آآآآآآآآآآآآآآآآآخ بطني….آويلي….بطنيييييييييييييييييي…مو عبالكم ماكل بامية ومنفوخ…لا…بطني راح تطگ من الضحك وآني دا أسمع حملة الواوية على قناة العراقية ضد تركيا…بالأول ألعن ابو تركيا لابو أبو أردوغان…بس تعالوا نشوف ليش راح أطگ من الضحك.
قناة العراقية تذكرت مذبحة الأرمن هسة بعد يومين من تصويت برلمان ساركوزي على قانون بخصوص إبادة الأرمن، رغم أن الأرمن موجودين في العراق وفي باب الشرجي أكو مدرسة الأرمن ومقبرة الأرمن ، ولا أكو وزير أو مسؤول في الحكومة العراقية أرمني…وتخصص قناة العراقية من ثلاثة أيام ربع ساعة في نشرتها الرئيسية المسائية لمذبحة الأرمن إللي هي دا تگول أن الدولة العثمانية أرتكبتها في نهايات إحتضار الأمبراطورية العثمانية وي عبدالحميد الثاني، يعني قبل ما يقارب مئة سنة، وتنسى هذه القناة أن تفتح ملف مذبحة حرب الخميني إللي ضخيتها من العراقيين هي نفس رقم ضحايا الأرمن في المذبحة العثمانية، أو خلي قناة العراقية تخصص خمس دقائق كل يوم عن سيرة ضابط عراقي بطل قاتل وقتل في الحرب ضد الخمينية…تگدر لو تتجرأ على ذلك لو يجي دونائي فر ويفرهم  فر ويفرك أذانهم قبل ما يشلع خصاويهم…لو يجي هويدي العويمر الضابط في فيلق قدس ووزير التاكسي في حكومتنا المؤخرة ويگلب الدنيا على قناة العراقية شلون تتجرأ وتطلع صور مجرمين (إللي هم الضباط العراقيين الشهداء الشرفاء) وتطلعهم في النشرة الرئيسية وتنسى مذبحة الأرمن؟
وبعدين…آني ما أفتهم شنو موضوع الملابس الداخلية…أقصد الشؤون الداخلية…لأن إحنا أساسا ما عدنا داخل حتى تصير عدنا شؤون داخلية والدليل ما عدنا وزير داخلية، وكل واحد ماخذ راحته بالدخل ويلعب بالدخل ويضرب بالدخل…گالها أردوغان …گال آني أحق من بوش وأميركا أتدخل بالعراق لأن عندي حدود وي العراق وعندي مشاكل مشتركة مثل الاكراد وتهمني قضية العراق مو مثل أميركا إللي جبتوهم( والكلام لأردوغان الطيب) من وراء الأطلسي حتى يتدخلون بشؤونكم ويغيرون النظام…مع العلم أن أميركا ما عدها حدود وي العراق….إنتهى كلام الطيب.
وقناة العراقية حتى تخدع المشاهد وتدفع عن نفسها الطابع الإيراني في أخبارها ..مثلا أخبار أحمدي نجاد تجي بعد خبر مجلس الوزراء…فصار لها يومين تگول بنهاية تقرير مذبحة الأرمن والتدخل التركي في العراق …أن العراق يرفض أي تدخل من تركيا….ويسكت المذيع نص دقيقة ويباوع على المخرج…ويبلع ريگه أخاف هويدي العويمر گاعد ويتفرج على النشرة…ويكمل المذيع …ويشمل إيران…وفاصل إعلاني ونواصل.
