أخلاق نهي نهي

صدگ الناس مستوية وما تعرف شنو من شي ولا الفرق بين المص والمس، شوفوا وسمعوا شنو يگولون ؟؟ يدورون على أخلاقيات بالحرب!! ولكم صدگ ؟؟ ولكم هو قرار الحرب لحظة إفلاس أخلاقي، ومحد يتخذ هذا القرار إلا واحد ساقط أخلاقياً ويجوز حتى ساقط بالتاريخ والجغرافية، وطبعا وأكيداً وحتمتاً ساقط بالوطنية حتى لو عنده مدرس خصوصي أمريكي أو روسي، ما يفيد وداعتكم حتى لو قرار وعبور وخمسة بالمية مال أصدقاء القائد وخمسة بالمية مال إتحاد الطلبة وخمسة بالمية مال يوم القدس، كلها ما تفيد، ذاك هو ساقط بالوطنية.
جايين يريدون أخلاق بالحرب…أگول أكو مجال أعفط لو لا ؟ شكراً : طيييييييييييط
يعني أكو أخلاق بواحد يروح يقتل بني آدم مثله ؟! يا أخلاق !! أتذكر أول يوم رحنا للجيش، بعدنا بباب النظام ولابسين ملابس مدنية، كل شي ما مسوين، استلمونا الربع چلاليق ودفرات وتفالة وفاصل إحترامات تبدي من ” ولد الزفرة ” وتصعد بحسب الأهمية ! إستلمونا…يابة شكو ؟ خالة شكو ؟؟ ويجيك الجواب : “حتى تعرفون ماكو كرامة بالجيش وتنسون ماكنتوش وحضن ماما ! ولد الگحاب جايين صايرين براسنا أوادم وخريجين ! أنسوا كل شي، خلوا إنسانيتكم هنا بباب النظام برة المعسكر ولا تدخلوها وياكم، دخلوا للجيش وأنتو ناسين شي أسمه إنسان وكرامة وأخلاق ” … إنتهي الإقتباس من كراس النايب ضابط غضبان فرحان….هذا إسم حقيقي دليل على إزدواجية الشخصية العراقية.
وهسة يطلع لي چم واحد ويگول هذا تعدي عالجيش، أخلي إصبعي بعينه وإذا أكو مجال بغير مكان همين بشرط غاسل ونظيف  وأگول لا تبيع براسي وطنية، ترى كتاب الوطنية صفحاته صارت أچياس لفات فلافل، ماكو جيش بعقيدة أخلاقية، من جيش يوليوس قيصر وجيش كسرى وجيش محمد وريتشارد قلب الأسد ومحمد الفاتح ونادر شاه وجيش مارك أرثر وهتلر وباتون وموسوليني وبكر صدقي وعبدالكريم قاسم والأخوين عارف  – عبالك البلد محل قندرة لصاحبه الاخوين عارف – وجيش البكر وجيش صدام وجيش البيشمركة والمليشيات وجيش عبدالله أوجلان ” أي لازم نذكره حتى لا يزعلون” وجيش المهدي وكل الجيوش العربية وحتى بالكارتون…جيش كوكب فيگا وگوثام…كلهم بلا عقيدة أخلاقية…ديروا بالكم ترى ما گلت بلا أخلاق حتى لا تسوون طلابة ومحاكم ترى آني همين أعرف ألعب مو بس رونالدو يجيب خمس أگوال على غرناطة …ركز وياي گلت وأگول بلا عقيدة أخلاقية…أووووووف تذكرت ثانوية العقيدة…خرة بالحظ شيجيب شيش لية  للي عنده كوليسترول. أي هذولة كلهم بلا عقيدة أخلاقية تجبرهم على إتباع سياقات ” بشرفكم شلوني” بيها أخلاق، لأن كلها جيوش سلطة والسلطة ما تفكر بهيچي قيم، هي كل همها ” قال القائد المؤسس أو قال الرفيق أو حتى قال الرسول” ! كلها ترمز للسلطة.
