بشارع الحجي حمودي عم الدكتور تحسين الفلاني (تحسين ابو الليل) اربع مولدات وحدة مال (شوّاي) و وحدة مال (برغي) و وحدة مال (شكيب) و وحدة شراكة بين (ساچت و فرج) و هالخمسة مراوين الشارع الويل و شاويه شوي بالصيف و مجرشيه بالبرد بالشته و مظلمين بيوت العالم و حارگين اجهزتهم من الطفية و التشغيل و يشغلون بالوحدة الظهر و يطفوها بالخمسة خاطر يريحون المولدات و حتى لو تجي الوطنية بالوحدة و بالاربعة يشغلون و يطفوها بالخمسة و لازم يتأخرون بالتشغيل اقل شي ربع ساعة و يقتصدون بالگاز و بالمطر ماكو تشغيل و اذا وطنية تعطل يظلون يطفون المولدات كل ساعتين و على غفلة يطفون مولداتهم سوه بالاضافة الى اصحاب مولدات الشارع الخلفي و الشارع الامامي لشارع بيت الحجي حمودي و هالاطفاء الجماعي خبل سكان المنطقة و حيرهم شلون يتفقون هيچ و يطفون طفية رجل واحد و العالم ما تحتمل بعد.
كل مولدة علگو عليها راية مرسوم عليها ايد شايلة جلكان و مكتوب بشكل زخرفي (ائتلاف الگاز العراقي) و كل مولدة وگف يمها حارسين و الحجي حمودي و جيرانه ما يعرفون شنو السالفة و راحو لشوّاي يسألوه و گاللهم وزير الكهرباء سوه حزب جديد و فتح باب الانضمام و احنا كاصحاب مولدات حطينا ايدنا بايده و صوتنا بالاجماع و استغرب الحجي و جيرانه من الكلمة الاخيرة و گالوله شيقصد و گال هو و جماعته صارلهم فترة يلتقون ويه اصحاب مولدات الشوارع المجاورة و المناطق القريبة و نتناقش نصوت على القرارات و نصوت دائماً على الطفية الجماعية و صوتنا ماكو بعد سحب ليلي و قبلها هم صوتنا ماكو سحب صباحي و ان شاء الله بانتخابات مجالس المحافظات رح نرشح اني و فرج عن ائتلاف الگاز العراقي و ما نقصر وياكم.
و اليوم اذا تفوت بشارع الحجي حمودي رح تنطرش من صوت المولدات الصغيرة لأن اغلب السكان بطلو من السحب بس اللوگية يگولون ضواهم ما ينطفي.
*تحسين ابو الليل عضو البرلمان العراقي ، حالياً بأرض نجد و الحجاز (ذاك الاسم يسويلي جالي) يأدي مناسك الحج ادعوله يرجعلنا سالم.
