مشهد جميل جدا المالكي والنجيفي اخيرا متراضين،،والله على قادة العراق الجديدالحديد متجمعين بييت سماحة السيد عمار الحكيم الي عجز شيسوي حتى يجمع روس المتناحرين بالحلال بزواج مصلحة سياسية لان الربع ادركوا بالنهاية انهم موجودين بالسفينة نفسها وإذا غركت خيرهم ما يخلص نفسه،،،،هم وجلاوزتهم من العصابات المعروفين جيش المختار والعصائب والعزة والكرامة والقاعدة وحزب الله العراقي واخر المسميات الرنانة الطنانه،،وتخيل يا عراقي يا مكرود انت شكد محظوظ وداعيتلك أمك من الساعة النحس الي جابتك بيها للدنيا،،تخيل كل هالشوارب بكل أنواعها الطايرة والحايرة واللافة والدايرة،،المكسوفة وأم السكسوكة،، تنازلت أخيرا وتراضت حتى تحقن الباقي من دمك مع العلم كلهم يعرفون انت عندك فقر دم مزمن بسبب الحصار والجوع والحروب والتفجيرات والذبح المجاني والتهجير والتحقير والتدمير،،،وآخر قائمة المزايا الي وحدك تتمتع بيها،،
اخيرا اخي العراقي طلعوا القادة الشجعان وزعماء اخر الزمان متراضين،،واحد يبوس الثاني ويهمس باذنه ولا يهمك،،فدوة الك الألف ضحية من ضحايا الإرهاب الذي فتك بالعراقيين هذا الشهر،،شنو يعني ألف،،أصلا نصهم منتهي تاريخ صلاحيتهم ونصهم الآخر مصابين بأمراض مزمنة وكلهم وداعتك بيهم فقر دم،ولا تنسى الصيف الي راح يموت اكثرهم مثل البك ،،،يعني ميتين ميتين ما تفرق،،
أخيرا تراضوا الجماعة وخلصت مرحلة سن الحراب وبدت مرحلة الود الجذاب ،،وانت صير حباب حتى اني أصير حباب ،،
وراح ننعم بالأمن والأمان وترجع الناس تنام وبيوتها مفتوحة لان ماكو لا حرامية ولا قتلة ،،وبعد ماكو مفخخات ولا عبوات ولا طكطكات والسنة راح يبطلون اعتصامات مالها داعي والشيعة تروح لأبو الجوادين تزوره من غير تعقيدات امنية ولا سيطرت ولا إجراءات أمنية جذابية فاشوشية،، وإذا على الشباب الحلوة الي راحت بالاغتيالات والتصفية على الهوية والابرياء الي تمزقت أشلاء بالتفجيرات الاخيرة فشغلتهم سهلة نعتبرهم شهداء،،والعراق طول عمره عين تنبع شهداء عبالك ماكو شعب بالدنيا غير الشعب العراقي مخلوق للشهادة،،،وفوكاهه يسمونه العربان أهل الشقاق والنفاق ،،
اصلا العراقي هو مخلوق فريد ماله مثيل على الارض،،لانه الضحية الوحيدة الي تبوس ايد الجلاد الي يقطع راسها والمجني عليه الوحيد بالعالم اليفطس على الجاني عليه،،اي لعد شلون يسمونه شعب الحضارات،،والتضحيات،،اي غير لازم نبقى نضحي ونضحك العالم علينه،هو إحنا شنو سويناه بعمرنا غير نضحي والتضحية بخت النايمين للظهر،،المدللين بالخليج وبفلسطين(العروبة) الي باعونا وباعوا تضحياتنا بصالات القمار ومن ورآهم أجانا الدمار،،وعشنا عيشة الكلاب حتى علف دجاج أبو عداي وكلنا وخلانا نبيع جهالنا وسكن الأخوة الفلسطينيين بارقى العمارات والشقق الفاخرة،،واجونا المحررين على دبابات الأمريكان أكلوا الأخضر واليابس وسرقوا حتى بساط المروة الي طلعنا بيه من الدنيا،، ،وإذا أجينا نراجع نفسنا،،،ونشوف منجزاتنا كعراقيين،،راح نشوف حقيقة وحدة وهي انو احنا قضينا عمرنا طايرين ورا كم مسموط،،وكلما انقبر واحد طلعولنا عشرة،،وكلما فطس حرامي اجانا الي يخلينا نترحم على أيامه ،،
هذي حالنا ولسان حالنا يقول،الله يصبرنا على نفسنا ويعجل قبرنا،،،،وكل مسموط،،وانتم بألف خير،،،