وبعدين…ليش حكومتنا المؤخرة هسة تذكرت أن تركيا مو خوش؟؟؟  تركيا مو خوش من الأول مو هسة تجي حكومتنا المؤخرة ومخابراتنا (إذا عدنا مخابرات) وتكتشف أن تركيا مجرمة…هاي لأن حكومتنا تريد تزعج تركيا بلكن تركيا تشيل إيدها من سوريا…يعني حرب بالوكالة لعيون إيران وعيون بشوري المجرم..وخاصة بعد ما زادت الضغوط على دمشق…فماكو مجال للتنفيس وتهريب الأسلحة إلا من خلال العراق…بإزعاج تركيا…والإعلام بمشاكل صار لها تسع سنوات…تسع سنوات وتركيا تتدخل في السياسة العراقية…بس لأن هسة الشغلة صارت طوق نجاة لبشوري…فأجت الإشارة من الجنرال سليماني ومن دونائي فر ومن أحمدي نجاد بشن حرب على تركيا وكالة عن إيران وسوريا.
ولكم غشمة خوما غشمة…خلي نشوف تركيا شتگدر تسوي…مثلاُ غلق أنبوب النفط العراقي من كركوك إلى جيهان…يعني حرمان العراق من تصدير 35% من نفطه…وفي حالة غلق مضيق هرمز…يعني خنق العراق تماما…لا نفط من الشمال ولا من البصرة…ثم…غلق وتحويل مجرى نهري دجلة والفرات…إللي يسبب خلل في المجتمع العراقي إللي دا يعاني أساسا من الجفاف السياسي والمائي والاخلاقي ويعاني من فراغ الريف وسعر الرغيف…أو إتفاق وي الأكراد تنطي أنقرة على أساس هاي الإتفاقية ضوء أخضر للأكراد بالضغط على حكومة المركز أكثر وأكثر حتى إسقاطها لأن تركيا عدها حدود مفتوحة وي الاكراد …حدود صعبة…أنقرة تسوي أتفاق وي مسعود المبادراني…بخصوص حزب العمال التركي…ومقابل ذلك دعم كامل لأربيل ..إقتصاديا وسياسياً.
وبعدين…إذا قناة العراقية تتحدث عن مذبحة الأرمن (إللي إرتكبتها الدولة العثمانية) رغم أن أردوغان جمهوري ومن يوگف لازم صورة أتاتورك وراه…فمن حق تركيا ما دام العراق دا يعاملها على أساس بعدها الدولة العثمانية…من حقها تطالب وتعامل العراق مثل ما كانت حالة العراق أيام الدولة العثمانية…ولاية تابعة للإمبراطورية العثمانية …ومن حق الباب العالي أن يتدخل في شوؤن أي ولاية…والعراق كان ولاية….
مو أگللكم بطني راح تطگ من الضحك…وأحلى نكتة…ان كتكوت الامير…قصدي كتكوت عزيزي عزوز…راح وگعد وي أردوغان الطيب …وگال إحنا مستعدين لتصدير (نعم أنتبه على الكلمة) تجربتنا الديمقراطية إلى باقي الدول…لأن كتكوت الامير متربي في إيران ومتشبع بكلام شارب السم المقبور خميني إللي راد يصدر الفستق الإيراني..والثورة الإيرانية…وما أعرف شنو نوع التجربة الديمقراطية إللي يريد يصدرها كتكوت العزيز، وأحلف بألف عمامة (حتى الصفر محسوب) إذا كتكوت العزيز يعرف شروط التجربة…ويعرف منهجية إجراء أي تجربة…بس هو لأن سامع هاي الچلمة فطگها بوجه أردوغان…شنو شروط التجربة عد هذا العفن…ماي مغلي…بريمز….دبة غاز….گونية جريش…حتى تنجح هريستنا الديمقراطية…هاي خبرة كتكوت العزيز.
هههههههههههههههه…آآآآآآآآآآآآآآآآآآآآآخ خ خ خ بطني…..التقرير القادم لقناة العراقية هو عن تدخل أنقرة في نتائج نادي النجف في دوري الطوبة…خاصة بعد تغيير مدرب النادي لأن يگولون المدرب السابق چان عميل لأردوغان …آآآآآآآآآآآآآآآآآآآآ خ خ خ خ  ههههههههههههههه بطني……يمعودين بلا بتشريب بامية رجاءاً.
[email protected]