أذا ميطلع حمودي أبن نوري المالكي ومكتب القايد العام وعدنان الاسدي همه المشتركين في صفقة أجهزة كشف المتفجرات أني مو عراقي ولا أفتهم شي.. وهسه اللجنه النيابيه مو توصل للجبير..يصدر أمر بأغلاق التحقيق ويبقى جهاد الجابري وحده اللي يتحمل هاي القضيه اللي قبض من وراها هبرة العمر .. عمي أحنه تعلمنه على فنون هاي المافيات لان وراها ناس تلعب بالعراق طوبه.. يا لجنه يا نزاهه يا برلمان يا طيزي.. شوفولكم غير هاي الفيكه.. أو لو ما القضاء البريطاني الكافر مجان أحد أتذكر هاي الطركاعه اللي وكعت على المسموطين.. المشكله مو بالمالكي المشكله بينه أحنه .. أتحدى عراقي أيكول نوري المالكي سرق فلس واحد من جيوب العراقيين.. وهم أتحدى أي بهلوان أيكول المالكي مشترك بصفقات الفساد وهذا الدليل.. عمي الشغله جبيره وبدت من أول يوم دخلت القوات الغازيه ساحة الفردوس .. سيناريو قديم وممنهج أقتصاديا وأجتماعيا يراد بيه كسر أرادة العراقي ومحو وطنيته ويبقى كاعد على الرصيف ينتظر الصدقه.. شوفو مو وصلت اللجان اللي أتشكلت بصفقات الاسلحه الوهميه بمكتب القايد العام للقوات المسلحه.. رأسا وكف التحقيق.. ليش أحد من البعوره سأل الحراميه بالمنطقه الخضراء.. يابه ليش خلونه نعرف منو الراس الجبيره..طبعا ماكو..لان الكل متورطين والكل مقاولين كبار ومسنودين.. ولا تصدكون في يوم من الايام وحكومة المالكي باقيه أتكدرون تتوصلون الى شي.. عشر سنين والحبل على الجرار وتبقى هاي الطلايب هي نفسها .. أذا حتى الامريكان داخو شلون فلوس أعمار البلد ضاعت..
ونوري المالكي ميتحمل وحده هاي الفوضى اللي جايه تاخذ العراق وأهله الى مستنقعات رمليه محد راح ينجو منها.. نعم هو ريس وزراء العراق وهو المسؤول عن كلشي بهذا البلد بس أكو وياه صخوله وأنتخبهم الشعب وصعدهم على الكراسي ليش ما طلعو من الاول وكالو يابه تره المالكي وزمرته ميخلونه نشتغل ميخلونه نسوي أعمار للعراق وميقبل نسعد العراقيين ..مو وصلت الانتخابات كام واحد أيطلع خيسة الثاني وذبوها كلها براس أبو سراوي.. لو أكو حكومه أغلبيه والمالكي هو أيقود العراق وبالمحافظات نفس الشي والاحزاب الباقيه تصيير معارضه مجان صار اللي صار..بهيجي حاله راح الشعب يعرف أوادمه ومنو اللي يشتغل ومنو اللي يسرق أمواله حتى بالانتخابات الجايه أنبول عليهم.. هسه منعرف منو ريس وزراء ومنو الريس ومنو ريس النواب كلها أدكول أني عنتر.. وبهاي الحاله الشعب وحده هو اللي راح يغرق هاي أذا بقى بيه شي من هاي المطره..
بؤرة الفساد ومشاكلنه كلها هي مكتب القايد العام للقوات المسلحه.. واللي أيدير مافيات السوك العراقي هو حمودي وصهر المالكي..لان ماكو صفقه ومقاوله وطير أيطير بالعراق أذا مو الموافقه تصدر من هذا المكتب.. وأني أكتب عن قناعه وخبره بهذا المكتب اللي بيه غرف مسدوده محد يعرف بيها بس حمودي وفاروق الاعرجي وصهر المالكي اللي كام يشتغل بره البره وعلى الثكيل من لندن وبيروت والخليج وهسه وصل أوربا شكو ماكو محد يعرف شكاعد أيسوي والموظفين اللي يشتغلون بهذا المكتب طركاعه من صدك طركاعه واحدهم ميعرف الثاني تباوعهم جينكو عبالك مو عراقيين .. ويا سبحان الله من أيصير وكت الصلاة تعال شوفهم أيصير مكتب القايد العام حسينيه والتواليتات تنترس وماكو مكان تبول بيه ومؤذن خاص وسيد أيكود هاي البعوره اللي الايمان والتقوى تتناثر من سيماههم وكل وكت أدوم بيه الصلاه بحدود الساعه مع الدعاء.. صدكوني هاي الزمر عدها أنفصام بتركيبتها النفسيه والعقليه..لان مو معقوله واحد يعبد الله ويسوي الكبائر ويقتل النفس.. وأذا أتريدون من صدك أتسوون تحقيق جيبو جواد البولاني والوكيل الاقدم لوزارة الداخليه ووكيل الوزاره لشؤون الاستخبارات والمفتش العام وأكو عميد هو اللي سوى الاتصال بفاضل الدباس..
وما خفي كان أعظم
