تنولد بوطن بي ثروات هائلة واتحب هذا الوطن حتى تبدي تكبر وتكبر احلامك وطموحاتك وتبدي اتفكر تبني مستقبل تبدي اتحاول اتكون شي مهم بالنسبة الاهلك وناسك واصدقائك وحبيبتك ووطنك وتبقى اتحس نفسك ملك لانه انت مستمر ببناء احلامك وتحقيق طموحاتك الى ان توصل مرحلة اسمها خط احمر!
الخط الاحمر هذا شنو؟
اني راح اكللكم شنو الخط الاحمر
_المجتمع وعاداتة وتقاليدة الي اتوقفك عند حدك وما اتخليك توصل لهواي امور چنت تتمنى توصلها هذا الخط الاحمر
_الدين الي هو اصلاً مو دين ويكون عقبة بوجهك وعثرة امام عربة سير طموحك، من جنت اصغير جنت اعرف الدين عبارة عن حب وجنة واشجار وملاعيب ومثل حياة الافلام الكارتونية هيج جنت اعرف الدين ما ان كبرت حتى لكيت الدين غير الشي الي عرفتة بحياتي واني صغير بس كان اكو سبب خلة الدين يتغير من عالم الافلام الكارتونية الى عالم التوحش والقتل والتعصب والمنع وهو وجود مخلوقات غريبة اسمها المعممين وهذول الاشخاص هم جانو سبب بأنه توكفى عند حدك وحسب زعمهم انه انت دتخالف الشرع والدين وهذا هم خط احمر
_الخط الاحمر الاخير والي مستحيل احد يكدر يتعدى هو العائلة نعم العائلة وهسة اكللكم ليش انت تنولد وتكبر واتكول اني لازم اعيش مثل ما اني اريد بتفكيري بحبي للأشياء بعملي للأمور الي اني اريدها ومو من حق احد يتدخل بيها لكن تنسى انه اكو شي اسمة عائلة وهذا المفهوم الصعب يكون سلسلة اتقيد كل حركتك وحريتك وتفكيرك السبب هو انو العائلة نشأت على ايدلوجية تختلف عن الايدلوجية الي احنة انولدنا بيها لذلك العائلة خط احمر من ضمن الخطوط الحمر الي حطمت أملي وطموحاتي ووقفتني عند حدي لانه يردون ما اخالف تفكيرهم وما اخالف معتقدهم وما اخالف وضعهم البيئي ويردون اكون وياهم بكل سلبي وايجابي ما اعرف شوكت نتخلص من هاي الخطوط الحمر وانعيش بكامل حريتنا وتفكيرنا وانحقق احلامنا بدون وجود اي عوائق
الخطوط الحمر هواي وما نخلص منها بهذا البلد الي اتحكمة العصابات والقتلة, وكافي نحلم جذب بهذا الوطن المبيوع.
