خاص: إعداد- سماح عادل
لاحظنا في رمضان هذا العام دخول مسلسلات جديدة في النصف الثاني من رمضان، لأن هناك عدة مسلسلات اكتفت بأن تتكون من 15 حلقة، وكان من بينهما مسلسل “جت سليمة” والذي بدأ عرضه في نصف رمضان 2023، والمسلسل ﺇﺧﺮاﺝ: “إسلام خيري”، و”حمادة الشرقاوي” مساعد ثان، ﺗﺄﻟﻴﻒ: “كريم يوسف”، تمثيل: (دنيا سمير غانم- محمد سلام- هالة فاخر- بيومي فؤاد- سلوى خطاب- سامي مغاوري و…….).
لنفاجئ بعد عرض المسلسل بوجود شكوى من الكاتبة “رشا عزت الجزار” تتهم فيه القائمين على صناعة المسلسل بسرقة اسم فيلمها وأيضا اسم البطلة الرئيسية فيه، وقد تواصلت “كتابات” معها وأذنت لنا بنشر ما قالته ونشرته.
فيلم روائي طويل..
حيث نشرت الكاتبة “رشا عزت الجزار” في يوم 7 أبريل 2023 بوست على حسابها الرسمي على “فيسبوك” يتضمن:
“انا عندي مشروع فيلم روائي طويل متسجل في حقوق المؤلف من أكتر من سنة ونص بعنوان (جت سليمة) والشخصية الرئيسية اسمها سليمة. لما عرفت ان مسلسل دنيا سمير غانم واللي كان مقرر له اسم تاني اتغير اسمه بنفس الاسم (جت سليمة) روحت مكتب أحمد السبكي وخدت معايا تسجيل الملكية الفكرية بتاعي.
اتفاجئت إنهم ميعرفوش حاجه عن الاسم الجديد مع إنهم الشركة المنتجة، عملوا تليفون وبعدين قالولي آه فعلا الدعايا نزلت بالاسم دا.
حقوق الملكية الفكرية بتسمح إن نفس الاسم يستخدم لاكتر من عمل بشرط تكون الأعمال مختلفة، يعني مثلا ممكن نفس الاسم يبقي لفيلم ومسلسل وبرنامج، لكن مينفعش نفس الاسم يبقي لمسلسلين او فيلمين. كلموني من مكتب السبكي بعد ما مشيت وقالولي المعلومة، قولتلهم هاتأكد منها ولو حقيقية خلاص هعمل إيه كملوا مسلسلكم وأنا هكمل شغل على مشروع الفيلم بتاعي.. اتاكدت من المعلومة ولاقيت إنها حقيقية فكدا كدا القانون يسمح إنهم يستخدموا نفس الاسم، وانا محبش اعطل شغل حد.
اسم الشخصية أيضا..
وتضيف في نفس البوست: “لكن مكنتش اعرف إن كمان الشخصية اسمها سليمة، أنا فتحت مسلسل دنيا عشان اتفرج عليه عادي وبحب والله، ولما لاقيت إن كمان اسم الشخصية مسروق بكيت بحرقه على مشروعي.
تبدوا للبعض شئ بسيط، إيه يعني اسم عمل واسم الشخصية الرئيسية فيه يتسرق، لكن لما يكون اسم العمل واسم الشخصية له دلالة كبيرة في القصة والحكاية بتاعتك هتحزن على شغلك ومجهودك.
وهو اسم شخصية زي اسم (سليمة) اسم نمطي ومعتاد؟
السرقة كانت لاسم العمل المربوط باسم الشخصية وبالتالي سرقوا اسم الشخصية كمان”.
وتؤكد في آخر البوست: “مش مسامحة الجهة ولا الشخص اللي اتعرض عليهم المشروع بتاعي من سنة، واللي خدوا اسم العمل واسم الشخصية الرئيسية ولبسوها لمشروع تاني مختلف بحكاية مختلفة، اسم العمل واسم الشخصية مكنش هيفرق معاهم في أي حاجه لكن هيفرق في مشروعي.
