرف ودايرين الدولكة على راسي بلكن أصحى… بس داعيكم من ينام بعد وجبة جاجيك ترى القبيس ما يصحيني مو النوب دولكة ماي… ولو دولكة ماي بارد ينرادلها سلام خذ في هذه الأيام الجايفة.
 
شفت نفسي كلش مشغول والناس مخبوصين بي لأن أكتشفت لغة الفريطالمارومية *… والناس إللي آني چنت عدهم چانوا كلش فرحانين بهاي اللغة لأن بعد غباء سياسي ما اعرف صار له چم مية سنة إجاهم واحد عربنجي ضبط اللغة مالتهم.
 
وبعدين أشوية صفنت زين…أشوف هذولة الجماعة آني ما شايفهم لا بباب الشرجي ولا بالنعيرية أو حتى بالچوادر إللي آني عبالي كلشي ألگي بيها، يعني هذولة الناس إللي چانوا يريدون لغة الفريطالمارومية چانوا أوادم… وكل واحد لازم بيده باكيت نستلة… ولا شفت نستلة تشبه صاحبتها يعني كل واحد شايل نستلة شكل، وبعدين أشو كل واحد لابس ساعة شكل… أوميگا… لونجين…رادو…رولكس..بريتلنج…وهمين ما شفت ساعة تشبه أختها….وأكو شي غريب أشو بهذولة الناس…عباك العم نوبل ولد خالتهم أشو ياهو ألزمه يگول لي ترى آني فايز بجائزة نوبل…. يعني تماما مثل حالتنا بالعراق ياهو تلزمه يگول لك آني الفايز بالإنتخابات وطبعا إشگد فرق بين الإنتخابات وجائزة نوبل….والله الإنتخابات توكل خبز إلك ولعشيرتك لفترة غير محددة بحسب الدستور، وجائزة نوبل توكل حامض حلو… هذا إذا عرفت شلون تسوق نفسك… وكلش أنقهرت عليهم لأن عايفين الدنيا ويهتمون بجائزة ما إلها وزن في الميزان الإنساني ولا الحضاري… يعني بشرفكم جائزة نوبل وين وجائزة هزي يا نواعم وين !! ، وهذولة الناس إذا ما انطيهم اللغة  الفريطالمارومية راح يضيعون لأن بعد كل هاي السنوات إللي عاشوها بيناتهم هسة طالعين ببلتيقة كل واحد يريد لغته هي المكتوبة في الجواز أو في لافتة البرلمان مالتهم أو في العملات الرسمية أو في النشيد الوطني مالتهم، وبعدين هذولة الناس 26 أقليم (هم يسمونه كانتون)، بس أنقهرت عليهم لأن ما واصلتهم التجربة الكاكاوية الفذة يعني بس عدهم لجنة أولمبية وحدة وعلم واحد، خطية غشمة، خلي يتعلمون من الكاكاوات … يعني آني معلوماتي الأولمبية الرياضية ما تتعدى فوز عبدالواحد عزيز بالميدالية البرونزية في أولمبياد روما، بس أعرف إن أكو لجنة أولمبية وحدة بكل دولة عدا العراق عدنا لجنتين أولمبية… يعني بأولمبياد لندن راح يصير وفد عراقي شايلين العلم العراقي إللي طارن النجمات مالته، ووفد كاكاوي شايلين علم دولة مهاباد الإيرانية إللي كان كاكا ملا وزير الدفاع بيها قبل ما تسحگها الجيش الإيراني أيام الشاه (إضافة وتحديث سنوي: هذه ما حصلت مو لأسباب وطنية بل لأسباب تنظيمية لأن الجماعة رادوا فلوس البعثة الأولمبية الكاكاوية من حكومة بغداد وما حصلت الموافقة والتخصيص المالي، إلى ذلم نستعري إنتباه الغشمة).
 
وبعدين هذولة الناس إذا عدهم شي يريدون يبيعوها للدول إللي برة، أشو عدهم طمبغة وحدة على كل بضاعتهم…Swiss Made على ساعتهم وعلى نساتلهم وعلى الأجبان مالتهم وحتى على اللواعيب مالتهم، وماكو أي خلاف، ولا فرد يوم واحدهم گال هاي الساعة إحنا نسويها عدنا (اكو عدهم مدينة أسمها زيوريخ) ولازم نخلي عليها طمبغة (صناعة زوريخ) ولا فرد يوم واحدهم گال هاي النستلة نصنعها في بازل (هم أسم مدينة عدهم)… يعني مو مثلنا من لگى المسعور الكاكاوي كاك مال نفط بباب الحوش مالته أخذه ملك خاص لآل الطرزان مالته…وإحنا عدنا الطرزانية تمشي لأن عدنا قرود هواية… ومن هذا آل طرزان شغلهم ماشي بدولة الكاكاوات…بس إحنا بالعراق الديمقراطي الحر الفيدرالي يمكن راح يجينا فرد يوم نصدر قندرة عراقية ماركة عالمية هي ماركة (عفج) ونكتب عليها (صناعة عفجية) في تحدٍ كبير للمثل إللي ظل مچلب بإخواننا العفجيين من نريد نقيم الرگاع وعبالك تحدي أزلامي من تحدينا طيارة الشبح إستليث بعوچية الراعي بالچول.
 
المهم… صارت اللغة الفريطالمارومية هي اللغة الرسمية للبلد إللي شفت نفسي بيها…وهسة الجماعة دايخين شلون يعلمون أطفالهم هاي اللغة المعقدة لأن داعيكم كلش معقد ودمرتهم بهاي اللغة… ولو الحلم أشوية مستمر أكثر چنت أبيع كلاو عراقي براسهم وأسويلهم علم يخبل… من كل قطر أغنية ومن كل عشيرة علم، بس صحيت من النوم على صوت المبردة تعيط لأن ما بيها ماي
 
عموما أحبائي….ترى واحدنا من ينام بالصيف ورجله گدام المبردة، ومن يگوم السنتر مال الواتر بمب وما يصعد الماي للحلفة، ومن يگوم السربست يفتر بجهة والقايش بجهة…. نگوم بذيج اللحظات نترحم على الأيام إللي چنا عبالك بسويسرا… مو بس نحلم بيها بحلم منتصف صيف عراقي…. وإللي أفتهم السالوفة نغني له شاطر شاطر…صوت بدون صورة لأن نانسي الحلوة تعبانة !
 
الهامش:
 
* الفريطالمارومية: كوكتيل مال اللغات  الفرنسية والإيطالية والألمانية والروماتشية..وماكو داعي أگول بيا دولة…يعني أخاف راح ببالكم على سويسرا… أعوذ بالله من غيبة الناس…بس آني قصدي العراق… لأن الجماعة من أجوا گالوا راح نسوي العراق مثل سويسرا…فمو غريبة راح نتكلم اللغة الفريطالمارومية… ونشوف كل العالم بعيون سويسرية !
 
[email protected]