شوفو شلون عدنه بخت  طايح حظه وأكسبايره خلصان..حتى مو مثل العالم ..لهنا ولحكتنه .. ليش ربي ..شمسوين أحنه .. والله فقره وعلى نياتنه ..ونسمع كلامك ونمشي وراك ونصلي يوميه ,وما ناخذ فلوس حرام, ونوكل بيها جهالنه .. أحنه شعب, شبع ضيم وقهر,وطوع نفسه عالصبر, ويوميه عدنه مصيبة حسين .. ويوميه عدنه روس مكطعه, وبكع الدم بكل مكان .. هالامتحان هذا ما خلص يا ربي ..أنطيتنه سعلوات وتماسيح تبلع وما تلحك ..مال حرام مال  أيتام مال خمس , شيطلع أيلغفوه وفاتحين حلوكهم الجايفه, وجيب خمط ..وخالين بمكاتبهم الوصخه,  لئن شكرتم لازيدنكم .. لا ريس بيه خير, أنطيتنه.. يكدر أيسد البلوعه الجايفة اللي يوميه تنفتح .. ولا من أنطيتنه, ريس حكومه ما بيه لوله , بس شفط  ولفط , ويداري على جماعته وبالنص.. وجماله محسوب عالشيعه, والشيعه منه براء, وهيه أخت هباء .. روح شوف الناصريه والديوانيه والنجف وكربلا والعماره, مو كلها شيعه , مو هيه اللي وكفتلك بالانتخابات , أطلع وروح شوف بعينك مو بس خاتل , شوف ناسها, وأعرف شلون عايشه , مو أنت أتصلي وتعرف الله ورسوله , أنت الراعي وأحنا الخرفان عندك , شوف بعينك يا رئيس دوله الخرفان .. أكو خدمات بيها خير, شارع , مستشفى , مدرسه , كهرباء ينطلع بيها, لا مي تشربه وينزل أيهلهل, لا مجاري بيها, تتحمل مطره وحده, زباله مكومه ومن كل مكان تشوفها, وصايره مثل برج المالكي.. أطفال الصعدوك للسلطه, تلعب بمي المجاري..أمراض رهيبه, وولادات مشوهه تبشر الاجيال اللي جايه ..لا وظائف لولدها ,وتشوفهم لو عالكهاوي مربعين, لو كاظيها خده ونايمين..وأنتشرت بيناتهم الحبوب الايرانيه الملوثه..أكو ناس عايشه على التقاعد ب380 ألف دينار كل شهرين.. هذوله فقاعه من يطلعون مظاهره ضد فسادك ولغفك..همه نتنين, صحيح.. لانهم أنتخبوك..وأهلنه بالكوت وبكل مناطق العراق, ملو منكم ومن شفطكم.. ولكم خافو من يوم يجي ,ذوله الفقره أيخرجون من طورهم ويسون ثوره عالظلم والطغيان, لان كثر الدك أيفك اللحيم.. ونشوف أبو تحسين لازم صوركم الهزيله وبالنعال دك..
الجاليه العراقيه في سبع البور, عدها مقترح كلش حلو, وقابل للتنفيذ من قبل عمليات بغداد والنزاهه البرطمانيه..وهو..أكو جلاب بمنطقه سبع البور تلكف اللي يعلس والموراحه والغريب الجاي بنية شر,من شمه وحده, أقوى من جهاز كشف الزاهي الموجود بالسيطرات ..وما طول الانتخابات جايه, والزنابير بدت أنتشارها, أنهد على كل مرشح جلب من جلابنه, وهو يكلنه, هذا شريف لو كواد.. وهذا المقترح, يأتي ردا على ما تقوم به عمليات بغداد من نشر كلاب بوليسيه في نقاط التفتيش المنتشره في بغداد, للبحث عن العبوات والاسلحه والمتفجرات..وسعر جلب واحد ويه أكله وشربه وحفاظاته وعلاجه في المانيه يعادل الى حد ما راتب أثنين من نوابنه زائد وزير مو سيادي.. ومن قلة الخيل شدوا عالجلاب سروج..
وما خفي كان أعظم