بدل ما تحطوا ناس مفلسين وحرامية في مناصب تدير العملية الإنتاجية، أولي تحطوا ناس محترمين وأمناء ومبدعين، ناس بتوع فن بجد عشان ميسرقوش شغل الناس ومجهودهم بادعاء إنه من اقتراحاتهم ومن بنات أفكارهم..
أنا تعبت جدا من الفردة ومن السرقة ومن والبلطجة على حقوقنا، حرام عليكم.. مفيش فايدة”.
تفاصيل دقيقة..
ثم نشرت بوست آخر في نفس الموضوع في يوم 9 إبريل 2023 على حسابها الرسمي على “فيسبوك” تقول فيه: “مش بس سارقين اسم العمل واسم الشخصية الرئيسية (البطلة) واللي بيثبت حقي في اللي بقوله تسجيلي للملكية الفكرية في حقوق المؤلف بتاريخ 8/8/2021، يعني من أكتر من سنة ونص، دول كمان سارقين تفصيلة شعر البطلة، لكن عشان هم مبدعين وعندهم ضمير وبيخافوا ربنا ومبيسرقوش شغل ومجهود حد، غيروا في التفصيلة شوية.
– يعني عندي اسم الفيلم (جت سليمة)، واللي له اسقاط ودلالات كتير على الحكاية وبطلتها ورحلتها
* عندهم اسم المسلسل (جت سليمة)، وطبعا دا عشان هم creative جاااامد.
– البطلة عندي اسمها (سليمة النهاش) بنت إحدى عزب الإسكندرية، بنت من بنات البلد الجدعان، الجدر الأخير والطيب الممتد من نسل النهاش الكبير.
* عندهم البطلة اسمها سليمة، صدفة طبعا، ولسه مش عارفين اسم ابوها ايه.. هل اسم سليمة دا شيء نمطي ومعتاد؟ طب دانا اللي كتباه عمري ما سمعت عن اسم بنت اسمها سليمة، قوم يجلهم إلهام باسم سليمة واسم الفيلم مع بعض شوف ازاي.
– عندي شعر البطلة ناعم وطويل وغزير وجميل (وكل ستات الحتة معجبة بشعر سليمة وحسدنها عليه، مع إنها محلتهاش غيره بحسب وجهة نظرهم).
* عندهم مغيرين ومخليين شعرها قصير وكيرلي، التاتش طبعا.
– عندي سليمة بيتعرض عليها عرض مستمر لبيع شعرها لصالح صناعة البواريك النسائية للأثرياء وبترفض كل الوقت، بالرغم من أن العرض بيقدم لها سعر مغري جدا على واحدة في مستواها الاجتماعي الأقرب لخط الفقر.. لكن سليمة الشبعانة على طبلية أبوها بترفض برضه
* عندهم لما سليمة بتاعتهم بتروح الزمن القديم فجأة بتظهر لها ست بتُعجب بشعرها وبتحاول تقصهولها غصب عشان عاجبها وعاوزة تاخده منها بالعافية.. يا سبحان الله”.
وتضيف: “والجديد بقي..
سليمة اللي عندي واللي غزلت تفاصلها من روحي بتتعرض لظروف قاسية بتجبرها على حلق شعرها وبيعه (بتجبر على فقد جزء هام من أنوثتها، كل الستات كانت بصالها فيه، في سبيل إنها تتمسك بتحقيق غريزة الأمومة).
ياتري سليمة بتاعتهم هتجبر هي كمان على بيع شعرها برده؟ ولا لأنهم مبدعين هيخلوها تقصه أو يتقصلها غصب عنها؟”
وتختم البوست في تصوير مشاعرها تجاه ما جرى لها: “مش مسامحة أي حد شارك في سرقة مجهودي وهو عارف أنه بيسرق شغل ومجهود وتعب وحلم حد تاني.. منكم لله.
