ولو الحجي ما يفيد وهاي كلها دوخة راس ما منها فايدة , بس شنسوي مثل ما يكول المثل ( البيك ما يخليك ) , وهي هاي الحقيقة البينه ما يخلينه , وإلا معقولة هذا العراق تالي ما تالي يصفه بيد كاكه وكرمبه , والله حرامات على الدماء الطاهرة الي ضحّى بيها الشعب العراقي من خيرة ابنائه وشبابه حتى يسّقط النظام الديكتاتوري , معقولة بعد ذيج الزلم الخشنة الي تعوج الحلك , العراق يتلاعب بمصيره كاكه حمه واسامه النجيفي ؟ والله كل عتب ماكو على كل الي يسويه كاكه حمه , لكن العتب على رئيس برلمانه الشريف ابن الشريف لما ينكطع النفس والوطني ابن الوطني هم لما ينكطع النفس , الي يكول سبب تأخر اقرار الموازنة هو الخلاف بين بغداد وأربيل على ملف النفط .
زين أنت يا رئيس برلمانه يا شريف و يا عفيف ويامن ؟ وي بغداد لو وي أربيل ؟ وشنو رايك بالي تكوله حكومة بغداد ؟ يعني صحيح كاكه حمه صارله سنتين ما مسّلم الحكومة برميل واحد من النفط ؟ لو هذا الكلام ماله صحّة والمالكي والشهرستاني يتبّلون على الكاكه ؟ لو هاي القضية كلها ما تعنيك سواء النفط انباك أو ما نباك ؟ بعدين انتوا متحدّون والعراقية ويامن وي بغداد لو وي أربيل ؟ إذا وي بغداد ليش ترفض تدرج مشروع قانون الموازنة بجدول أعمال المجلس ؟ وليش ما تدعو ربعك متحدّون والعراقية يحضرون جلسات المجلس حتى يتحقق النصاب القانوني ؟ وإذا وي أربيل راح نكلك هذا راتبك وراتب ربعك الي بالوزارة والبرلمان ومخصصاتكم و منافعكم الي ما الها حساب منين تاخذوها من بغداد لو من أربيل ؟ أسامة اكعد عوج واحجي عدل , لأن الناس مو غشمه حتى تضحك عليهم , والله وكيلك زين يعرفون اصلك وفصلك , وزين يعرفون انت وكاكه حمه ليش ما تردون مشروع قانون الموازنة يتمرر من البرلمان .
وبصراحة انا شخصيا ما اعتب لا على كاكه حمه ولا على حفيد محمد النجيفي الي كتل روحه حتى يلحق ولاية الموصل بتركيا , ومات وهي بحسرته , لكن العتب عليكم انتوا يا نوّاب التحالف الوطني الي على اساس تمثلون الشيعة , هو أنتوا لو تحضرون كلكم وما يتغيّب واحد منكم ومعاكم العراقية الحرّة , صار كل هذا ؟ وهل راح نحتاج كاكه وكرمبه ؟ يعني احنه من حقنه نسال ابو الشفافية لو مو من حقنه ؟ ونكله يا أبو الشفافية شنو السبب الي يخلي ربعك بالتحالف الوطني يغيبون نصهم عن اجتماعات مجلس النواب ويخلينه نحتاج لليسوه والمايسوه ؟ ونريد نعرف منو هذولة الي جاي يتغيّبون عن حضور هاي الاجتماعات وما جاي يخلون النصاب القانوني يتحقق ؟ حتى نفضحهم جدام الشعب والشعب ما يعيد انتخابهم , لأن هيجي نوّاب ما عدهم غيرة على مصلحة شعبهم ضروري الشعب يعرفهم , وانا واثق لو كلمة وحدة بس من معتمد المرجعية العليا بصلاة الجمعة , كان شفتهم كلهم ثاني يوم يتكشتون بكافنرية مجلس النوّاب .
والله لو كاكه حمه وحفيد محمد النجيفي لو يعرفون بنوّابنا زلم وبيهم حظ , ما كان تمادوا بهالشكل , ولا واحد منهم كدر يتجرّه ويسوي هذا الي جاي يسويه , بس يعرفون كلش زين التحالف الوطني هو أسم من غير جسم , و هاي مكوّناته كلها متناحرة وما بيهم واحد يحب الثاني , إذا مو كل واحد يتمنى يشرب من دم الثاني , وبسبب تناحرهم هذا ركب على ظهرنا اليسوّه والمايسوّه .
