أني على أستعداد أن أخذ نوري المالكي بسيارتي الخاصه وأتحمل أية نفقات حتى أخليه أيشوف بعينه أحياء كامله في بغداد والبصره والسماوه والناصريه ليس تحت خط الفكر وبس ..لا تحت الفكر نفسه وبعشرين مره.. عوائل عراقيه أتعيش بأرض عراقيه حتى كبل ميولد المالكي والنجيفي .. بطون خاويه وأجساد تعبانه أيعيشون بالظلمه وياكلون من الزباله ويلمون القواطي الفارغه وميعرفون شنو طعم الفواكه وحتى الموت أيخاف يوصل يمهم ويشربون مي المجاري بكلاصات من القرن الخامس عشر وجدوره مصخمه وصخه .. وشلون أينامون والجريديه والفيران تتطافر عليهم والعفونه شاكتهم شك عرض بطول.. وجنت أحب أعرف الجلب أبن الجلب اللي كتب التقرير واللي نوري المالكي قراه كدام البعوره في جلسة مجلس الوزراء الاخيره وأنشاء الله تكون الاخيره يا حق واللي أيكول بيه وهو فرحان وممصدك أن 18 بالميه من العراقيين دون خط الفكر.. ومن ألفين وسبعه لحد ألفين وأحدى عشر قفز عمر الانسان العراقي من 58 سنه الى 69 سنه.. أني ما أعتب على المالكي لان هذا من يحجي مو بوعيه ومو طبيعي يا عالم وغسلنه أيدينه منه.. بس أعتب على الصخوله الوزراء واللي همه من الصدريين والمجلس الاعلى والعراقيه والكورد ولا واحد من ظهر أبوه ناقش أبو سراوي بهذا التقرير وكله يابه ترى هذا كله جذب وماكو هيجي لان هذا التقرير يشمل بس المنطقه الخضراء وضواحيها مو كل العراق..
أحلفك بالعباس أبو سراوي أنت مقتنع بهذا التقرير.. لان شفناك تبتسم من داخلك .. وتكلب الاوراق بنرفزه وتطلب من عدنه أنصدك تقرير الخطه الخمسيه اللي ما أعرف يا فهيم كتبه .. لو بس أعرف منو.. وبعدين شلون عمر العراقي يتمدد أكثر من عشر سنين والمفخخات وكواتم العصابات والجوع والمرض يحصد بيهم كل يوم.. ماكو واحد كلك هاي تصير بالمجتمعات اللي كلش راقيه ما عدها حروب ولا عصابات تغدر بالناس على أساس طائفي وميعرفون شنو بطاقه تموينيه وبيئتها نظيفه ما بيها يورانيوم وأشعاعات وعدها تأمين صحي والاطفال في بحبوحه مو واكفين بالشوارع أيبيعون علج ونفاخات ..ممكن هذا أيصير عدها كل عشر سنين .. بس خلال أربعه سنين يقفز مستوى عمر الانسان العراقي بهاي الصوره أحسنلك أدك على الكلى دك أبو سراوي دك محد أيسمعك .. تعرف عدد العراقيين اللي عفطولك من كلت وارد العراقيين سنويا يترواح بين أربعه الى ستة ملايين دينار والله سبحانه عوج حلكك وسويت الدينار بالدولار.. من أكلك أنت بحد ذاتك ممصدك جاه شلون تريدنه نصدك جذبك ..وتعرف صرت نكته يداولها الناس بالكهاوي وبالدواير.. أبو المثل كال..أكعد أعوج وأحجي عدل..
وأذا هيجي عندك فطاحل بالخطط ويكدرون أيجرون عمر الانسان العراقي جاه شلون قشمركم البريطاني ماكورمك وأنطاكم أجهزة كشف اللولب.. جاه شلون ضحكو عليكم الاوكرانيين وباعولكم دبابات من أول طلقه تفلشت.. جاه شلون حطيتو وجه مذيعه أمريكيه صاحبة أبتسامة الميكاواط بشوارع بغداد حتى كل متنكطع الكهرباء العراقي أيباوع على وجه هاي الامريكيه وتنطيه فولتيه يكدر أيشغل بيها مبرده وبنكه وتلفزيون..
حتى بالجذب فاشلين مو بس بالسياسه.. وفالحين بالبوك وينبشون على أساليب شلون أيكدرون جمع دولارات هوايه وبسرعه ووصلو للمزارات الشيعيه وباكو فلوس أعمار أضرحة نبي الله نوح وأيوب ومقام بكر بن علي بن أبي طالب في كربلاء وبابل.. شايفين هيجي مصايب يا عراقيين.. وبعد متفيد لا صلاة موحده ونضحك على نفسنه ولا طاولات مستديره أنقشمر بيها على أرواحنه..وكل هاي مجرد تركيع بدشداشه كلها زروف جبيره ميفيد بعد بيها لا نخيطها ولا نشكها بس نكدر نفصل دشداشه جديده بخيوطنه وبأيدينه .. ها شكلت أبو سراوي أمر عليك بسيارتي وأخذك حتى أتشوف بعينك الناس العراقيين شلون عايشين وعلى حسابي لا تشيل هم.. ترى العراق بعد بخير.. يا ححححححححجي!!
وما خفي كان أعظم