كتب: محمد الكاشف
ازاي عايزني أصدقك
وأنت صابغ بالكدب حالك؟!
ومن سؤالك عاللي فات
لقيت معاه الذكريات
واقعة ف حاجات لسّاها غصب وبدون مبالغة كتباك غياب
أصل الحضور لو كان حقيقة
ماكانش يبقى في كل ضيقة ألوانه باهته في البالتة زي اللي ساب
كل حتة بدون حساب لسّاها شاهدة ع الحكاية
مع إن الشهادة مالبداية للنهاية
حروفها جاحدة
بالمعاندة معجونة زور
والحق أخرس لو يثور
ما كانش حالنا يبقى في كلامنا بالجبر سور
والدنيا سور
محبوس وراه:
سيد مشاغب
ومروة عرفة
ونرمين حسين
وكريم
ويحيى
وحمدي الزعيم
ومعاذ
وروبي
وعلاء
وعادل
وأكسجين
وقصاص .. اللي في الانفرادي مستعين بالحلم عالضلمة
وابن الإمام .. سيدنا الحسين
والمجهولين
اللي مكانهم كان هِنا
وكان هَنا في كل لمة
وحتى لما
في المحاولة بأي كلمة نشتريهم
بنلاقيهم في قايمة لامة
بالرغم عنا كل معنى كان في روحنا
وفي زحامنا مسرسبانا لشِعر شاب
وإن كان فايتنا الحلم فيها
فالجواب لسّاه مهاجر
الغربة مُرة عاللي غادر بالغصب عنه مالصحاب
مين يأجر بالثواب؟!
يمكن نعيش
ما يختشيش من فتح باب
كان نفسه مرة في الوطن يبقى له حاجة من مفيش
كان نفسه انتي ما تبعديش
لكن مفيش للروح ضمانة
والتمن مالوهش قيمة
ولو معانا .. فرسومه غالية
الهدمة بالية
من زمن عدى الزمان
والروح بتنده من ساعتها في الإيمان
يمكن يعود
ويجود علينا
بالعدل فينا
ولو مرة واحدة يشترينا
رغم إني ومع كل ده مضطر أشك
الهزيمة لسّاها واضحة في كل صك
دايس علينا
بالعند فينا وفي كل حق
لأجل الرجوع
وأنا يا حبيبتي مش هابيع ولو هاجوع
أصل الأمل
ثابت في قلبي بالوقوع
في حبك انتي
وانتي
انتي
زي ما انتي
حقيقة واضحة مش خيال
انتي الإجابة
وقبلها انتي السؤال
وانتي القريبة
ولو بعيدة في أي حال
هاتي العيال
من حبسهم
ردينا ليهم بالزيارة
يمكن يكون من ضحكهم جوا العبارة من بعد بور
خَضّار جناحه بينفرد فوق ألف سور
عشان نطير
كل الطيور
مشتاقة ليكي
ومشتاقة ليهم من كتير
زي الشجر
محتاج لزخة م المطر تغوي الحياة
فتبوح معاه بالسر لينا في ابتسامة
تيجي السلامة ويا الحمامة أم غصن زتون
تجَمَّعنا على البشرى
تفرحنا منين ما نكون
تصون العهد والعِشرة
ولا بترجع
ولا بتخون
وكله يهون
عشان بكرة
عشان ما نتوهش من تاني
عشان الحلم يتحقق
ويوم تندهني تلقاني
هتاف بيوزع الكلمة على اللمة في قلب رغيف
ده عمر الضمة ما تشبع
رصيف خايف من التخفيف
ولو هانضيف كلام يشفع
في وقت الشدة
أو يسمع
فناقصه الفعل يعيش بالصوت
ويوم ما يفوت على الفرصة
يتبت فيها ما يسبهاش
وما يبعناش ولو ببلاش
ده لسه الحلم بينادي
صباح في القلب مش عادي
معاه الفرحة راح تكمل
وتبقى الزاد وزوادي
في سكة بيكي لو تسمح
تقوم تِصبح
وبتصبح
وبتقولك بدون تكشير: صباحك لسه حرية وأغنية وليفها الطير
صباحك خير
