لندع الكتابه بالفصحى تتنحى جانبا فلعلنا ان ماكتبنا باللهجه العراقيه اي مانسميه مداعبة بالعراقي الفصيح ..قد …. قد تصل الفكره الى الذين لم تصلهم من قبل..
كتبنه وصيحنه ويمكن حتى لطمنه .. يابه تره اذا انتبختو هاي الوجوه اليوم اللي بالحكومه مراح تلومون الا نفسكم..
هاي راحت انتخابات وجتي انتخابات ونفس الوجوه تكررت .. لا والنوب بصلاحيات وامتيازات اكثر واكبر..
والعجب موهنا .. العجب انه اكو هواي عراقيين گالو بعد مننتخب هذوله الحراميه … هذوله حراميه وطائفيين وتقسيميين.. زين اذا عرفتوهم هيج لعد ليش انتخبتوهم؟؟؟ يعني عاجبتكم الطيانه والفيضانات بكل زخة مطر؟؟
لو عاجبكم انقطاع الكهرباء اللي وعدوكم بيهه وزوجوكم عشر سنين… كل وزير كهرباء يجي من ايهم السامرائي الحلف بعبد القادر الكيلاني انه راح يصلح الكهرباء وشلع بمليار ونص مليار دولار وليس انتهاءا بحسين الشهرستاني الحالف بالعباس قبل کم سنه انه راح يصدر الكهرباء.. وبالتالي بعدهه مصخمه ملطمه.. وانتو جيتو بكل اريحيه انتخبتوهم من جديد حتى بهاء الاعرجي تزيد ثروته وحتى رئيس الوزراء ابو سراوي يبقى صاحب اعلى راتب بالعالم وحتى حرامية وزارة النفط يرجعون ساعه يلطمون عالحسين ويقشمروكم وساعه يمصون نفطاتكم لآخر نفس..
بس لا.. عفيه عليكم انتبختو اللي بي بخت .. يعني مثلا رجعو اللي بالديوانيه مره ثانيه لأن العام الفات تقرر بالديوانيه ان يتم منح منحه الى اعضاء مجلس المحافظه وقدرها خمسه وسبعين مليون دينار تقديرا لجهودهم وتحسينا لمستواهم المعيشي؟؟؟؟ وطبعا رئيس المجلس بالديوانيه حصل الضعف حتى يحسن مستواه المعيشي يعني حصل على 150 مليون دينار عراقي فقط لاغير .. وكتبو وراهه الغلط والسهو مرجوع للطرفين؟!؟!؟!؟
لشوكت يظل الجهل والتخلف نايم بالعراق نوم العوافي؟؟؟
تره لتصدگون مسؤول شيعي لو سني بعد اليوم.. لأن العيساوي جان ويه الحكومه دهن ودبس وبس انضربت مصالحه گام يتهم الحكومه والنوب اليوم يطالب بإقليم حتى البوگ يصير شرعي..
واسامه النجيفي چان يسموه عدو الكرد الاول لأن كان ضد الفدراليه ..وضد تطبيق الماده 140 بس على غفله صار هو واخوه اثير النجيفي دهن ودبس ويه الجماعه وصار من حق الإقليم يصدر بكيفه نفط وغاز وكلشي وكلاشي والظاهر المصالح من تلتقي الوطن برخص ينباع..
وابو اسراء عشر سنوات ضام ملفات فساد وقتل وسلب ونهب وكل ميحجي يحلف تره اذا اطلعه اگلب الدنيه.. عمي دطلعه.. هسه انت ضامه على شنو؟؟؟؟؟ هيه بقت عليك؟؟؟
يعني معقوله وطن قائم صارله الاف السنين ميعرف يدير اموره ولمده عشر سنوات بس فوضى ودجل وخرافات وضحك على الذقون واختلافات وخلافات وجهل وتخلف وخدمات معدومه وقتل على الهويه وعلى الإسم وصفقات مشبوهه واحنه نعرف القاتل ونعرف منو وره كل هذا ومع ذلك نرجع ونگول قابل منين نجيب ناس تحكمنه…. هذا الموجود؟!؟؟!!؟؟
عجيب ؟؟!؟!؟ يعني العراق مبي بس هذوله الحثالات؟؟ وين اللي چان نايم بحضن ايران لو اللي جان مسوي نفسه مخبل بأوروبا لو اصحاب المليشيات اجه يتحكم بالعراق والنوب البعض مكيف ويصفگ .. على شنو ؟؟ على صخام الوجه..؟؟
زين موعدنه ناس مستقله قضاة اطباء مهندسين تدريسيين كفاءات علميه .. هذوله وينهم؟؟؟
صدگ هذوله وينهم؟؟ يعني الخوف مانعهم لو اصلا العراق مبي كفائات.. والله گمت اني اشك بكلشي..
زين هسه اكو مظاهره بمصر على مرسي ونظام الإخوان المسلمين.. مع العلم مرسي ونظامه موفرين الكهرباء والخدمات ومناهبين البلد مثل جماعتنه… ومع ذلك المصريين طلعو يتظاهرون مراضين على تحديد الحريات في مصر..يعني المصريين عاشقين للحريه والحياة.. زين احنه شبينه؟؟
ثانيا على شنو بالعراق البعض طلع مظاهره تأييد مظاهرات المصريين.؟؟ على شنو؟ لو بيكم خير طلعتو مظاهره لتصحيح اوضاعكم المأساويه..
ثالثا محد بالعالم طلع مظاهره علمودنه… زين ليش احنه خابصين نفسنه على غيرنه على خالي بلاش؟؟
شوكت العراقيين يحسون ويعرفون قدرهم وقدر وطنهم الغالي…؟؟
وشوکت یجی یوم نگول احنه هم عدنه وطن مثل العالم؟؟
وشوكت نتفق على موقف وطني عراقي موحد.؟؟
وشوكت تجينه حكومه شريفه مخلصه للوطن..؟؟
وشوكت تجي الكهرباء؟؟؟؟
