احنة شنريد؟!!
اي … احنة … الشعب …. العراقيين …. مااعتقد طلباتنة هواية … وصعبة … نريد نعيش مثل الاوادم … ببساطة …. نريد امن وامان … نريد شغل/وظيفة وراتب …. نريد كهرباء ومي نظيف وشوارع مبلّطة …. نريد مدارس بيهة سَگف قبل الرحلات …. نريد مستشفيات مابيهة بوگ واهمال … ونريد جامعات بيهة علم واخلاق …. طلباتنا اذا نكتبهة متطلع ٢٠ وحدة … الطلبات الچبيرة … لأن اذا نكتب كل طلباتنا او احتياجاتنا احتمال الطلبات توصل مليون!!!! ضاعت علينا فرصة تاريخية بال ٢٠٠٣ … الحاكم الجديد او الحكّام الجدد چانو بالبداية خايفين من الشعب … عبالهم الشعب گعد من سباته … وبعد مينام!!! بس احنة خيبنة الظن ومسوينة شي … غيرنة بس الدوشك واللحاف والا هية النومة نفسهة ومستمرة .. التهينا بنفسنا وكلمن يصيح ياروحي ….
انكتب الدستور وتشرعّت قوانين اغلبها تفيد اللگامة اللي بالحكومة ….اخرها قانون التقاعد السيئ الصيت … مقومات او شكل دولة عصرية ماعدنة …. صار ١١ سنة … شگد ننتظر بعد؟!!
انت عايش برّة وتحچي … لو جوّة ومچوي؟ اني اشوف اللي عايش برّة ويحچي احسن من العايش جوّة ومطنش … منطقياً لازم يصير العكس …. العايش برّة يگدر بسهولة يطنش وينتعش ….
گدامنا فرصة تاريخية …. الانتخابات قريبة …. ننتخب اي احد … مو هذا المهم …. مو مهم اذا الحكم جمهوري لو ملكي … عسكري لو مدني … بعد ميفرق … جربنا كلشي …. المهم ننطي مهلة لرئيس الوزراء الجديد (حتة لو القديم استمر-ابو اسراء) … انگلة …. عندك ٣ اشهر مهلة …. شلون راح تصّلح … المصايب والمشاكل اللي عدنة متنحل ب٣ اشهر … بس عالاقل انطينا انطباع انو انت دتمشي بالطريق الصحيح …..
لازم انبطّل انانية … انبطّل نفاق … ننسى الدين والطوائف … نفكر بمصلحتنا ولو مرة وحدة بحياتنا …. بشرفكم … منو يستحق يكون بالمنطقة الخضراء يتنعّم بالامن والخيرات … احنة لو الحكومة ؟!!!
انطو لرئيس الوزراء مهلة … اذا ماالتزم … گعدو ببيوتكم !!!! طز بالراتب … لاعصيان عسكري … ولا اعتصام بالشوارع … گعدو بالبيوت …. شراح يسوّلكم …..
لاتگولون ماكو امل … لاتگولون ينراد تغيير … منو يغيير … مو احنة … الثورة الفرنسية خو ما الانكليز سووهة !!! محد راح يجي يحررنا …. لازم احنة نتحرر … نحرر عقولنا من العبودية للاشخاص … رئيس الدولة او رئيس الوزراء هو اللي يخدمنا مو احنة نصير عبيد عنده وعد گرايبة ….
منين تجي العظمة اذا منتحلى بالشجاعة ؟!!!
شوكت يجي اليوم اللي نستحق بيه مقولة ايها الشعب العراقي العظيم !!!!