وارجع تاني وأقولكم سرقتكم لاسم العمل ولاسم البطلة ولتفصيلة شعرها- دا لحد دلوقتي- الله اعلم انتوا سارقين ايه تاني.. مكنش هيفرق معاكم خالص في حكايتكم، بل بالعكس مقحم عليها بشكل واضح.
لكن انتوا ضرتوني في مشروع كامل خد من روحي أكتر من سنة ونصف. ليه السرقة والأذية؟ انتوا مسلسل فانتازيا وأنا فيلم روائي طويل، دراما اجتماعية.
فرقت معاكم في إيه السرقة؟ هل أضافت شئ واووووو لحكايتكم؟ هل حسستكم إنكم راضيين وشاطرين ومبدعين؟ أشبعت إيه فيكم عاوزة اعرف.
الكاتبة، خاصةً الكتابة الإبداعية بتاخد من روحنا ومن عمرنا ومن وقتنا ومن طاقتنا ومن مشاعرنا ومن طموحنا ومن أحلامنا.. يعني مش بس بتسرقوا مجهود اتبذل في الورق، انتوا بتسرقوا حته من روحنا كمان. وإن شاء الله هتحصدوا في شغلكم وفي حياتكم حصاد من نفس نوع الزرع.. ماهو أصل ربنا عادل، وانا فوضت أمري لله.
ومحدش يقولي شوفي محامي. انا هستسلم أسهل عشان هو دا حالنا كلنا، محدش بياخد حقه غير لو عنده ضهر أو عنده شله”.
من رواية أخرى..
وتكشف الكاتبة “رشا عزت الجزار” في بوست آخر نشرته يوم 10 إبريل عن وجود رواية أخرى سرق منها صناع نفس المسلسل تقول: “في بنت اسمها روان أبو خشم، بنوته جميلة وصغيره ولسه في بداية حياتها، عمرها فقط 19 سنة وواضح إنها شاطرة وموهوبة ومشروع كاتبة وروائية كبيرة.
أنا لسه عارفه عن روان وعن أزمتها النهاردة واتواصلنا واتكلمت معاها، وإن شاء الله تقدر تثبت حقها وتأخذه، وواجب علينا كلنا نقف جنبها ونساندها، كل صاحب ضمير حي وكل مهموم بالشأن الثقافي المصري رجاء ادعموها هي وحقها”.
وتحكي أكثر: “روان مسروق من روايتها (فاكيت افريب) قصة مسلسل (جت سليمة)، اللي في الصورة دي غلاف روايتها، بصوا فيه كويس خاصةً اللي شافوا أول تلات حلقات من المسلسل المسروق من عملين واحد روائي والتاني سينمائي.
نفس المسلسل اللي مسروق مني اسمه (جت سليمة) واسم بطلته (سليمة) وتفاصيل تانية بتتضح تباعا من مشاهدتي للحلقات.. انا مش بخمن أنا متأكدة من السرقة العمد من فيلمي”.
وتؤكد على : “ملحوظة..
أنا نوهت من أول بوست ليا نوع وتفاصيل السرقة اللي متاخد من مشروع فيلمي الروائي الطويل (جت سليمة) وحتي التفاصيل اللي بتظهر تباعا مع مشاهدتي للحلقات، وقولت إن المسروق مني متلبس لقصة تانية.. وفي البوست اللي فات وضحت تفصيلهة هتحدث في القادم من الحلقات (تأكيدا واثباتا لسرقتهم المتعمدة من فيلمي) وبالفعل اللي قولته بدأ يتضح من الحلقة 3، مع إني نوهت عنها بعد نزول الحلقة 2 مباشرة، لإني عارفه هم سارقين ايه مني”.
