كبل فترة مو بعيدة,توكلت وخذت فلوسي, تعب عمري بالغربه, وحك أرض زراعية ورث ابوي وجدي, وكلت احسن شي اسوي مشروع صغير بوطني اللي جان بالي, وبنفس بلدتي الحلوه, والشط يخترقها من الوسط, وبيها هوى, ما متنفسه بكل مدن اوربا, وشتريت قطعة ارض, وكلفت مهندس معماري حتى يبنيها مطعم للوجبات السريعة,بعد ان حصلت موافقة من اشهر مطعم امريكي, ( ماكدونالز للوجبات السريعة) , والمهندس المعماري , شاب لطيف ومؤدب, نصحني اولا ان احصل على الموافقات , وسهلي امري, وكلي , عمو لازم تأخذ موافقة أمانة بغداد, والمحافظة, اي طبعا لازم موافقات مو كوتره, ثاني يوم توكلت ورحت للمحافظة, أنت سبع ومن ظهر ابوك تفوت من الباب, يمكن فرقة عسكرية واكفه, بس اني وشيباتي وجنطتي, كول والله دخلوني للاستعلامات, حجيت الشغله, دزوني على موظف, سبحان الله, تشوف الايمان والخشوع , يشع من وجهه, وهم رديت اسولف على مشروعي, بعد ساعة لمن رفع راسه علي, وهو كله ايمان وخشوع, كلي عمو المسألة يم الامانه مو يمنه, تشكرت منه واخذت تاكسي للامانه, وبالاستعلامات, اكو احترامات أفضل من اي مكان بالعالم, وبالدور, تكعد, لمن يجيك السره, ولو ما سألت موظف الاستعلامات, جان للصبح اني كاعد, المهم, هم دزني على واحد, وهذا الواحد, سبحان الله, تشوف السبحة بيده, وخال على الطاولة مالته, ايات قرانية, كلت أي, هو هذا اللي يكملي معاملتي, فرش نفسه على الكرسي وكلي, شوف عمي, ماطول مشروعك أستثماري, أحسن شغله تسويها ورأسك مرتاح, روح يم سيد (ابو …) وهو يحلك المسأله كلها, والمكتب ماله صاير بالجادرية, المهم أخذت تكسي ورحت للجادرية, وهناك شفت قصور تخبل, شنو هالتصاميم, والبذخ بكلشي وسيارات ما أعرف شنو اسمائها, هم المهم وصلت لمكتب السيد, سلمت وكعدت, وصلني السره, وحجيت القصة الحزينه, بس جذبت على موظف الاستعلامات وكلتله, دزوني من المحافظة, كالي انت موعد وي السيد , كلت لا بس اني دزوني من المحافظة والاماته, كلي لحظة, اتصل بواحد, دخلت شفت رجل طويل لابس قاط يموت , وقميص لونه ماكو منه, وحاف من فوك ولحيته شكد حلوه عبالك كاع هسه حاصدها, اني هم سلمت وشلونك مولانا ونسألكم الدعاء, اي هاي رزخونيه مال الجماعة, كبل جانت شلونك رفيقي, اليوم السلام عليكم , نسألكم الدعاء, أشو هالرجال تنرفز وأنتفش وكلي, اني مو السيد, تفضل شتريد, لا العفو عندي مشروع أستثماري صغير, وكلت اريد اقابل السيد حتى يوضحلي شلون ابدي, تفضل استريح, والله تغيرت الامور, جابولي جاي يخبل وريحة البخور ماكو منها.
كولوا والله بعد ربع ساعة دخلت بمكتب السيد, مو مكتب, لعد شلون غرفة المحافظ,لا شنو محافظ, لعد شلون غرفة الوزير, هم , لا , لعد شلون غرفة ابو سراوي, يمكن تموت وتخبل, رجل بالثلاثين من عمره, سمين الى درجة انو ما يملك ركبه, لحيته تخبل ولابس دشداشه بيضه, وفارش نفسه دكول فسيفس, وبيده اليسرى تلاث محابس , الشذر محالتهن يختلف بالوانه, وسبحته يمكن 202 , وحايط المكتب كله ايات قرانيه بأطارات تخبل,صدك من كال, سيماهم في وجوههم, المهم بديت احجي للسيد الله يحفظه, دك التلفون, وبدى يحجي وي واحد هم سيد, لانو كلسع يكول , لا سيدنا ميصير , المبلغ كله 900 مليون, 300 للامانه, شيبقالي اني , لا سيدنا الله يخليك, لعد خليها من ارجع من تركيا, ومن يضحك بطنه تصعد وتنزل , لا والله الجهال يريدون يشوفون اسطنبول, هذا الصغير كاتل نفسه, يريد يشوف مراد علم دار, ذابحني بالمسلسلات التركية هو وامه, لا بس عشر تيام, خلي يشوفون مدام عندي وكت, لانو بعد شهر, راح يصير موتمر القمة, وسيد ( ابو ..) راح ياخذ مشروع شارع المطار, والله حصلته من الجماعه بطلعان الروح, لا, عندي ضيف مستثمر وداحجي وياه, بعدين اخبارك, نسألكم الدعاء سيدنا.
اي العفو اخرناك اخوي, كلي مشروعك شنو, وشكد كلفته, وين صاير, نطيني مفصل عنه, وتدلل.. كمت من الكرسي, ومديت ايدي للسيد, كتله, اخذت من وقتك مولانا, شكرا على الجاي, واتمنالك سفره سعيدة, وبلكي تشوف مراد علم دار بتركيا, بس لا تنسى تاخذ صوره وياه, ونسألكم الدعاء سيدنا, ورجعت باول طياره
لدولتي, لان شفت الناس مو ناسنا كبل, حتى الكاع تختلف عن كاعي, ناس شرهين ميعرفون رحمه وضمير, المهم يصلخون الشعب صلخ,ونسأل الشعب العراقي الدعاء.
وما خفي كان اعظم
