بعد لا احد يعتب علينا اذا سوينا اي شي…. الحاضر يبلغ الغايب….
اليوم راح احجي وقائع واشياء دا تصير مو تأويلات أو تنبؤات ولا تحليلات سياسية ….
انا على تماس مباشر مع نزوح (السنة) من الموصل واللي ما احد يجيبه بخير ولا شر … ولهذا حبيت اوصل واقعهم … وخلي نشوف اشراح تسوي الحكومة من حل الهم !؟
عدد كبير من ابناء الموصل ((النازحين بشكل طوعي وبعضهم على اثر خوف)) … محسوبين مرتدين والسبب انه تركوا الموصل على أثر دخول داعش ورغم انه همة سنة ولكن قسم من عدهم مطلوب منهم توبة لاسباب فقهية فنية داعشوية … وداعش انطت اكثر من مهلة للموضوع هذا وما استجابوا رغم تهديدات داعش باشياء سعيدة راح يسووها بيهم مستقبلا … بس طبعا ما رجعوا ولا قدموا التوبة
اغلبهم في كردستان سجلوا نازحين…لكن قسم منهم ما وصلهم راتب من شهر حزيران ولا حتى الاسمي والى يومنا هذا … زين هذولي من وين راح يعيشون ؟! واشلون يبقون على قيد الحياة ….وياهم اطفال وقسم اولادهم شباب ومصاريف وايجار … من وين يعيشون !؟ زين اللي ما قدروا يسجلون نازحين او تأخروا بالتسجيل واللجنة راحت عزلت خلال فترة قصيرة ورجعت لبغداد، هذولي شنو مصيرهم!؟
كثير منهم جتي داعش بلغت جيرانهم اذا هالبيوت ما الها صاحب فاحنا محتاجيها … وهسه همة في حيرة يرجعون علمود بيوتهم لو يبقون والوضع مجهول وماكو قابلية على المصاريف والموضوع مستمر وراح تخلص فلوسهم زين اذا فلوسهم خلصت وين راح يرجعون غير لبيوتهم !؟ زين اذا صادروها الدواعش وين راح يروحون بوقتها !؟
اللي بيهم موظفين وفلتوا خارج العراق لليوم ماكو جهة تسجلهم نازحين حتى يستلمون رواتبهم، وفق كلام الحكومة عن دعمها لنزوحها في بداية الاحداث والعطلة الاجبارية المدفوعة الراتب !!!
زين كثير من عدهم خارج العراق لانه ما قادر يحصل اقامة بكردستان وحتى لو حصل هسه بعد تسهيلات كردستان لهلموضوع ولكن ماكو بعد لجنة تسجيل نازحين… انسد التسجيل
اغلبهم يخافون يوصلون بغداد لا ينعلسون على ايد العصائب وربعها
نفس الوقت قسم من عندهم ما يقدر اصلا يرجع للموصل لان ينعلس اكيد
بعدين داعش مصدرة قرار محلي اللي ما يداوم الاسبوع الجاي هذا مرتد
والطلاب الجامعين اللي امتحنوا نص امتحاناتهم وطبت داعش وتوقف الامتحانات، هذولي راح يعوضون تكملة الامتحانات بكردستان، صدرت داعش منشور تكفير بحقهم
الامم المتحدة وباتفاق عراقي تركي بس يسجلون العراقيين كمقدمي طلب لجوء ولا همة محسوبين نازحين مو لاجئين وهذا الكلام اكده أكثر من مصدر….بس دا ياخذون المسيحيين واليزيدين بعين الاعتبار…. السنة ماكو شي…. علمود لا البلد يفرغ من الشعب…..اقصد من خرفان المعبد
زين … كلش زين مو ؟! يعني هسه بالقوة بالمروة راح يجبرون العالم انه يرجعون للموصل ويعلنون التوبة ويقعدون ببيوتهم ويتبعون داعش ويستلمون رواتبهم ويعيشون اطفالهم علمود تستمر الحياة الميتة من جديد ….ولا شنو الحل بيد هالعالم ؟! اشلون يكملون حياتهم ؟! هو حتى تحصيل ابسط شغل بكردستان لو بتركيا صعب كلش لان بدون اقامة عمل … زين يعني هسه هذولي الناس اذا الواحد منهم رجع للموصل وقدم الولاء لداعش علمود عائلته واطفاله احد يلومه !؟
خلي نعوف المبادئ بصفحة اللي كلتنا نعرفها، ما اتذكر فد يوم شفت لا رجل دين ولا رجل سياسة ولا حكيم لازمله فد كتاب ومسويه ثريد ودا ياكل بيه ،،، الجوع والعوز ما يرحمون وهذولي على حافة الخطر واذا ماكو حل ترى القادم اخطر خصوصا وانه اغلب هذه الفئات هم من مثقفين وحملة شهادات …. خلي شوية تتنبه الحكومة اخاف مشغولة بهذه القاعة العملاقة الجبارة ودا تسوي حفلة بمناسبة بيعة الغدير وعايفين نص شعبهم محتل ومشرد ومهجول … لا والله الامام علي (ع) ما كان ليقبل بيهم موالين اله لا والله ….
