لأن بالدنيه ابد ماكو ضمير

للنزاهة لجنه سووا هالحمير

وشافوا الفقره هدف الهم خطيرْ

قررت انسه الشعر وآكل شعيرْ

×××

للنزاهة اشلون لجنه الفوا

فلان بيّاع الفلافل وظفوا

صاحوا ابأسمه تراهم واهتفوا

وصار من تالي العبد هوّه الاميرْ

قررت انسه الشعر وآكل شعيرْ

×××

واحد يعيّن يجي غيره يكولْ

هذا تعيينهْ جذب مو بالاصولْ

همّه ذوله اللي نسميهم فحولْ

ياهو يلزمها يشد جنحه ويطيرْ

قررت انسه الشعر وآكل شعيرْ

×××

جونه مدري امنين من بيهم سمعْ

اكل بيهم هالدهر لمن شبعْ

جانوا بطرف المزابل والقصعْ

هسه كل واحد صفه منهم وزيرْ

قررت انسه الشعر وآكل شعير

×××

ياشعب مسكين شح بيك الفرحْ

نازح ومجروح من جرح الجرحْ

بالرمادي اتنام واتكوم الصبح

تلكه روحك نايم ابصف السديرْ

قررت انسه الشعر وآكل شعيرْ

×××

منهو هذا اللي يصدرلك قرار

داعش واعوانه لاذوا بالفرار

جان ارحملك تره ذاك الحصارْ

ساد كاكك والنفط عندك جثيرْ

قررت انسه الشعر وآكل شعير

×××

كاكه مسعود العنب عالي اشتلوحْ

ابقهْ كمز واحتج بذيج الجروحْ

انكشفت الشغلهْ وريحتكم تفوحْ

وصار لسرائيل ياكاكه المسيرْ

قررت انسه الشعر وآكل شعير

×××

آخ يفلان اللي كاتلني كتلْ

اشلون بومه حطوا ابهذا النزلْ

عقد سنتين النفط ماينحملْ

وتالي يتحجج تقشف هالحقيرْ

قررت انسه الشعر وآكل شعيرْ

×××

ارد اقدملك يصاحب هالدليلْ

وين مردود النفط يبن الاصيلْ

هم عراقي انته يعيني لو دخيلْ

وهم يجي يوم وتظل عينك تديرْ

قررت انسه الشعر وآكل شعيرْ

×××

بجالكم صار الحرامي اكبر شريفْ

شرد اكول اكثر يخويه لو اضيفْ

مثل مي راكد حكومتكم تجيفْ

ويصفر العكروك بيها هالصفيرْ

قررت انسه الشعر وآكل شعيرْ

×××

ساده وعمايم وقوط واربطهْ

توالموا صيّاد وي سرب الكطهْ

هذا متغطي تره باحسن غطهْ

وذاكه بامريكا اله احسن نصيرْ

قررت انسه الشعر وآكل شعيرْ

×××

آنه كلت اجيالنه ابحاجه الوعي

وكلت اساهم مثل غيري وادعي

اشكد سعيت ابهاي بس خاب السعي

همّه يردون الخلك تبقه حميرْ

قررت انسه الشعر وآكل شعيرْ

×××

آنه اريد احجي حجي كلش خطيرْ

الشورجه تشهد على هذا المديرْ

هذا هوّه اللي يقررلي المصيرْ

تالي عصفور بحبل جاهل اصير

قررت انسه الشعر وآكل شعيرْ

×××

آنه ابن هذا البلد آنه العراقْ

آنه عشت اهناه وارفضت النفاقْ

عشت بالكوّه على اخشوم الرفاق

وتالي يملك امري بايران الاسيرْ

قررت انسه الشعر وآكل شعيرْ