الله سبحانه وتعالى يحب العراق وشعبه المؤمن جدآ جدآ ( سنة وشيعة وأكراد وتركمان ومسيحيين ويزيديين وصابئة ) , لذا أبتلاهم بكل انواع الشهادة , وكل هذه المصائب , من أول مصيبة أمريكا والأحتلال والمالكي والنجيفي والجعفري والحكيم وصولاغ وطالباني وبرزاني وعلواني وشحماني وووو , فموتنا يتوزع بين الغريق سيولآ والحريق مفخخآ بالسيارات والتفجيرات والمطعون والمبطون وووو , وتاليها شلون , هل العيب في وجوهنا أم العيب في قلوبنا ..؟
قسم أهل العلم الشهداء وبينوا أنواعهم – وللأيضاح فأنهم كالتالي
 الشهيد في سبيل الله ، ( الحمد لله نخرج من حرب مقدسة وندخل بحرب اخرى مقدسة )
الثاني : المطعون .  ( شبابنا مزقت أجسادهم القنابل والمفخخات )
 الثالث : المبطون . أمراض لا تشفى ( الحمد لله سرطان وتشوهات خلقية)
الرابع : الغريق .  ماشاءالله ( السيول أكلت الحرث والنسل )
الخامس : صاحب الهدم .  الحمدلله صواريخ السكود ما خلت عمارة أو بيت في العراق صامد
السادس : صاحب ذات الجنب .( العراقي من يكعد مايكدر يكوم كليته توجعه ومفاصلة مفلشة)
السابع : الحريق . الحمدلله ( ماظلت وزارة بالعراق ما أكلها حريق والفاعل مجهول )
الثامن : المرأة تموت بجمع ( أي حامله ) نساءالفلوجة والنجف الأسقاط الولادي أصبح أعتيادي والولادات الطبيعية كلش نادرة .
التاسع :من قتل دون دمه.(البطاط والخزعلي ومليشياتهم واكعة بالشباب حصد بدمه ودون دمه , كواتم وخطف وسلب ونهب , وتاليها تلكاه خلف السدة)
العاشر : من قتل دون ماله .(الحمدلله هيئة النزاهة حللت الأموال للفاسدين ماكو حاجة قتلهم)
الحادي عشر :من قتل دون أهله (الحمدلله كل النسوان المعتقلات بسبب أزواجهم أو اخوانهم)
الثاني عشر:النفساء – ( ياويلي عليهن زورو مستشفى الولادة – العلوية والطفل العربي -وشوفو المسكينات شلون يعيطن ويموتن بالنفاس والممرضة تكرز حب وتعلج )
الثالث عشر : السل . الله يمسيك بالخير يا مستشفى التويثة مليانة مسلولين من التتن والجكاير التعبانة مال الخشلوك )
الرابع عشر : من صرع عن دابته(سيارته) كم عراقي قتل وسرقة سيارته
الخامس عشر : من قتل دون مظلمته .الله يرحم سجون العراق الخمسة نجوم تعذيب وأغتصاب وتعليق وسحل ووووو وتاليها جثة مجهولة
 
الزبدة – الحمدلله كلنا شهداء وتنطبق علينا قواعد الشهادة بتفاصيلها الدقيقة حريق’ وغريقآ سيولآ ومفخخات , وبالتأكيد الشهيد يروح للجنة , ومن نصعد ماشاءالله تلكة محمد باقر الحكيم ( مو هو شهيد المحراب ) وأخوه ( عزيز العراق – مات مبطونآ بالسرطان ) وأبو مقتدى وياه عبدالمجيد الخوئي وكل الحبايب لا تزعلون , لا والأهم أبو مصعب الزرقاوي هم بالجنة وية حبايبة يتغده , وحجية فهيمة وحليمة وكريمة , كل قشابات محلتنا , لويش لأن أحنا شعب نقي قلوبنا صافية وبيضاء كالقائمة العراقية البيضاء , ووجوهنا سمحة سماحة الحكيم والأبتسامة لا تفارق محيانا,  وكلمة ( أسف أخي ) براس اللسان , وطبعآ أحنا ما ناكل الحرام خاصة المال العام ولا نقترب من الوزارات والمؤسسات ونسرقها وننعل سلفاها أبد , وأخاف كم واحد طلع بالتلفزيون يوم أحتلال بغداد ترى ذولة جايين وية الجيش الأمريكي والدبابات , ولا نخون الأمانة أبد أبد وجرب حط أمانة يم قريب أو صديق , محفوظة بعين البشر أمانتك , وأذا رجعت ألك  نعزل المحاكم ونبطل المحامين , وعلى طاري المحامين أيباه جرب توكل محامي أذا ما باعك للخصم بأول مرافعة أني معتب , ونحن شعب لا يقشب ولا نقترب من الفواحش ما ظهر منها وما بطن , لأن كل أيامنا زيارات للأئمة والصالحين , وماعدنا وقت للفواحش نهائيآ , وبالتأكيد نلطم ونزنجل ونضرب درباشة وسيف وكل ذنوبنا تنغسل ,  وبالتأكيد وزيرنا شريف ومديرنا عفيف وموظفنا والشرطي نزيه جدآ جدآ ولا يطلب رشوة والعياذ بالله , وكل هذا وأحنا نروح للجنة لأن أحنا مؤمنين جدآ جدآ قولآ وفعلآ , لعد الممرضات اللي سهرن علية بمستشفى كنغستون بلندن وجبة ورة وجبة وتغسلي وتراقبني وتوكلني والأبتسامة لا تفارق شفاهها , ويومية تحطلي ورد يم راسي , وين تروح هاي الكافرة المسكينة لبغداد الجديدة …! , لو شركة المواصلات الكافرة دزتلي رسالة أعتذار رسمية وبيها ثلاث باوندات بشيك لأن ماكنة التكت بلعت فلوسي وما نطتني التكت , لو المسكينة أم شارلي ( الملكة أليزابيث) مبتلية بأطفالنا وكل شهر أدزلهم دعم الطفولة ههه راتب شهري للأطفال , وها ترى هية كافرة , لكن لا يجوع عندها أحد وينام بلا عشاء هو وجهالة ولا ينام بشارع , تنطيهم المسكينة للشعب شقة وراتب بس لغاية ما يشتغل أخو خيته , وأبو الأسعاف الكافر أخ منهم بلحظة تلكاه يمك ويسعفك ويداريك مثل ألطفل , ويطير بيك للمستشفى , وترى مومثل ربعنه المؤمنين لازم تناوشة عشرة ألاف دينار يللة يشيلك بسيارة الأسعاف الحكومية لأن السيارة مال الخلفة مو للدولة  , وعامل النظافة ( الكناس الكافر ) ولا تحس بيه تلكة الشارع نظيف والحدايق عامرة ونظيفة , مو مثل ربعنا المؤمنين مايشيل الزبالة الا تناوشة مئتين وخمسين دينار , وأمانة أبو البريد الكافر ودقة مواعيدة , وسايق الحافلة وأبتسامته وكلمة صباح الخير , أيه لأنه كافر , ووووو , همة كفرة وأحنا المؤمنين , همة يروحون للنار وأحنا بالتأكيد حسب تصنيف العلماء نروح ….. للجنة !