وتدعو في نهاية البوست إلى دعم الروائية الشابة: “ادعموا حق روان في روايتها، لما اتكلمت معاها اكدتلي إن روايتها مسروقه بالكامل في المسلسل، واللي قرأ الرواية عارف دا.. وأنا مصدقاها لإني مسروقة بقدر أقل منها من صناع نفس المسلسل اللي معندهمش اي ضمير واللي استحلوا حقوقنا وأفكارنا وإبداعنا بكل جشع”.
وتواصل: ” روان لسه متعرفة عليها وعلى حكايتها النهاردة، مفيش بيني وبينها أي شيء غير إني بدعم حقها وبدعم موهبتها، واتمني إنها تكبر وربنا يوفقها لأنها هتكون مكسب للحركة الثقافية المصرية.
ادخلوا شوفوا قصتها، ادعموها وادعموا حقها، وحافظوا على موهبتها لإنها مشروع روائية كبيره حرام نجهضه في بدياته. وياريت محدش يستصغرها في السن ولا يقلل من بساطتها وبرائتها ويكون دا ذريعة لإهدار حقها.
أنا مش محتاجة دعم منكم، لإني مقررة أبطل كتابة وهسيب مصر كلها. لكن روان تستحق الدعم والمساندة، لأنها صغيره في السن ولسه في بداياتها (وحجم وكم) السرقة المسروقين منها سهل جدا يخلوها تثبت حقها (قانونيا)، وتكمل مشوارها ونكسب كلنا روائية موهوبة وخيالها خصب.
لكن أنا للأسف حجم السرقة المسروقة من مشروع فيلمي ممكن متخلنيش أقدر أثبت حقي قانونيا، لكنها اجهضت تعب ومجهود وشقي وسعي أكتر من سنة ونص من عمري في مشروع فيلمي، لإنهم سارقين أهم شيء.
وتؤكد مرة أخرى على دعمها لروان: “حكاية مسلسل (جت سليمة) مسروق من رواية (فاكيت افريب) للكاتبة الشابة الجميلة الكبيرة موهبة والصغيرة سنًا روان أبو خشم، واللي بكره هتكبر سنا وموهبة وهتبقي روائية قد الدنيا.
واسم المسلسل واسم البطلة وتفاصيل اخرى مسروقين مشروع فيلم (جت سليمة) فيلم روائي طويل من تأليفي.
#انا_ادعم_روان_ابوخشم
مسلسل (جت سليمة) مسروق من عمل روائي ومن عمل سينمائي”.
روان أبو خشم..
وبتواصلنا مع الكاتبة الروائية “روان أبو خشم” صرحت لكتابات إنها نشرت روايتها المذكورة والتي باسم (فاكيت افريب) في عام 2021، وأنها اكتشفت سرقة صناع مسلسل (جت سليمة) لها من التيلر الأول الذي كان يستغرق حوالي 45 ثانية.
وعن الطريقة التي وصلوا بها إلى الرواية وهل تعاملت معهم قالت لنا: أنها لا تعرف كيف حصلوا على الرواية لكنها متوفرة في المكتبات، مؤكدة على أنها لم تتعامل مع أحد من صناع المسلسل من قبل.
وعن نيتها في عمل إجراء قانوني تجاه ما حدث لها صرحت أنها بالفعل اتخذت إجراء قانوني، ورفعت قضية على صناع المسلسل.
وتصف لنا “روان” مشاعرها حينما علمت بسرقة روايتها من قبل صناع مسلسل (جت سليمة) تقول: “بقيت محبطة ومش عارفة أعمل إيه ولا أقول إيه، كنت حاسة إن أكيد فيه حاجة غلط.. اقسم بالله مش عارفة أكتب تاني رغم كمية الأفكار اللي في دماغي بسبب التشوش الل حصل”.
وتؤكد لكتابات على: “إني مش هسيب حقي وهكمل لآخر المشوار، وإن حتى لو سني صغير بس هاثبت نفسي، واخد حقي علشان الشباب اللي زيي ، وعلشان محدش يفكر تاني يسرق تعب ومجهود حد”.
