يمكن والعهده عالمالكي..يوم الجمعه القادم راح كلشي ينكشف ويبان عالطبيعه..المطلك راح يعلن أستقالته من جامع أبو حنيفه بعد الصلاه..هاي أذا خلوه أيصلي..كولو زيزي ..فراح يلقي خطبه الوداع ويكول اليوم أتممت لكم الخدمات فتنعمو بيها يا عراقيين..منو راح يلحك بالمطلك..الاخبار اللي أجتي.. أدكول .. أن النجيفي أخذ كل شغلاته من البرلمان وحطهن بالسياره اللي راحت للموصل.. معناها.. وهلكد ما نق عليه حيدر الملا ..فراح ريس البرلمان يعلن أستقالته من الموصل .. هذا يثبت أن عبوة أبو سراوي اللي زرعها أبيت العراقيه جابت نتائج أنفجار كبيره.. وكدر أيشكهم شك وعالبطانه ..وراح أيحط القشمرالزوبعي ريس للبعوره بعد أستقاله النجيفي .. وأبو سراوي ميهمه لو كل الربع يستقيلون لان عنده أحتياط يلعب بيهم لعب ..والمتظاهرين ميشترون لا المطلك ولا النجيفي ولا الكربولي بعانه..يعني خسرو كلشي.. شيسون بهاي الحاله وعدهم فلوس اللغف..لازم أنشوف مسلسل علي وعمر بس بنسخه جديده..أمريكا وأيران وأسرائيل تخرب على هذا الوضع..ذوله عليهم بس النفخ والشعب الطايح حظه راح ينكاد مثل المطي الى نار تحرك كلشي .. ولا تنسون لقاء سامي العسكري بالريس أوباما اللي منح بيه أبو سراوي الكرين كارت وجعله يطلع بالتلفزيون وبشكل يومي وتحذيره للمطايا بالطائفيه يعني أكو أستعداد ومهيئين كلشي ..أكو حطب وأكو رماد وأكو من ينفخ بهذا الرماد .. أحنه ننتظر بس ساعه الصفر ومنو أول صخل اللي راح أيقود الشعله .. ومن تعلك وتصير مذابح .. راح نشوف مسلسل هروب الجياف اللي همه هسه محضرين جنطهم الصغيره وترك هذا البلد المعفن بيد العصابات اللي راح أتكمل على كلشي..
الكورد أيريدون ينسحبون من العمليه..بس أيريدون الفرصه تجي يمهم..الريس البرزاني عنده تصور كامل لما يجري..وعنده مفتاح الحل ..بس الحل ميرضى بيه أبو سراوي ..وحاجه أبو سراوي للكورد أكثر من حاجته للصدريين..ويتوقع يجي يوم أيصير بيه تصادم ويه الصدر..بس عنده ملف مجيد الخوئي اللي بيه يكلب الامور ويعقدها..عين أبو سراوي هسه بعيده عن الصدريين..ويريد شلون أيقوي التحالف الشيعي الكوردي..بس يصطدم بجدار الماده 140 ..يكدر أبو سراوي أيحل كلشي ويه الكورد بس هاي الماده..فصار أيذكر أن الدستور لازم يتعدل ويصيرله ميزانيه وبلنص جديده..وهسه الجماعه بالتحالف الوطني راح يشتغلون بهذا المجال بس همام مو موجود بالتشكيله..
أكو مثل أيكول ألمايعرف تدابيره حنطته تاكل شعيره..الجماعه من كتبو الدستور رادو بس أيكولون عدنه دستور وحسب الفتره اللي حددها الريس الامريكي..بحيث همام خلال يومين جابوله دستور مال دوله مجاوره وكعد نقله بالضبط.. والشغله الطايح حظها منعرضت المسوده على ناس عدهم خبره..لا وطبعوه وبيه أخطاء جبيره وتخوف.. هسه لمن كامت بعض فقرات الدستور تتعارض ويه ما يردونه..صار لازم أنعدله..وأجتي شغله التظاهرات ومطالبهم بتغير الدستور..كالو عدل وأجتي عالمرام.. التغيير هذا مو بصالح الكورد..وهاي ضربه أخرى للاكراد..بس كلشي وأله حل عند التحالف الوطني اللي صار أبو العريف..أنطب بورطه ونطلع بورطه جديده من وره العقول المتحجره اللي معشعشه بيه..
الوضع كلش خطير حسب ما وصل من المنطقه الخضراء..المليشيات أجتها قائمه جديده بالتصفيات..وثبت أن عدنان الاسدي ضالع بتشكيل ميليشيات حكوميه غير الظاهره البطاويه اللي طلعت راسها بسرعه وأختفت همين بسرعه لان العراقيين الخايسين أكتشفوها وخاف الاسدي على روحه وسكت البطوطي ونطوه جم فلس وراح بال ونام..وأكو عصابات تعود الى هادي العامري وهاي تشتغل قبل موعد الانتخابات المحليه بفتره ترعب وتخوف الناس على الذهاب الى الانتخابات وغصبن عليك يا شعب..وشوفو شلون طبو علينه بدربونه وخلونه ننسى المليارات من الدولارات اللي صارت من الماضي ويريدونه مره ثانيه ننلدغ من نفس الجحر ونفس الاصبع اللي فات بنفس الجحر حتى أيهورونه بعد أكثر..وألف عافيه عليك يا عبد الفلاح السوداني وحازم الشعلان وأيهم السامرائي وأحمد نوري المالكي وعلي الدباغ وفاروق الاعرجي وكل عفطي وأبن كحبه سرق فلوس العراقيين اللي يتنعمون بيها بره..بس لناظره قريب..وخيرهم راح أيصير بيه ملاريه من وره بوك العراقيين..
وما خفي كان أعظم
