منو يگدر ينكر انو ريحة التمن العنبر وهو يفوح بالبيت تاخذ العقل ؟ او منو ما ينبهر يوم يشوف شلون يتحول البصل من الطعم الحار لشي حلو من يتخله على نار هادئة ،كل هاي الاشياء ترى هي مو بس “ طبخ “هي كيمياء تمشي على المزاج ، بس بدون ما نحس بيها

تره الطباخ كيميائي وهو ما يدري ، لان كل خطوة يسويها بالمطبخ سواء خبط المواد، ورفع او خفض الحرارة، وحتى التخمير، كلها تفاعلات كيميائية .

خل نبدا بالجاي

من تغلي الماي وتحط الجاي ، تصير عملية نسميها الاستخلاص Extraction. الماي الحار مهمته يسحب المركبات اللي تطي اللون والطعم من ورقة الشاي، وهذا نفس مبدأ إستخلاص المواد الفعالة من النباتات بالمختبر

اما كليجة العيد

من تنخبز الكليچة وتطلع الگشرة الذهبية المقرمشه ، فهذا تفاعل كيميائي نسميه Maillard Reaction . هذا التفاعل يكون بين البروتينات والسكريات هو اللي ينطي الطعم والنكهة المميزة للأكل

البصل؟ شوف الكيمياء شلون تشتغل هنا

من تگطع البصل، عيونك تضل تدمع؟ هذا لأن البصل يفرز مركب كبريتي، يتحول بالجو إلى حامض ضعيف يهيج العين . بس من تخليه على النار ، المركبات تتكسر ويصير الطعم حلو. يعني الكيمياء غيرت التركيب والطعم كله

التخمير؟ ميكروكيمياء!

العجين من تخمره ، الخميرة (كائن حي من المجهريات) تاكل السكر وتطلع غاز ثاني أوكسيد الكاربون، اللي ينفخ العجينة. ( هذا تفاعل حيوي ) يعني هنا الكيمياء تلعب وي الأحياء

خلاصة الحچي

المطبخ هو مسكن التفاعلات الكيميائية ، والطباخ هو الكيميائي ، بس الفرق هو يشتغل بنفسيه طيبة و بدون ما يلبس لابكوت أبيض ولا نظارات واقية ، ويعتمد على الشم والتذوق كوسائل كشف ، والتقدير هنااا يشتغل بدون الحاجه للمعادلات الكيميائية والارقام

فإذا سألتني: “منو أول كيميائي عرف التفاعلات؟

أگلك: جدتي الله يرحمها لان چانت تسوي دولمة ما تنسى ابد .