تحسون أكو تراخي صار عند المالكي, وأنفكت براغيه.. يعني مثل واحد ببطنه غازات ويطلعها على كيفه شويه شويه,لان أذا تطلع رأسا أيصير بيها صوت, وهذا خرق دستوري, ويزعل علينه همام .. أشو أني هيجي وصلني.. الفقاعه والنتنين , أثاري أبو سراوي ما يقصد بيها العراقيين .. أحنه مفتهمين غلط , عدنه فد سوله محلوه دائما نخلط الاوراق , على رأي الفقيه صولاغ.. الحجي يقصد بالفقاعه ,ذوله الارهابيين اللي بالجزائر, أحتجزو رهائن أجانب ,وقامت القوات الجزائريه, بقتل الخاطفين والرهائن, وخلصت القصه بسرعه مثل الفقاعه.. ولان نيتنه خره مثل أقلامنه المأجوره, ومثل موقع كتابات البعثي , وما صدكنه, وبس أنريد عالمالكي زلكه وحاشاه من الجلكه..وصرنه مثل هذا اللي جابوله أسئله الامتحان كبل ليله مال الحيوان, تلاث أسئله بس عالدوده.. وصاحبنه درخ الدوده مثل محمود الحسن من يطلع مقابله عالتلفزيون.. وباليوم الثاني , الاسئله تغيرت وصارت كلها عالفيل.. واحد من الاسئله جان صف رأس الفيل.. صاحبنه كتب ما يعرفه عن الفيل, وكال.. الفيل له رأس كبير يشبه الى حد ما رأس الدوده.. ونزل حدره عالدوده , وراح راس سطر ,وتناوش الدوده وجيبه جيبه… القصد جان وين , وأحنه رحنه بالاتجاه المعاكس..وهذا أن دل على شي, أنما يدل على أننا شعب مو بس فقاعات ونتنين , لا , وشعب وصخ ومعفن وبيه دوده..شعب أيحب الخده وما دا يعرف شديصير.. مليارات الدولارات تنحط بجنط وتروح للامارات ولندن.. ذوله مو سياسيين ذوله طركاعه ونزلت علينه.. أيريدون أيدمرون العراق ويخلون شعبه مجادي بالشوارع .. حتى الامريكان داخو من ذوله اللي نصبوهم علينه مسؤولين .. ما كو حكومه ولا نواب شعب ,أكو مافيات تشتغل وهيه اللي تحرك البلد ..المشاريع التعبانه وفلوس البنى التحتيه بح.. عدنه رئيس حكومه حاسب وزير على أداءه الفاشل وعدم تقديم وزارته الخدمات للمواطنين..وشهره كدام الاعلام والناس.. فد يوم سمعنه رئيس الحكومه طلب وبحيل صدر من حزب وزير هتلي أستبداله بشخص كفؤ وعنده قدره لتقديم أفضل ..شفنه رئيس الحكومه طلع عالتلفزيون وكال يابه أني بعد ما أكدر أشتغل ,لان ديصير ظلم للشعب وملياراته كاعد تروح من وره وزير فاشل ..أحنه نكول, أما رئيس الحكومه ضعيف ولازم نغيره أو رئيس الحكومه متفق ويه الوزير وبالنص , لو هذا رئيس الحكومه مجلب بالكرسي وما أيهده..الناس المحايده هيجي تفكر.. والشعب بيده كل أدواة التغيير وما يعرف شلون يستخدمها , وأيحاسب الحراميه والتلافه.. ويريد اللكمه توصل بحلكه بلا ما يحرك أيده, وبس ياكل وما يعرف ينتج..
المشكله ويه الحراميه, أخذت شارع وخارطه جديده..ومبين جماعه دوله الفافون معاندين , وما راح أينفذون ولا مطلب واحد , وهاي اللجان كلها قشمريه ..وطلبو من مشجعيهم أن أيسون مظاهرات تأييد بس بغداد.. وجماعه عليوي, والضاري, يوجهون ربعهم من خارج الحدود بأدامه المظاهرات, وراح تصير شغله جبيره..توكع بيها الخرفان ويحترك الاخضر ويه اليابس.. بس هاي المره لا سامح الله أذا صارت , ما راح يبقى عدنه شي , أسمه عراق ..وهمه واحدهم يشمر دشداشته الوصخه ويلبس بدلته ويركب طياره, وشلع ..ويتريكون يم أهلهم بلندن وبكوبنهاكن.. والهبرات واللغف بالصفقات تنسي وتضيع.. ويبدون من راس السطر..بأنتخابات ووجوه جديده ..وجيبه جيبه…
وما خفي كان أعظم
