ونسينه الملايين الضاعت ونسينه الكواويد اللي نشرو الفساد والارهاب ونسينه الكهرباء والمي الصافي ونسينه حتى حاضرنه ومستقبلنه..وهسه عدنه هوسه جديده..هوسه أبو لهب وهو يمنع الحجاج من دخول بغداد..الحجيج أيكولون تظاهراتنه سلميه وبدون أجندات,ونريد أنصلي بجامع أبو حنيفه..شكو بيها..حق التظاهر مكفول وما مشمول بيه الزمان والمكان..يعني أني عراقي , وأريد أصلي بالبصره, شنو ميصير,ليش البصره مو أرض عراقيه..لو لازم أخذ تأشيرة دخول من قنصلية البصرة في بغداد..هذا مو خوش حجي..وبعدين لو تشوفون سيطرات أبو غريب والتاجي, والعالم اللي كاعده وعدها شغل بدوائر ببغداد, لا يابه لازم ترجعون, وبعد الجمعه تعالو..ليش هذا الخوف وليش هذا الرعب اللي تنشروه بين العراقيين , ودكولون ,أن أهل الرمادي والموصل وصلاح الدين , جايين أيخربون بغداد وجايين أينشرون الفتنه , عيب والله عيب عليكم..عملكم هذا هو الفتنه وهو تفريق بين أبناء هذا الوطن اللي مراح يبقى منه شي أذا أنتو باقين ..شوفو الاعظميه, مسدوده مو بس شرطه وجيش وذوله بزي أسود, ومعدات وأجهزه ,ودكول القوات الايرانية لو التركيه طبت وأخذت جم كيلو متر من العراق..والله عيب..شكد لعد أنت يا ريس الوزراء هش وضعيف..وشكد أنت ودولتك يا حفيد أبو المحاسن خرده ما بيكم كل نفع..شايفين خيوط العنكبوت شلون رقيقه وخاويه..أنتو هالشكل ,حكومه صاحب العصر خاويه وعاويه..وتخافون مره من أقزام البعص ومره تخافون من أهل الرمادي, ومره تخافون من أهل الكوت, عدكم عقده خوف, لان ما عدكم ثقه بنفسكم, والماعنده ثقه لا بنفسه ولا بشعبه, تكون قيادته وشخصيته ضعيفه .. يرعد ويبرق ويمطر, بس هوى فاشوشي كلشي ميسوي..
أذا ما تكدر أدير دوله, ومثل ما كلت بمقابلتك الرائعه في جريده الشرق الاوسط , أني أريد اليوم أتقاعد بس الامر بيد الشعب..مدا أعرف يا شعب اللي تحجي عليه بالصومال لو جيبوتي..هاي التظاهرات اللي صارلها شهرين, وهاي الشعارات اللي دكلك لن نرحل ألا أذا أنت ترحل..يا شعب أنت تفاخر بيه,وأنت سديت بواباتك عن أبناء هذا الشعب,يا شعب وأنت تخوفهم وترعبهم بالاعتقالات والسجون السريه , يا شعب طيحت حظه وخليته عبيد أل فارس ..أذا جنت خايف ليش تصير بالسلطه..السلطه مو بس تلبس قاط ورباط وخدم وحشم وسيارات وحمايه , السلطه مسؤوليه وبركبتك شعب ..وعليك أن تساوي بين هذا الشعب..مو تنطي ألطائفتك , وتأخذ من الغير,مو تسمح ألهاي الجهة وتمنع الجهة الثانيه ..أنت لا أنطيت للشيعه ونصفتهم ولا أنطيت للسنه ورحمتهم .. أثبتم يا دوله ريس الفافون, أنكم فعلا فافون وما ألكم قيمه..وتصريحاتكم فعلا أنتو ما تكدرون أن تبنون دوله , لانكم مزورين مو بس بشهايدكم لا,أنتو حتى متعرفون شنو العراق , ولا تعرفون لا شيعه ولا سنه..أنتم مو بشر, اللي أيبيع وطنه وناسه,هذا ميستحق أن أيعيش ولا يستحق أن يحكم العراق وشعبه..من وره تصرفاتكم الوضيعه, وفسادكم الاخلاقي والمادي, هيه اللي خلت الشعب يرفضكم, لان أنتو ضحكتو علينه ولعبتو ضدنه,بس هسه كشفناكم, وراح نرجعكم منين ما جيتو..
هاي الملايين من العراقيين, مو بس أهل الرمادي والموصل وصلاح الدين , لا , أنت واصلتلك خطأ , الجمعه الشعب كله راح أيكول كلمته, مو بالسلاح لا تخاف, مثل ما كلنه ونكولها بعد..سلميه وبدون تأثيرات لا أقليميه ولا دوليه..سلميه بصوتنه, خفتو من صوتنه وكطعتو بغداد..سلميه وخليناكم عايشين برعب..هذا مصير الجبناء والماعدهم عمق شعبي..الملايين جايه يا دوله ريس الفافون..روح خلي كل الكتل الكونكريتيه بمداخل بغداد, بس راح ندخل ونبعد كل الجيفه ,ونزيح الكتل اللعينه عن وجه بغداد الجميله..
الجمعه هو موعد صلاة الحجيج في دور العباده..وتصوروا أن المالكي وجوقته, بدأوا بوضع المتاريس من يوم السبت الماضي..شوفو الخوف شلون أيخلي الواحد ميعرف شلون يتصرف..لا حارث الضاري ولا علاوي ولا النجيفي همه أيقودون تظاهراتنه السلميه..هذوله مثلكم يأكلون السحت وحراميه..وأحنه طردناهم بالبطاله الفارغه, لانهم ناس فارغه , وصلناهم وبعدين نسونه..والظالم عمره كلش أكصير..
وما خفي كان أعظم
