جنا نحلم نشوف العراق , كله خضار وسلام ومحبه , وضحينابالالاف من الشهداء , حتى نتخلص من الدكتاتوريه والعبوديه والظلم .. وشكد فرحنا , من شفنا زلم عراقيين جايين من بره , كالونا راح نبني ونعمر هذا العراق , ونزيح الظلم والحيف اللي وكع على شعبنا , جراء سياسات فاشله للقائد والرمز الاوحد , وراح يصير الحكم بالعراق وفق العداله الاجتماعيه .. وبيني وبينكم , شكد فرحت , من عرفت الشيعه , ولاول مره بعد أربعميتسنه , راح أيحكمون .. وجنت أتراهن ويه أصدقائي , لو بس الشيعه تحكم مره , راح تشوفون , شلون جماعتنا , تحكم , مثل ما جانو أهل بيت الرسول الكريم أيحكمون .. وهم بيني وبينكم , من عرفت نوري المالكي , صار ريس وزراء العراق , ما تصدكون شلون جانت فرحتي .. لان أبو سراوي , رجل نزيه ومؤمن بالله , ومن صدك عزم وبناءوأعمار, ورجل ما يؤمن بالطائفيه , وعنده الرجل المناسب في المكان المناسب ..
وجيبه جيبه , خلصن أربع سنين , وأحنا بس أنباوع , هاي شنهي , أشو كلشي ماكو .. معقوله الحجي أبو سراوي هذا .. جاه وين البناء والاعمار , وين تعويض مظلومية الشعب .. أشو بغداد من سئ الى الاسوء .. الفقر والعوز وصل لابو موزه , الزباله والخيسه صارت عنوان بغداد الحبيبه , خريجين كليات ومعاهد كاعدين بالكهاوي ينتظرون الفرج , المخدرات وحبوب الهلوسه صارت تغزو مدنا , والارهاب يضرب بينا , ويمكن راح نشوفه ببيوتنا في يوم من الايام , ويوميه عدنا فواجع , من وره قاده فاشلين وأنتهازيين .. لا وجماله الحجي أبو سراوي , أيدافع عن اللي خمطو فلوس الشعب , وصار الفساد بالعراق صفه أطلقت على الولايه الاولى للمالكي ..
وهم رحنا وتقشمرنا وأنتخبنا الحجي مرة ثانيه .. وبهاي الولايه ,أثبت نوري المالكي فشله وتخبطه بكلشي .. داخليا وخارجيا .. سياسيا وأقتصاديا وأجتماعيا ..أول ريس وزراء عراقي , يثبت باليقين أنو فاشل وضحل , ومو مال ريس وزراء يا عالم .. جلب أبن جلب اللي قشمر هذا الرجال , وخلاه بهذا المكان .. هاي شنو , هذا دمر العراق والعراقيين .. نهب كل ثرواتنا , هجرالوادم بأسم محاربة الارهاب, أستغل القضاء لاغراض دنيئه ضد خصومه اللي شاركوه بالعمليه السياسيه .. سيطر على كلشي .. وهم صار الضروره والقائد الرمز..وأحنه مشينا للحرب .. بأختصار ما سوينا كلشي .. راح صنم وجابولنا أصنام ..
وشكد عيب على ريس وزراء عايف شغله ومسؤوليته , وحط كورته ويه الوطنيين الشرفاء اللي كشفو زيفه وخياسه.. والقضاء الارعن أيطبق شيريده هذا الفاشل ..وتعلم طريقة لجم حلوك الاعلامين والمثقفين , وحطلي جم سيبندي بمحكمة النشر البعثيه , حتى يبتزون كل صوت عراقي شريف .. هاي مو حاله حجي .. والله عيب عليك .. روح شوف شلون تخيط الشك اللي فتحته بالانبار , هاي وصمة عار تبقى بكصتك يا نوري المالكي ..
كافي هسه عاد يا أبو سراوي .. كلشي أنكشف وبان على حقيقته .. وجربت حظك مرتين .. وهذا الشعب يا أبو سراوي مو للتجربه .. أشو ذاك كضى بينه 35 سنه , شبعنا ضيم وقهر, وندش بخيسه وهسه طلعنا منها نرد ندش بخيسه ثانيه .. وجيت يا حجي بعد أنكس من الاول .. أي أدري جم دوب يا عالم نبقى حقل تجارب لعقول مريضه وفاشله.. معقوله هذا قدرنا .. ليش شعبنا نايم وهو بيده كل أدوات التغيير .. ليش ساكت مو كافي ظلم وأستعباد .. خلونا أنحط أصابعنا البنفسجيه بكل العيون الوقحه اللي تريد تضحك علينا مره ثالثه , وتقشمرنا أبطانيه لو بشغلات رخيصه وتافهه ..
بالحرب العراقيه الايرانيه , وبنهر جاسم بالضبط .. طلبت من رب العالمين , طلبين .. ردت الله سبحانه ينطي عمر أطول للخميني والصدام .. والثاني ردت من ربي بس أشوف نهايتهم .. وتحققت الامنيه .. وهسه , أطلب من ربي , أشوفك بقفص الاتهام , ونفسه منير حداد هو القاضي , والادعاء العام جعفر الموسوي.. وراح يطلع خياس عشر سنين ..وبس الله هو ساتر العراق والعراقيين ..