يعني مو هسة تجون و تدورون بالخرة حب رگي ! والخرة هنا تعني الحرب وحب الرگي هنا أخلاقيات، فيمعوديون ويمعوديات بلا لواگة رجاءاً ، مو تريدون واحد مسموط ومگسب ويصير نيسلون مانديلا ، ولكم تعالوا أگول لكم سالوفة مال  شغلة فتح مكة، واليوم يوم الملحمة ! ترى صدگ صارت ملحمة، ، هو كسر ” الأصنام” بنص الكعبة مو ملحمة !!! مو الشغلة هي نفسها إللي سوتها عصابات البغدادي بالموصل ؟ !! ليش بالموصل جريمة وبمكة مو جريمة !! للعلم ” الأصنام ” إللي چانت موجودة بنص الكعبة كانت تؤرخ لحضارات سابقة وچانت عمر هاي الأصنام ألاف السنوات من عهد إبراهام وعندك حساب ! وصدگوني چانت تصير ملحمة وذبح لو مكة غير مدينة بس محمد بن عبدالله كان يحب مكة وأهل مكة، يعني لو داخل للطائف كان يذبحهم ذبح ما صاير إنتقاماً للإستقبال السيء وطرده من الطائف !! هاي حقايق تاريخية بس إللي يريد يسد عين ويشوف بتك عين يگول كان فتح مكة يوم مرحمة !!! عمي ترى الواسطات والمحسوبيات حتى عد الأنبياء، تعال شوف شلون هارون بالواسطة صار نبي في أول حالة إستغلال نفوذ موثقة بالتاريخ البشري ” رب إجعل لي وزيراً من أهلي. هارون أخي ” ! هاي مو إستغلال نفوذ؟  يابة صيروا موضوعيين، ترى ماكو شي پيرفكت، بس نظروا للأمور نظرة مو عاطفية ونظرة ما تحكمها إنتماءكم !
ذكرت هاي الأمثلة حتى تصير مثل السطرة والراشدي على وجوه المزايدين وإللي يريدون أخلاقيات، من نعلة على المزايدات، هسة أكو أخلاق بأي دربونة بالعراق ؟ لو أكو أخلاق چان نقبل على هذا الوضع؟ ! وهذولة ترى صدگ صايرين نريد حار ومگسب وناكلها من غير ما نكسر الگرصة ! مو ردتوا ماكو داعش !! أي طبعاً خو مو عدنا مصباح علاءالدين ، بدال المصباح عدنا مليشيات، مال هالوكت، ولا تتوقعون منهم يقاتلون بحسب الأكاديميات العسكرية، هذولة هدادة، يدفعوهم للموت، وبعدين أصحاب السلطة يلبسون النياشين، يعني هذولة يروحون بالرجلين، ترى لا ” إلا طحين ” ولا لحم بعجين، وشوفتوا حالنا ، عشرين يوم ثلاثين ألف جندي وعنصر مقاتل وصاد 350 ماكو لا طحين ولا ثريد ، إلا من إجانا عمو سام يلا أها تحركنا.
هسة آني گلت إللي عندي، وطبعاً ( وفي نسخة قناة العراقية تنكتب طبعن) راح يطلع لي چم واحد مزايد ويدخلني مزاد الدين والغيرة على الدين وفتح مكة لو الغيرة على الحشد لو الغيرة على الجيش ويبدي يثرم بصل، تدرون شراح أسوي ! راح أجيب لكل من هذولة صينية وخلي يثرد بصل، لأن محتاج بصل ثرم لمشروع الكبة الوطني …كبة لكل واحد أخلاقة عالية بالحرب !! يعني بيني وبينكم كل الكبة راح تظل على گلبي  وتصير إكسپاير !! أخلاقيات بالحرب !!! ولكم من كل عقلكم !! سلم لي كيم كارداشيان !